Ka Nonanona, Volume II, Number 19, 14 February 1843 — Page 96

96 KA NONANONA. [FEBERUARI,

                Auhea oukou e na haumana o ke Kulanui nei i hoi aku la i ka makahiki 1840. Eia no au ke hai aku nei ia Kuaaina, a me ka Niau ko oukou mau pokii. Ua hele aku la laua i ke ala ula a Kanaloa, i ke ala a Hoohano ma i hele aku la, i ke ala ulili i anapu mai i ka lani. Pau ko laua noho pu ana me makou a ua hoi aku laua i ka poli ala o ka Makua. Pau no hoi ko laua noho pu ana ma ka papa aina, a ma na keena kula. Ke honi la paha laua i ke ala o Lebanona, a me ka rose o Sarona, a me ka hala o Upeloa, a me kalehua o Makaulele, a me ka maile o Maunaihi. ALoha wale laua, a haalele mai ia kakou. Aloha na hoa i ka'ua a ka lipoa, lihau anu kookoou, he ahi ka ke kapa e moe anei e ka hoa ea.
                Auhea oukou e na haumana o ke kula a D. B. Laimna ma Hilo, a me ke kula a Coana malaila, a me ke kula ma Wailuku no hoi, aole anei e hiki ia kakou ke hoonani mau aku i ko kakou mea nana i malama mai; ma keia mau kula. E hiki no, no ka mea, aohe pakaua nana e keakea i ko kakou malama ana ia Iesu Kristo, ko kakou Haku.
                Ai ike oukou i na mea ano'e ma kela wahi keia wahi o ka honua a oukou i imi ai ma ka palapala e hoonani aku i ka Haku ma ia mau mea, Ua pau. Na'u na KALEOHANO.

HE MAU NINAU KOIKOI.

                Pono anei i ka lunaauhau a me ka luna kanawai o kekahi aina ke noho aku ma ka aina e, aole ma ka aina i haawiia nona e malama?
                Ehia mau lawehala ana o kahi luna auhau kahi luna kanawai paha a hemo pono, ma ke kanawai kona luna ana?
                Pono anei i na makaainana ke hoopii i ka luna imua o na lii ke ike pinepine lakou i kona kue ana i ke kanawai?
                Ina paha ua maopopo loa i na makaainana ka hewa o kahi luna auhau, pehea lakou e hana'i i hemo aku ua luna hewa la a i loaa ia lakou ka luna hou?
                Ina o ka mea i ike i keia mau mea pohihihi, pono paha ia ke pane mai i ike pu makou a pau.

NA MANUWA.

                I ka la 10 o Feb. nei ku mai ka moku manuwa Beritania ma Honolulu nei; o Carrysford ka inoa o keia moku; he moku nui; eia no nae iloko o ke awa. O Paulett ka inoa o kona alii.
                Eia kekahi; aole oluolu ka manao o keia alii manuwa; aole kani mai na pu aloha; ua oleloia no ka hoole ana o na'lii i ke Kanikele hou no Beritania ka pilikia. Ua kiiia ke Alii e holo mai, alaila, hooponopono. Haunaele iki na haole maa nei no ka oluolu ole o keia alii manuwa.
                He manuwa Amerika kekahi maanei. I ka la 13, kona ku ana mai, o Boston kona inoa, a o Long ka inoa o kona Kapena. Ma Kina keia manuwa a ma Nuholani a ma Bolabola a holo mai maanei.
                Ua pau ke kaua ma Kina, a ua noa ke kuai; ua lilo loa kekahi mau moku puni o Kina i ko Beritania; ma na kulanakauhale elima makai ua noa ke kuai, aole kapu; ua haawi ko Kina i ko Beritania i na dala he $21,000,000. Ua haahaa iki paha ka manao o kela alii hookiekie loa ma Kina i keia manawa. Olelo no ia, he lahuikanaka ikaika loa ko Beritania.
                Aole nui ko makou lohe i keia wa aole hiki mai na palapala iuka nei. Ma kela pepa paha, ikea kekahi mau mea no Kina.

NA LIMAIKAIKA e hoopuka'ku.