Ka Nonanona, Volume III, Number 7, 22 August 1843 — Page 36

36 KA NONANONA. (AUGATE,

paha e hoolohe kekahi makua, a e imi nui i na mea e pono ai kana keiki punahele.
          I ka makahiki mua o ke ola ana o ke keiki, aole kupu nui kona manao; nolaila o kona kino, ka mea nui e malama'i.
          Akolu mau mea nui e pili ana i keia hana. O ka hoomaemae, o ka hanai, a me ka hoooluolu o ka noho ana. Eia ke ano o ka hoomaemae. O ka auau ana o kona kino, a me ka hookomo ana o ke kapa pelapela ole. He pono ke holoi i kona kino i kela la i keia la, mai ke poo a i ka wawae, iloko o ka wai mehana. Aole pono ke holoi me ka lima kaumaha, no ka mea, ua palupalu kona ili, aole oolea e like me ke kanaka makua. Aole pono ke holoi i ka wa i pololi ke keiki, a make hiamoe paha. Aia maona, a ala mai kona hiamoe ana, alaila holoi. Mai waiho ke poo, a manoanoa ka lepo, e like me ka oukou hana i ka wa kahiko; e holoi pu no, i ulu pono ka lauoho, a i loaa ole ka mai puupuu. A pau ka holoi ana, e hoomaloo maikai ke kino, a lulu ka pia ma na wahi palupalu, alaila e hookomo ke kapa maemae, a e hanai, a hoohiamoe paha e like me ka makemake o ke keiki. Aka, ea! mai waiho a holoi kakaikahi, e like me kekahi poe. Ua ike au kekahi keiki, akolu kona mau mahina ma ka honua nei, aole holoi iki ia mai kona hanau ana, a hala ua mau mahina akolu la, wahi a kona makuwahine!! Auwe ka hewa o kela makuwahine! aloha ino ua keiki la! no ka mea, ua paapu kona kino i ka mai, ka puupuu, a me ka pala; a ua ekaeka loa kona noho ana.
          Nolaila, o ka auau ana i kela la i keia la, oia kekahi mea nui, e pale ka mai, a e hooulu pono ke kino o na keiki, a e hoooluolu ko lakou noho ana ma keia ao.
Na A. W. KAMIKA.

          I ke kakahiaka o ka la 12, o keia malama, holo aku la ka moku manuwa Dublin i Hilo, no ka wai.
          A ma ke ahiahi o ua la la, hoi aku la o Kamehameha III, i Lahaina, ma ka moku Hooikaika. Ua holo pu me ke alii, o Kamakoa Kearny, ma ka moku manuwa Constellation, a hiki i Lahaina, a ike i ka Hooikaika e ku pono ana ilaila, o ka hoi hou mai no ia o ua moku manuwa la, a ku hou ma Honolulu nei.

          Ua hala ka moku manuwa Hazard i Mazetlan, e lawe i na palapala e hoouna koke aku i Beritania.
          Ua oleloia, e noho ana ka moku manuwa Dublin, laua me ka moku manuwa Carysfort ma Hawaii nei, a lohe pono ka Adimarala, mai Beritania mai.
          Ke noho nei o ka A dimarala ma ka hale Kauila kokoke i ka papu. A ke kau nei oia i kona hae ilaila i keia manawa.
          Ua maluhia hou ke kulanakauhale o Honolulu i keia wa. A ua hoi nui aku na wahine hookamakama i ko lakou mau aina ponoi. Pomaikai ka poe i ku paa ma ka pono, me ka hihia ole, a me ka haumia ole, i keia mau mahina elima i hala ae nei.

MAKE.

            I ka la 16 iho nei, make o Kalaimoku wahine, o ke kumu o kona make ana ua haule i ka lio ma Aigupita, i ka la elima ma ke ahiahi.

NA KAMIKA e hoopuka'ku.