Ka Nonanona, Volume II, Number 19, 14 February 1843 — Page 95

1843] KA NONANONA. 95

i mea e waiwai ai keia pae aina. Ke manao nei o Kale, ina e kanu kekahi kanaka i hookahi ekere aina i na ilima, a hanai maikai i na enuhe i na lau, a wili maikai i na popo, ua loaa ia ia i kela makahiki keia makahiki hookahi haneri pauna silika noloko mai o kela ekera hookahi.
                E makaala oukou, e ka poe imi i ka waiwai no keia aupuni, mai hiamoe; e hookaawale aku i na mea alalai i keia hana, e kokua mai, i holo lea ia.

O KA LUPE E HAULE ANA.

                He olelo nane e hoike ana i ka naaupo o ka haaheo.
                O kekahi lupe ka i pii iluna a kiekie loa iloko o ka lewa, a lele maluna loa o na hale kiekie a pau, nana ilalo oia me ka hookano, a penei oia i hoowahawaha ai i na mea a pau malalo.
                "He nani kuu kiekie, owai ka mea i pii iluna loa me a'u nei? O ke alii ma kona nohoalli, he haahaa oia ia'u. Ke nana ilalo nei au i na kulanakauhale, na kanaka, na wahine a me na kamalii, me he mau kiko la. Aloha ino o lakou, na mea haahaa! Ke wahawaha nei au ia lakou."
                I kana olelo ana pela, huli ae la kona poo me ka hookano, hoolewa ae la i kona huelo loihi a holo aku la io ia nei, o ka haki no ia o kona kaula i paa ai, a haule koke mai ana ilalo, ua eha loa iho la. "Auwe!" wahi ana, "ina aole au i pii loa iluna, alaila, aole o'u i haule mai kahi kiekie loa a loaa mai keia eha nui."
                He pono kakou ke malama ia kakou iho i ka wahawaha ana i ka poe malalo ae, no ka mea, ua hiki kekahi mea uuku ke hoohiolo ia kakou ilalo iho o lakou.

NO KE KULA O MI. LOKE, MA WAIALUA.

                Ua hoike keia kula i ka la 19 o Ianuari. Malaila kekahi mau malihini e nana i ka hoike; aole nae hiki aku kekahi mau kumu no Honolulu no ka ua a me ka ino ia mau la. O Mi. Kamalina wale no ka i hele.
                He 22 keiki e noho ana iloko o keia kula. No Oahu nei ka nui, a no Maui kekahi.
                He kula ano maikai paha keia. Eia ka maikai.
                Ua aoia na haumana i ka palapala. Ma ka la hoike, hoike mai na keiki ma ka heluhelu a me ke kakau lima a me ka helunaau a me ka hulikanaka.
                Ua aoia lakou i ko ke Akua pono ma keia kula. Ma ka Baibala kekahi kula ana i kela la keia la. Hooikaika ke kumu ia lakou ma na mea e ola'i ka uhane.
                Ua aoia lakou i ka noho naauao a me ka maemae o ke kino. He wahi hale maikai ko lakou kahi e noho ai, ai pu lakou i ka papa aina hookahi, hele lakou me ke kapa a me ke kino ano maemae ke nana'ku.
                Ua aoia lakou i ka hana me na lima, he mahi aina ka lakou hana nui, he ko kekahi, he papapa, he kulina, a he wili ko kekahi hana nui a lakou e hana nei. Ua like ko lakou aina me na aina naauao, he maikai ke nana'ku.
                Auhea oukou e na keiki ma keia kula e hooikaika oukou, e imi i ka naauao e imi i ka pono e ola'i, e ao i ka hana maoli me na lima. NA PALEKA.
Kaneohe, Ian. 24, 1843.

Lahainaluna, Maui, No v. 14, 1842.

                Auhea oe e ke kaikaina o ke Kumuhawaii, a me ka Lamahawaii, o oe kai ola; ua make laua, ua hele laua i ka po. Ua noho oe i ke ao kalae. O oe no ke kiai hale i neia manawa. Na'u no e hoopuka aku i ka manao o ka poe manao. Nolaila, nau e hai aku i ka make ana o kekahi mau haumana o ke Kulanui nei, i na haumana o ke Kulanui i hoi aku nei mamua.