Ka Nonanona, Volume III, Number 4, 18 July 1843 — MAKE NUI. [ARTICLE]

MAKE NUI.

Ua make kekehi poe kanaka ehiku iloko o ke kai o Pailolo; e holo ana lakou mai Maui aku a Molokai, a make nui ma ka moana. Penei ka palapala a Kaehu ma Lahainaluna i palapala mai ai. Iulai 3, 1843. Aloha oe e ka Nonanona; Eia no keia mea hou e hai aku au a nau no e hoike aku ia hai. I ka la 24 o lune i hala iho nei holo aku kekahi waa i Molokai mai

Lahina aku, o hoi ana i Molokai, i ko lakou holo ana, a ka moana o ko lakou make iho la no ia; he nui loa no lakou i make i ka moana o Pailolo, ehiku ko lakou hui ana a pau. Aole kekahi mea o lakou i ikea, ua nalowale loa lakou. Ke huli nei kekahi poe makamaka o lakou, aole he loaa o ko lakou mau kupapau. Holo i Lanai, holo i Lahaina nei, aole no i Ioaa iki. Nui ke aloha o ko lakou mau makamaka, a me ke kaumaha no hoi o ko lakou naau, no ka make nui ana o ko lakou poe hoahanau ponoi ma ke kino. Ehiku lakou i make pu; a o kekahi o lakou, he Bolabola, me kana wahine a me ka laua mau keiki elua; o kekahi kanaka me kana keiki. Oia na mea a makou i lohe ai, aole nae maopopo ke ano o ka make ana. Ina i pae olu mai kekahi o lakou, ina paha ua maopopo lea ke ano o ko lakou make ana. Aloha ino keia poe make emo ole! me he aihae la ka hiki ana mai o ko lakou hopena. Aole wahi kaawale e noonoo ai a e hoomakaukau ai. Me he puahiohio la ka hiki ana o ko lakou popilikia. Auhea oukou, e na makamaka o keia poe i nalo iho nei, eia kuu manao ia oukou, mainoho oukou a inoino ka manao; mai ka kumakena, mai kupaka; aka, ea, e noho malie me ka haahaa a ma ka ae maoli aku i keia hana weliweli a ke Akua. Eia kekahi, e noho makaukau kakou a pau loa iloko o Kristo; no ka mea, eia kakou a pau iwaena o ka make; aole hoi akaka kona manawa e lele mai ai maluna o kakou, a hele koke aku kakou. O ka poe e noho maluhia ana iloko o ka Halelana e ola'i, aole lanakila ka make maluna

o lakou. Nolaila, e holo nui mai kakou a pee iloko olaila. Eia kekahi, mai holo naaupo maluna o na waa ma keia mau moana; he wahi make nui ia. E holo makaukau ka pono; e holo pu na waa elua a ekolu paha, a ina i poino kekahi e kokua kekahi ia ia. Mai holo ka waa ino, o make; mai holo i ka wa makani nui, a inoino hoi ke kai. O kou wahi manao ia; ua pau.