Ka Nonanona, Volume III, Number 8, 5 September 1843 — Page 42

42 KA NONANONA. (SEPATEMABA,

ka mea nana i haawi mai ia kakou i ka uhane noonoo, a nana no hoi i hana i kino kupono no kakou, i hiki ia kakou ke hana i kela mea, i keia mea, e like me ko kakou manao iho.
          No ka mea, ina lilo oukou a pau i poe malama i na kauoha a pau a ke Akua, alaila pomaikai keia aupuni, no ka mea, hiki paha ia oukou ke hele aku e ao i na kanaka a pau, ma na mea a pau e naauao ai. Aka hoi, no oukou iho ka pomaikai loa.
          Nolaila, ea; E ala! E ala! E na hanauna kamalii. E hoomanawanui ma na hana pono a pau, i pomaikai oukou. Aloha hoi ka hanauna Hawaii.
            Na ko oukou hoa imi naauao.
IOANE.

HE NINAU MA KA HELU.

Auhea oe e ka Nonanona?
          Eia mai kekahi mau ninau, e pono ia oe e hoolaha aku.
          E holo ana na moku elua i ka la 2 o Augake, i ka makahiki 1843, o A a me E ka inoa o na kapena o ia mau moku.
          I kekahi la, ana iho la o E i ke kiekie o kona moku, a loaa 100 kapuai. Ana iho la no hoi oia i ka huina haahaa o lalo o ka moku o A, a loaa 2 dekere.
          Ehia ka loa mai ka moku o E aku a hiki i ka moku o A?
          E ka poe akamai i ka helu, e wehewehe mai.

HE MAKUWAHINE HEBE RA.

            I ka wa kahiko, hele kekahi Rabi Hebera i Ierusalema e malama ka ahaaina Moliaola; a waiho iho la ia kana wahine a me kana mau keiki kane elua i ka hale. A hala oia, loohia na keiki i ka mai nui, a make aku la laua elua. Lawe ka makuwahine ia laua, a holoi ko laua mau lima, a hookomo ke kapa kupapau, a waiho ia laua maluna o kona moe. Makau oia e hoike aku i kana kane i ka make ana o kana mau keiki, no ka mea, he mau punahele loa laua ia ia; ua pai pu kona naau me laua.
            A hala na la o ka ahaaina, hoi hou ka Rabi i kona kulanakauhale; a hiki i kona hale ponoi, halawai pu me kana wahine, aloha ia ia. Alaila ninau koke oia ia ia, "auhea ka'u mau keiki punahele? E lawe mai, e honi au ia laua." Pale aku la ka makuwahine i kana olelo, me ka i ana ae; "e ai oe." Ai iho la kela a maona, alaila kauoha hou i kana wahine, "E lawe mai i ka'u mau keiki kane, i aloha hoomaikai aku au ia laua." Alaila kaumaha ka maka o kana wahine, a i aku la ia i kana kane. "E kuu haku e! He wahi ninau ko'u ia oe." I mai kela, "heaha?" Olelo aku la ka wahine penei. "Mamua aku nei, ua haawi lilo ole mai ia'u kekahi makamaka o'u, he mau momi makamae, nani loa; a i keia mau la ua kii mai ka mea nona ua mau momi nei, e lawe aku. Pehea, he pono anei ia'u ke hoihoi aku i kona waiwai? Kahaha ke kane; a olelo mai la ia i kana wahine; "Ua kanalua anei oe? aole pono anei i ka haku ke lawe i kona waiwai ponoi?" Alaila, lalau kana wahine i kona lima, a alakai ia ia iloko o kona keena; aia maluna o kona moe, e waiho ana kana mau keiki kane punahele elua, ua make! Nana ae la ka makuakane ia laua, a hina koke ia maluna o ka moe me laua, a auwe iho la me ka leo nui, me ka i ana ae. "E ka'u mau keiki kane! E ka'u mau keiki kane!" Haliu ae la ka makuwahine, a auwe me ka naau ehaeha, kaumaha. A liuliu iki,