Ka Nonanona, Volume II, Number 23, 25 April 1843 — Page 115

115 KA NONANONA. [APERILA,

ka pule, a me ka noonoo a me ka makau a me ka mihi i ka hewa a me ka olioli o ka naau i ke Kalahala nui o Iesu Kristo, maluna o ua mau moku nei. Maluna o ia mau moku hoi, ua haalele nui na kapena a me na malama moku a me na luina i na mea ona. Nani ka pomaikai! Haleluia i ke Akua, e hiki wawe mai kona aupuni.

PAI HEWA.

                E nana ma ka papa 21, o ka loihi o ka hokuwelowelo, aole he 72 dekere; eia ka pono he 72 miliona mile, oia ka loloa o ua welo nei.

                E pouli iki auanei ka la i ka la 27 o Iune, mai ka wa e puka mai ai ka la, a i ka hora 10 o ke kakahiaka. Ina he la laelae e nana oukou, e ka poe ao hoku. E ike auanei ka poe e noho ana ma Nukuhiva a ma Berazila i ka pouli mawaenakonu o ka la i puni i ka malamalama me he poai la.

He manao Aloha i na hoaluhi ma na hana maikai a pau.
                Aloha oe e Nonanona.
                Eia keia wahi ai a'u ia oe, nau no e lawe aku ma na wahi a pau i noho ia e ko'u mau hoaluhi mai Hawaii nei a Kauai.
                E aloha ana au ia kakou ia'u e noho nei; no ka ike ole ia mai o na manao o kakou ia kakou, ma ka eleele o ka inika a kakou i huli ai ma Lelepanoa i ka la.
                Aole no hoi i hiki ia'u ke palapala pakahi aku ia oukou no ka uuku o kahi pepa, a no ka ike ole kekahi i kahi i noho ai.
                Eia keia. Ua akoakoa no kakou ma Auwaiawao kahi wai ono; a e hele liilii anei kakou ma na hana ku e i ko kakou makuahine o ke Kulanui ka inoa? Ma ka nana ana, a ma ka lohe ana, ma ka hana ana, he poe kaakaahiki mahope o ka ino. Auhea ka kakou uku no na hana maikai i hana ia mai ai ia kakou? Kainoa he poe kakou e imi ana i ke ola no ko kakou makuahine, aole ka! he poe hana make loa ka! Makhewa paha ke kuuia ana o na makau a kakou, no ka mea, aole he lawaia ia mahope o ke kauoha a ko kakou makuahine? Ma na hana a pau loa ua kulike ia me ka hookiekie wale ana no; a manao iho i ka ike uuku ana i huli ai, e mau ana ialaua iho ka hana mahope, aia hoi e holo ana me ke olohelohe, aole he hulu iki, ua pau, ua hamani a ua ilihualala. E na hoaluhi ma ka hana maikai, no ke aloha keia manao a kakou e ike nei maluna aole no ka hoino. Ua pau, Na IOANE B. KAIANA.

HE OLELO NANE NO KEKAHI NAONAO A ME KEKAHI UHINI

                I ka hooilo e hooikaika ana kekahi poe naonao e hoomaloo a e hooponopono i ka lakou ai. Hiki mai kekahi uhini kokoke make i ka pololi a me ke anu a makilo mai i na naonao e haawi ia ia i kahi huna ai. Ninau aku kekahi naonao ia ia, "Pehea kau hana ana i ke kau, i nele ai oe i keia manawa, aole i hoahuia mai kahi ai." I mai la oia. "I ke kau, ua noho au me ka lealea a me ka lelele ana a me ke kani ana, aole hoi i manao i ka hooilo." A laila, i aku la ka naonao. "Ina pela kau hana ana, eia ka'u olelo ia oe; o ka poe i noho lealea i ke kau e pono ia lakou ke pololi i ka hooilo."
                E na mea noonoo, pehea e pili ia keia olelo nane ia kakou; e imi oukou a hoakaka mai.

                E na haumana o Lahainaluna, e nana oukou i keia hana a Kailianu laua o Isaaka; ua like ole. Auhea ka mea pono o laua? Ua pau pu i ka hewa paha. Na oukou e noonoo.

PEPEHI KANAKA.

                I keia la ku mai ka moku okohola, o Maine ka inoa ma Honolulu nei; o Magoe ka inoa o ke Kapena. Mai make loa ke Kapena i ka po nei, e holo ana mai Maui mai. Moe ia iloko o kona wahi moe a i ka hora 11, ku ke kuene a pepehi ia ia me ka pahi, ma kona ai a ino loa; manao ke kuene ua make loa ke Kapena a holo iluna a papani i ka puka o ke keena mahope. I aku la ia i ka mete 2; e hoi oe ilalo i ke Kapena, huli ka mete e hoi ilalo a kipu ke kuene ia ia, aole nae ku. O ka holo no ia o ke kuene, aole akaka kona wahi e holo ai. Ua lele iloko o ke kai paha. Manao na kauka e ola no ke Kapena, aole nae ola wawe.

NA LIMAIKAIKA e hoopuka'ku.