Ka Nonanona, Volume II, Number 23, 25 April 1843 — Page 112

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona
Buke 2. HONOLULU, OAHU, APERILA, 25, 1843. Pepa 23.

                Eia ke kolu, o ka papa hoike i na mea e ae.
                I ko'u kaahele ana, imi au i ka nui o na kanaka ka nui o na hoahanau e noho pono ana—ka nui o na Katolika. Ka nui o ka poe make, ka poe i hanauia, ka nui o ka poe i huli mai a hookomo ia iloko o ka ekalesia i keia makahiki, ka nui hoi o ka poe mihi a me ka hoihoiia mai noloko mai o ka poe haule, a me ka imi o ke kokua o na hoahanau. Eia no ia papa malalo iho.
                He mea hoakaka. He 17 mahele okoa ma ko'u kihapai. He hale pule okoa ma kela mahele, ma keia mahele. O ka aina kahi e ku nei ka halepule, oia wale no ka aina i kakauia. Nui paha na aina i huiia malaila. Aole i kakauia na inoa o ia mau aina. Ua pau nae na kanaka i ke kakauia.
                Elua manao i koe, 1 He manao hauoli. Nani ko ke Akua kokua ana mai ia makou nei i keia makahiki i hala iho nei. Ua hoomahuahua oia i na hoahanau—ua hoihoi mai i na hipa auana, ua hoomaikai i na kula kamalii—ua hoomahuahua i ka ike a me ka pono o na haumana. Ua haawi mai oia i ka hale pule pohaku ma Waimea nei a me ka bele maikai. Ke hauoli nei kuu naau. E hauoli pu oukou me a'u e a'u poe makamaka a pau mai Hawaii a Kauai; a e hoomaikai pu aku kakou i ke Akua mana, ka mea nana e kokua mai.
                2 Eia ka lua; he manao kaumaha a me ke kaniuhu, no ka pau ana o kanaka i ka make ma ko'u kihapai. 195 hoahanau i pau i ka make i keia makahiki hookahi! Na mea make a pau, 434; na mea hanau 98. Auwe!! Nolaila e pono ke hana ikaika no ka poe i koe, i hoopakeleia lakou i ka make mau loa. E kokua mai oukou ia'u e na makamaka ma ka oukou pule ikaika ana. Na LAIANA.

Ponohauai, Hilo, Maraki 20, 1843.

NO KA HAULE ANA O KEKAHI MAU HUA MAI LUNA MAI.

                Aloha oe e Nonanona. Eia ka'u hoike aku ia oe no na hua i haule mai mai ka lewa mai iluna i waena o ka ua, a me ka hekili, a me ka uila.
                Eia kona ano ponoi a'u i ike ai, ua like me he hua la a ka mauu a me ka papapa, he nunui a he liilii no hoi kekahi.
                No ka poe ike ole i keia mau hua keia hoike ana'ku. "Pela no ma Amerika wahi a kekahi poe olaila, he like me he huamoa la ka nunui. Ua ninau aku i ka poe kahiko i ka hiki ana mai o na hua e like me neia, ia wa, aole kahi mea kahiko i olelo mai i ka hiki ana mai ia wa,
                Eia ka mea i hiki mai ma Hawaii nei i ka wa kahiko a'u i lohe ai o ke one helelei, a me ka poeleele, ua kau ke one maluna o na lau, a me na hale a nui loa, ua poeleele loa ka wa kakahiaka hora 7 paha a hiki i ka hora 9.
                Hui aku hui mai ia wa, huhuki aku huhuki mai i ka hai ai a hui loa ka uwalaau ana, a me na pihe uwe me ka manao no, o ka make no keia i hiki mai nei ia kakou," wahi a lakou.