Ka Nonanona, Volume II, Number 18, 31 January 1843 — Page 88

88 KA NONANONA. [IANUA RI,

SILIKA HELU 4.

            He aina ua ka aina o Kale, nolaila ua pulu pinepine na lau ilima i ka ua. Aole pono ke hanai i na enuhe i na lau pulu i ka wai, o loohia lakou i ka mai, nolaila ua kukulu mai o Kale i hale kaulai lau ilima he 60 paha kapuai ka loa a he 20 ka laula, malaila ua hoomalooia na lau i na la ua.
          He hale okoa hoi kekahi, he hale wili, he 30 kapuai ka loa a he 18 ka laula, malaila na wili 6 e wili ana i keia manawa. Ua paa i ka wiliia i kela wili keia wili i ka la hookahi ka hapalua o ka pauna silika: aka, ina he maikai loa na popo, ua paa na hapaha ekolu o ka pauna, a o ka pauna okoa paha i ka la hookahi. Ma ka lawelawe ana, elua paahana ma ka wili hookahi e pono ai, na kekahi no e wili, a na kekahi e malama i na popo iloko o ka wai wela a e makaala i na kaula e pii ana maluna o ka wili. He makalii loa na kaula, huiia na kaula he 15 a he 20 paha i hookahi, a he makalii loa no ia.
          Ina i waeia na popo maikai loa wale no, alaila ua loaa ka pauna silika hookahi i ka wili ana i na popo 3,000: aka, ua kapaia na popo he maikai ke loaa mai ka pauna silika hookahi i ka wili ana i na popo 5,000. I kekahi manawa no ua make na popo 8,000 i pauna silika hookahi; no ka hanai maikai ole ana i enuhe, milo lakou i na popo liilii, aole nui ke silika. Okoa no hoi ka wili akamai, a okoa ka wili hemahema, aneane pau loa ka popo i ka wilihia i ka mea akamai; aka o ka mea hemahema, hoomaunauna wale no ia.

LUAKINI HINA I KA MAKANI.

            Ua palapala mai o Keikenui ma Waianae Ianuari 18, 1843 penei, "ua pilikia makou; ua hina ko makou luakini kahi a makou e hoonani aku ai ia Iehova; o ka makani ka mea i hina ai. O ka luakini pope kekahi i hina. Mai poino na kanaka i keia hina ana, aole nae i make kekahi.

PELE HOU.

            Ke lohe nei makou, ua poha mai kekahi pele hou ma Maunaloa, a ke kahe nui mai nei kona ahi a kokoke i Waimea.

LOHE HOU.

            I ka la Sabati iho nei Ianuari 29, ku mai ke kialua Joseph Pea body, o Dominis ke Kapena, mai Mazetlan mai, a ua lawe mai i mau palapala no Amerika mai. Eia na mea a makou i lohe maopopo.
          Ua holo mai ka moku kalepa, Bearing, mai Bosetona mai i ka la 2 o Nov. 1842, a e holo mai ana ka moku kalepa o Delaware iloko o Dekemaba iho nei. Aia no o Casela ma a me Kakina ma maluna o ka Bearing.
          Aole hoi wawe mai o Binamu. Ua lawe i kekahi hana ma Nu Ioka, e paipai i na ekalesia e hoolaha aku i ka olelo a ke Akua ma na aina e. Ua hiki mai kekahi palapala ana, a kokoke e paiia ma ka Nonanona.
          Eia kekahi; ke kohiia nei ke 'kanala,' oia hoi, he auwai holo moku ma ka puali o Dariena, mai ka Pakifika a i ka Atelanika; a paa ia hana, o ka hui no ia o na moana elua o ka Pakifika a me ka Atelanika, a holoholo na moku mai kekahi a i kekahi ma ua auwai la. Nani ka pomaikai! Pau ka holo ana ma Kapehone kahi ino, a kokoke mai na aina naauao. Na ka poe Farani e hana keia hana.

          MOKU MANUWA. - Eia ae ke holo mai nei, mai Mesiko mai, kekahi manuwa Beritania, o Carryford kona inoa; he moku nui, he 'frigate:' o Lord George Paulett ke alii. O ke ku mai koe.

NA LIMAIKAIKA e hoopuka'ku.