Ka Nonanona, Volume II, Number 19, 14 February 1843 — Page 93

1843.] KA NONANONA. 93

e pili ai, e kakau iho oe i na inoa o ua mau mea la au i ike a na'u na ka mea i ike ole e hooponopono aku me ka hawawa: a nana na kanaka mai keia pae aina aku, a hiki i na aupuni naauao.
                Auhea oe e Unauna, e hoakaka mai oe i keia mau ninau malalo iho nei, i maopopo ia makou kou akamai, a olioli makou i kou akamai a me ka noiau, a me ka mikololohua, a me ka auliikolomanu.
                I ka manawa hea o Kumuhonua i noho ai ma Hawaii nei? Mai ka aina hea oia i hele mai ai a noho ma Hawaii nei?
                Ehia makahiki mai a ia a hiki i keia manawa? Ehia makahiki o kona ola ana? Mai a Kumuhonua a hiki ia Wakea ehia makahiki? Pehea ko Wakea noho ana a me kana hana ana?
                Heaha na hale o Wakea ma? Mahea na hale i ku ai; ma ka aina hea? Mahea laua i moe ai me kana kaikamahine me Hookukalani?
                Ehia makahiki ona i ola'i? Mai a Wakea a hiki ia nei ehia makahiki? E hai pakahi ma oe i na makahiki o na'lii a pau ma ke kuauhau?
                Eia kekahi. E hana mai oe i kuauhau pololei loa, aole e komo iki kekahi inoa o ka'u kuauhau iloko, aole hoi ma na mana a'u i hoakaka ai; i mookuauhau e wale no; E hoomaopopo mai no hoi i ko lakou noho ana? Alaila, lilo oe i mea akamai loa; ua like oe me Petolemo ke kanaka naauao no Aigupita.
                Auhea oe e Unauna he mea nui keia, he mea nou e naauao ai; a e lilo ai oe he mea noonoo nui loa. Aka he palupalu ke kai a me ka wai, aka, ea, he nui na kanaka i palemo aku ia lua; a o ke gini i kona aleale maikai ana ma ke kiaha, i kou nana ana, i kou hoao ana ia mea, e nahu mai no ia me he nahesa la, a e pa mai me he moonihoawa la.
                O kau mau mea hoi i hai mai nei he mau mea kuhikuhi ia i ko makou nana ana, aka, ea, akahi no nae a paa kona hakahaka, i kou hoakaka ana mai ma ka nupepa hoolaha ike.
                Eia no ka mea e paa ai kona mau hakahaka, o ko imi mai i na ninau i hoakaka ia'ku nei mamua, oia ka laau lapaau, o ka nini ikaika hoi ia e ola'i kona mau palapu eha. Mai kuemi, mai unu iho, mai kekee, mai kulou ilalo, e ala ka maka iluna.
                Aka i loaa ole ea, e akaaka makou, na haumana o ke Kulanui ia oe, me ka henehene. "E hele oe mai hana hewa hou aku," Na S. M. K.

No ka ilio.

                Auhea oukou e na kanaka o Hawaii nei a puni, ke hai aku nei au ia oukou i kekahi hana hou a makou ma Honolulu nei. Eia no ia, ke hoomakaukau nei makou e hoopii aku i na ilio imua o na lii iloko o ka ahaolelo i ka malama o Aperila eia hoi ka makou palapala.
                "Auhea oukou e na lii a me ka poe i kohoia iloko o ka ahaolelo; e ola a me ka pomaikai oukou, a me ke aupuni.
                Eia kekahi mea, manao makou e hoopii aku imua o oukou a na oukou e noonoo a imi i ka pono a me ka hewa o ko makou manao. I ko makou ike ana he mea ino ka ilio o Hawaii nei, a pomaikai ke aupuni ke imi iho a pau loa paha. Eia na hewa a makou i ike ai ma na ilio.
                I. He mea pelapela ka ilio; ua pili ka uku ia ia, a me ka lepo, a i kona noho ana iloko o ka hale, ua pelapela ka hale ia ia, a he mea ia e ino ai ka noho ana o na kanaka.