Ka Nonanona, Volume III, Number 1, 23 May 1843 — Page 3

1843.) KA NONANONA. 3

olelo e hoopau ia dute, a ua pau no.
            Eia kekahi olelo o ke kanawai ua haule mamua, no ka hoike, eia na hua pono ke hookomo ma ke kanawai 46, pauku 21; lalani 41, "a he hapaha ka uku no ka hoike ana imua o ka hookolokolo iure, aku, ina he hoike i laweia mai kekahi mokupuni a i kekahi mokupuni, he hapalua ko ka haole uku a ha hapawalu ko ke kanaka maoli no ka la hookahi. Na ka iure no e olelo i ka mea nana ia uku."
          Hooholoia ma Honolulu i keia la 12, o Sepatemaba 1842
(Inoa.) KAMEHAMEHA III. KEKAULUOHI.

          O keia mau kanawai a pau maluna a me na olelo hooponopono i na kanawai, ua hooholoia e ka ahaolelo o na 'Lii, a me na mea i kohoia ma ka lakou ahaolelo ana e lilo no i kanawai no ka aina, e lohe nae ka poe Luna Beritania, a e kukalaia no hoi ma na aina nui o keia pae moku, a ina paha i ikea kekahi mau olelo o na kahawai mamua, ua ku e ke ano o keia mau kanawai hou; alaila, lilo ua mau olelo mua la i mea ole;
          Nolaila ke kakau nei maua i ko maua mau inoa i keia la iwakalua kumamawalu o Aperila i ka makahiki o ka Haku hookahi tausani ewalu haneri me kanaha kumamakolu ma ka hale ahaolelo ma Luaehu, i Maui, ma ka pae aina o Hawaii.
KAMEHAMEHA III. KEKAULUOHI.

AHAOLELO MISIONARI.

            Ua halawai na Kumu ma Honolulu nei i ka la 11 o Mei. O Pareka ka i kohoia i luna halawai, a o Kemalena ke Kakauolelo. O lakou a pau he 26. Eia ko lakou mau inoa. Mai Hawaii mai o Laimana, o Koana, o Wilikoke, o Parisa, o Bonede, o Tatina, o Aiwe. Mai Maui mai o Kalaka, o Emesona, o Beile. No Oahu nei o Kemalena, o Limaikaika, o Hola, o Kasela, o Napa, o Rokeke, o Daimana, o L. Kamika, o Bihopa. O A. B. Kamika. O Loke, o Pareka, o Gulika. Mai Kauai mai o Alekanedero, o Witine, o Kamuela. Ua pilikia kekahi mau kumu aole i hiki mai; Ua hoakaka lakou i ka lakou hana i hana'i i keia makahiki i hala'e nei. Hoike mai lakou i ke kokua ana o ke Akua ia lakou a me kona lokomaikai i ka malama ana ia lakou a me ka hoohuli ana o na kanaka ma ka pono, ka nui o na hoahanau hou i keia makahiki, a me ka poe i make, a me ka haule no hoi. A eia no lakou e noho nei, e ninau ana, a e kukakuka ana i ka pono e pono ai na haumana a lakou ma keia mau aina.
          Maopopo ka lokomaikai o ke Akua i keia makahiki i hala ae nei; ua nui ka hana kamahao a kona Uhane ma kekahi mau aina; ma Kailua, ma Molokai, a ma Kau; ua mahuahua na hoahanau e noho nei iloko o kona beri ta. Ua holo lea kana mau hana maikai i keia makahiki; ua malamaia na kula, a mahuahua ka poe ike; ua kukuluia a paa kekahi mau hale pule a me na hale kula. Ua kokua na hoahanau mamuli o kela hana keia hana manawalea. He mau mea kaumaha no nae kekahi a makou i lohe ai; aole nae e hiki ke hoike nui aku no ka pai koke o ka Nonanona. Mamuli paha hoike hou aku.

KUMULUA.

He wahi buke hou keia; he buke maikai hoi. Ku pono keia buke i na kamalii ike maopopo i ke kumumua; a paa ia ia lakou, pono e lalau koke i ke Kumulua a holo mua aku me ka ikaika a me ka mama. Ua paapu ke Kumulua i na kii nani a ua akaka no hoi na hua. Lealea loa paha na kamalii ke ike lakou i keia buke.