Ka Nonanona, Volume II, Number 19, 14 February 1843 — Page 94

94 KA NONANONA. [FEBERUARI,

                II. Eia kekahi; he hoaai, he hoamoe, he hoahele, he hoalauna ka ilio no na kanaka o Hawaii nei. Malama nui kekahi poe wahine i ka ilio, aole malama i kana keiki; he aloha i ka ilio a halihali ia ia iloko o kona poli a waiho wale i ke keiki me ke aloha ole.
                III. O ka ilio kekahi mea e ilihune ai na kanaka. Nui ka ai i pau ia ia; nui na moa, na pelehu, na koloa, na kao a me na hipa i pau ia ia i ka aihue, a nolaila kekahi ilihune.
                IV. Eia kekahi: he nui ka waiwai i lilo no ka ilio, a he hapa loa ka waiwai i loaa hou mai ia ia. Aole i like me kekahi mau holoholona, e like me ka hipa, ke kao, ka bipi, ka puaa, a me na manu; he mau holoholona keia e waiwai ai na kanaka. Aole loa pela ka ilio, he mea ia e ilihune ai.
                V. Eia kekahi ino o ka ilio, o ka hae wale aku i ke kanaka ma ke alanui e hele ana: a nahu wale hoi kekahi poe ilio i na keiki a me na kanaka.
                VI. Aole pono e malama i ka ilio i mea ai; aole ai na kanaka naauao i ka ilio, hoopailua loa lakou ia mea ino. Ma na aina naaupo wale no, ai na kanaka i ka ilio. He mea hilahila keia.
                VII. Ua pili kekahi mai i ka ilio, a ina noho pu kela ilio mai me na kamalii, lele ka mai meeau maluna o na keiki, a poino lakou.
                E na lii a me ka poe i kohoia , pehea ko oukou manao i keia mau hewa o na ilio? Aole anei he oiaio? Ina he oiaio ea, e kau mai oukou i kanawai no ka ilio i emi iho a aneane pau loa lakou. Penei paha ka pono, e auhau i na ilio a pau i hapawalu no ka makahiki no kela ilio keia ilio. Alaila paha makau na kanaka i keia auhau a hoopau i na ilio. Ina he ilio maikai, he kiai no ka hale, e ola paha ia a oluolu kona haku i ka uku i hapawalu nona. Aia no nae i ko oukou manao.
                E na kanaka o Hawaii nei, ina i like ko oukou manao me ko makou, e unuhi ae i keia olelo ma kekahi kanana nui, a palapala iho i ko oukou mau inoa, a e hooili aku no ka ahaolelo ma Lahaina. Ina he nui na makaainana ae like e make na ilio, a hoopii aku i na 'lii, e loaa auanei kekahi kanawai e pono ai, a maha keia lahuikanaka i keia mea ino.

SILIKA. HELU 5.

                Aole emi iki ko Kale ikaika i keia hana, ke lana nei kona manao e lanakila no. Ua makaukau oia, ua lawa i na mea e pono ai. Ua paa na hale hanai enuhe, kaulai lau, wili popo. Ua nui na lau ilima; ke ulu nei ma kona aina hookahi haneri tausani laau ilima a keu aku, o na ilima lau liilii, a o na ilima Kanetona, a o na ilima lau nui, a o na ilima hua keokeo. Ua lako loa i ka ai na na enuhe; a ina i loaa ia ia hookahi kanaha paahana e nakui mau ana i kana hana, ua hiki ke hanai mau aku i kekahi miliona enuhe i kela malama keia malama; o ka hooilo wale no i koe, ka wa i mae ai na lau. I keia makahiki nae, elua wale no hanauna i hanaiia. No ke aha la i hanai mai oia i elua wale no hanauna i keia makahiki? No ka lauwili o na paahana. I kekahi manawa haalele lakou a pau ia ia, a i kekahi manawa hoi mai no. O keia ano lauwili o na paahana ka pilikia nui e keakea mai ana i keia hana. Ina i kalaia keia pilikia, e holo lanakila no keia hana, a e lilo no ia