Ka Nonanona, Volume III, Number 7, 22 August 1843 — Page 34

34 KA NONANONA. (AUGATE,

o kona mau aina ma kana hooko kanawai ana mamuli o ka pono.
          No ka mea, o ka pono no na alii nui a pau, me na luna aupuni a me na kuhina a pau e hoomalu maikai i na malihini e noho pu ana me na kanaka ona; a ina aole e hiki i kekahi alii ke hoomalu maikai ia lakou e like me kona poe kanaka ponoi, alaila aole no e pono ke aeia mai lakou e noho ma kona aupuni, ke hooia ole mai oia e noho maluhia lakou. Aka, aole no e manao ke Alii Beritania ua hihia maoli ke Alii o kekahi aina, i hou iho nei kona puka ana ae mailoko mai o ka naaupo, mamuli o ke kokuaia mai e ko na aina naauao, no ka hana kekee a kekahi mau kanaka ona, ke kokua ole ua alii la mamuli o kela hana kekee a pono ole, a ke noho malie ole kela i ka wa e ohumu ana, a e hana ana lakou i ua hewa la, a ke ae ole aku ia i ka noho maluhia o lakou me ka hoopai ole ia.
          Ina paha e hiki mai kekahi manawa e hunaia'i kekahi hewa, a e hooleia mai ai ka hoopono ana e na lii i ka pono no na kanaka Beritania, ua maopopo ilaila ka mea e hanaia'i; alaila he pono ko ka Luna Kiekie, ke hiki mai ka hewa io, a koe no ua hewa la me ka hooponopono ole ia, e imi ikaika aku a loaa mai ia mea pono a ka Mea Hoopunipuni a me ka Hoopono ole i hoole mai ai.
          Ke lana pono nei ka manao o ka Luna Kiekie e lawe no ke Alii o na Aina Hawaii i keia hoihoi ana aku i kona Aupuni nona, me ka hoomaopopo io i ka pono e kau mai ana maluna ona, e uku koke aku i na hala io i lawehala ai na kanaka ona i ka na kanaka Beritania; a e hoomaopopo hoi i ka pono o ka hoomau ana i na manao aloha i kuikahi ai ia mau aupuni elua i na makahiki he nui i hala ae nei. Ke lana nei hoi kuu manao, aole e hoopoina ke Alii, aole hoi kana mau hooilina mahope ona i ka mea a Kapena Kuke, a ka mea mua i holo mai i keia pae aina, ma o na la i hookipa mua ia'i na kanaka Hawaii iloko o ka ohana nui o na lahuikanaka. A ma ka waha mai o Vanekuva, kekahi kanaka Beritania,) ilohe mua ai o Kamehameha I i ka hoohiki ana i ka inoa o ke Akua oiaio, ke kumu ia i hoopauia'ku ai, mahope wale mai, ka pule wahahee, ka hoomanakii, a me na mohai kanaka. A ma ka hana ikaika, a me ka hoomau molowa ole o na Misionari Amerika ua hookupaaia'i ka hoomana oiaio, haumia ole, i hookuiia me ke Ao palapala a me na oihana hoonaauao. A ina e huipu ia, a e ao pono ia keia mau mea, e hooulu mai no ia i ka maluhia o ke ola a me ka waiwai, i ka Luna pono, i ka hoomahuahua i ka Naauao, i ka Pomaikai o ke Aupuni, i ka mahalo a me ka manao maikai mai o ko na lahuikanaka e, o ka poe e oi aku ana mamua o oukou ma ka ike, i ka Manaoio i ke Akua, a me ke akamai i ka oihana malama aupuni.
          O keia mau mea e pomaikai ai a e pono ai, ka na Alii Beritania e makemake nei e hoouluia a e hoolahaia'e iwaena o na kanaka Hawaii mamuli o na hana pono a pau e hiki ai ia lakou. A pela e hoohuliia'i ke Alii me kona mau Luna ma ka aoao o ka Hoopono; o ke kumu ia o ka Noho maluhia, a me ke Apo paa o ka oihana Kalepa.
Ua hookoia keia maluna o H. B. M. Moku Dubelina, ma Honolulu, Oahu i keia la kanakolu kumamakahi o Iulai, i ka makahiki o ko kakou Haku, hookahi tausani ewalu haneri me kanaha kumamakolu.
(Kuu inoa ia) RICHD. THOMAS.
Unuhiia e A. BIHOPA no ka Nonanona.

HE ALII OLE.

            Ea! Auhea kela haumana Pope, o Davida kona inoa, ka mea i hoole mai i ka pono e kapa aku i alii, ma ka pepa 6, aoao 29? Ua pono ia ia ke noonoo iki, no ka mea, he alii ma ka po, o ka Diabolo kona inoa. Ua pono hoi ia ia ke noonoo i kona ano iho; no ka mea, aole like kona mau lala a pau. He poo kekahi, he mau lima kekahi, he mau wawae kekahi, he maka kekahi, he pepeiao kekahi, a he waha kekahi; aka, pehea o ua Davida nei, ke ole he poo?