Ka Nonanona, Volume II, Number 18, 31 January 1843 — Page 86
86 KA NONANONA. [IANUARI,
I. Pehea ka poe hoole pope i keia?
D. Eia ka lakou; O ka olelo, "O ko'u kino keia," Mat. 20: 26. ke olelo hoohalike ia, e like me ia olelo Kor. I. 10: 4. "O ua pohaku la, oia o Kristo." Owai ka mea manao i kela pohaku ma ha waonahele, kahi i hele ai ka poe Iseraela, o Kristo io ia? He hoailona wale no; he aka, pela na pauku e; pela ka olelo o na aina a pau.
2. Aole pono kakou e manao, ua wawahi Iesu i kona kino ponoi ma ka ahaaina mua.
3. Ua hai mai ka waha, he berena; hai mai ka lima, he berena; hai mai ka maka, he berena; Ina aole oiaio ka maka, ma keia hai ana, e oiaio anei ma na mea e?
4. Kauoha Iesu i na luna olelo e haawi i berena a i waina; oia hoi ka na haumana e ai ai, a e inu ai hoi.
5. Ekolu ka Paulo kapa ana i ka berena, he berena, a me ka waina, he kiaha a he waina, mahope mai o ka hoalohaloha ana. Kor. I. 11: 26-28.
6. Ina o ia berena ke kino o Ie su, ina ua like loa kanaka e noho nei me na lunaolelo i ka ike maka ia Iesu.
7. O ke kapa ia berena, he Akua, ua like loa me ka hana naaupo o Hawaii nei i ka wa kahiko; aole like me ka naauao o ka palapala hemolele.
Nolaila, he akaka ia berena, he be rena no ia; o ka waina, he waina no ia; aole pono ke hoomanaia, me he akua la.
(Aole i pau.)
HAUNAELE MA KAUAI.
Eia malalo kekahi palapala e hoike ana i kekahi haunaele ma Kauai. E heluhelu pono no kakou me ka noonoo, alaila ninau ia kakou iho, owai ka poe pono? O ke kumu pope, a me kana poe haumana paha? A o ke kiaaina paha, a me na luna? Auhea ka pono iwaena o lakou? I ko'u manao, ina i pololei keia palapala, ua hewa ke kumu pope a me na haumana ana - hewa loa, aole pono iki. Ua pono ka hoolimalima ana a Kauakahi me Ioane, e imi waiwai no na kumu kula a me ke aupuni; ua ku pono keia i ke kanawai; malama paha ua lilo kau wahi o ia waiwai ke loaa mai i na kumu kula pope, aole no na kumu ao ma ka aoao kahiko wale no. No ke aha la lakou i hoole i ka hana e pono ai na kula o ke aupuni? Ina he kumu ao pope, oia kekahi e ukuia i keia waiwai. Nolaila, ua pono ka ka luna hana malaila. O kana hana no ia.
Eia kekahi; ina i palaualelo na wahine, aole hana e like me ke kanawai, pono no e hoopai aku ia lakou. Heaha la ka hewa oia? He mea ia e maemae ai na hale a me na kino, e oluolu ai ka noho ana, e pau ai hoi ka palaualelo, a e mahuahua ai ka waiwai. Ina no nae i hoopai ewaewa ka luna i na wahine pope wale no, a hoopunahele i na wahine e ae, he hewa loa ia.
Ma kela kanawai a Keaka i hilinai ai (aoao 34. p, 12.) Ua akaka ka hana a ka wahine, a o na wahine malama ole i ua kanawai la, ua hewa lakou a ua pono ke hoopai aku. Na ka lunaauhau no e hoopai. Pela ke kanawai.
Eia no nae keia; ina ua hewa ka hoopai ana o Kauakahi i kela poe wahine, eia ka mea e pono ai, o ka hoopii pololei aku i ke Kia aina, a nana no e hooponopono. Pela ke kanawai, a he mea pololei hoi ia.
Eia kekahi; o ke kumu pope no ke kumu o kela haunaele a pau loa. Oia ka mole o ka mokuahana ma ia wahi; ina aole oia, ina ua pono paha. Oia no nae ke ano nui o ka aoao pope a me na kumu pope ma na aina a pau a me na wa a pau; he mokuahana, he hookiekie, he hoole i na'lii a me na kanawai a me na luna a me ka olelo a ke Akua kekahi. Aia kulou ilalo na'lii a me na luna a me na kanaka a pau imua o lakou, alaila oluolu ho lakou manao. Ua like anei kela hana a Berenaba me ka hana a Iesu Kristo? Ua noho anei ka uhane o Kristo iloko ona? Ua noho haahaa o Iesu malalo o na kanawai, me ke akahai, a me ka hookupu i ke lii.
Koloa Nov. 28, 1842.
Eia wau ke hoakaka aku nei i ke ano o keia hooke ana. Na na kane a me na wahine pope keia hooke, a o ke kumu pope kekahi, oia hoi, o Berenaba. I ko ka luna auhau hoolimalima ana me Ioane kumu i pili hale; a holo ka olelo no ka hoolimalima, olelo aku la ka luna i na kanaka, "o keia mau la paahao ae, eia ka kakou hana, he