Ka Nonanona, Volume III, Number 4, 18 July 1843 — Page 15

1843.) KA NONANONA. 15

Lahaina aku, e hoi ana i Molokai, i ko lakou holo ana, a ka moana o ko lakou make iho la no ia; he nui loa no lakou i make i ka moana o Pailolo, ehiku ko lakou hui ana a pau. Aole kekahi mea o lakou i ikea, ua nalowale loa lakou. Ke huli nei kekahi poe makamaka o lakou, aole he loaa o ko lakou mau kupapau. Holo i Lanai, holo i Lahaina nei, aole no i loaa iki.
          Nui ke aloha o ko lakou mau makamaka, a me ke kaumaha no hoi o ko lakou naau, no ka make nui ana o ko lakou poe hoahanau ponoi ma ke kino.
          Ehiku lakou i make pu; a o kekahi o lakou, he Bolabola, me kana wahine a me ka laua mau keiki elua; o kekahi kanaka me kana keiki.
          Oia na mea a makou i lohe ai, aole nae maopopo ke ano o ka make ana. Ina i pae ola mai kekahi o lakou, ina paha ua maopopo lea ke ano o ko lakou make ana.
          Aloha ino keia poe make emo ole! me he aihue la ka hiki ana mai o ko lakou hopena. Aole wahi kaawale e noonoo ai a e hoomakaukau ai. Me he puahiohio la ka hiki ana o ko lakou popilikia.
          Auhea oukou, e na makamaka o keia poe i nalo iho nei, eia kuu manao ia oukou, mai noho oukou a inoino ka manao; mai ka kumakena, mai kupaka; aka, ea, e noho malie me ka haahaa a ma ka ae maoli aku i keia hana weliweli a ke Akua.
          Eia kekahi, e noho makaukau kakou a pau loa iloko o Kristo; no ka mea, eia kakou a pau iwaena o ka make; aole hoi akaka kona manawa e lele mai ai maluna o kakou, a hele koke aku kakou. O ka poe e noho maluhia ana iloko ka Halelana e ola'i, aole lanakila ka make maluna o lakou. Nolaila, e holo nui mai kakou a pee iloko olaila.
          Eia kekahi, mai holo naaupo maluna o na waa ma keia mau moana; he wahi make nui ia. E holo makaukau ka pono; e holo pu na waa elua a ekolu paha, a ina i poino kekahi e kokua kekahi ia ia. Mai holo ka waa ino, o make; mai holo i ka wa makani nui, a inoino hoi ke kai. O kou wahi manao ia; ua pau.

HE HANA MAIKAI.

            Ua helu iho nei Mi. Kakina i na eke akakai i ulanaia a i kuai hoi ia e na kanaka. Eha makahiki mamua aku nei, ua aoia kekahi wahine Hawaii e Kamikawahine e ulana i ka eke makamua, a mai ia manawa mai a hiki i keia wa, ua hanaia a ua kuaiia hoi na eke akakai he kanaonokumamalima tausani, (65,000). He 10 keneta ke kumukuai o ka eke hookahi, ehia dala iloko olaila? Eia paha $6,500. He hana maikai keia; maikai ka hua, nui ka poe ilihune i hoolakoia i keia hana. E aho e lawelawe na lima o na wahine o Hawaii nei i keia hana, he ole loa ka noho wale, a moe wale ma ka moena paha.
          O ka nui o na eke akakai e pono ai ka hana ko ma Koloa i keia makahiki he 15,000!
KAEHU.

HE NINAU HELU.

            Ke ku nei mawaho o ke awa o Kou nei, ka moku manuwa o Ame rika, o Uluhoku (Constellation) kona inoa. I ka wa i kani ai kona mau pu ku ana au ma ka hale o Mi. Kamalena, a nana aku la i ka wati, ike mua ia ka malamalama o ka pauda e anapu