Ka Nonanona, Volume III, Number 9, 19 September 1843 — Page 46

46 KA NONANONA. (SEPATEMABA,

o ke aupuni a akaka ka aina e ma ka ahaolelo nui ana.
          2 Ua oleloia ma ke kanawai hookolokolo Iure e kohoia na Iure haole noloko mai o ka poe hanohano a me ka pono, me ka manao ole i ua kanaka la o kona aina, aka, mai keia hope aku, ina e hookolokoloia ka w aiwai a me ke kino o ka haole ma ka Iure, e kohoia ka hapalua o na Iure noloko mai o na kanaka o kona aina, a e hoike mai na Kanikele i ka papa inoa o na kanaka o ko lakou aina iho, ua kupono i ka oihana Iure, e hookaawaleia hoi ko lakou mau inoa ma ka pahu okoa, a i ka wa e kohoia na Iure e unuhi like pu me ko kekahi aoao a lawa ka Iure. Eia hoi kekahi ua hooholoia, e pau na Iure i ka olelo hoohiki mamua o ka hookolokolo ana, aole o lakou paewaewa, aole hoi kuleana ma ka hihia e hookolokoloia ana, aole loa.
          3. No ka maopopo ole o na olelo a me ke ano o ka noho ana iwaena o makou a me na aina e, i keia wa, nolaila, ua hooholoia keia manao e hoopanee aku i ka hoolimalima aina a hoi mai na Luna i hoounaia aku i na aina e, a ua hooholoia ko makou mau ae like, aole e haawi wale i ka aina, aole hoi kuai i ka aina i ka haole, aole loa e lilo ke hana kekahi pela.
          4. No keia wa e noho nei e ae ia na hale kuai Kukaa ke kuai ka rama a me ka waina ma ka mea aole i emi iho i na galani elima a me ka pahu i lawe mua ia mai maluna o ka moku, ke hoomalu lakou i ke aupuni i na dala elima haneri aole lakou e kuai ia hai, i ka poe hale kuai liilii i ka rama a me ka poe luna no na moku a me na hale hanohano wale no.
KAMEHAMEHA III. KEKAULUOHI.

NO NA MAKUWAHINE MEA KEIKI.
HELU 3.

            Aloha oukou. Pehea ka oukou hanai ana, a me ka hooluolu ana i ka oukou mau keiki liilii?
          Ua ike au i kekahi mau makua i ka wa i hanau ai he keiki hou, lawe koke aku ia ia i kekahi wahine waiu kahiko, a nana e hanai ia ia. Aka, aole pono keia hana; no ka mea, o ka waiu mua o ka makuwahine, oia ka ai pono loa no ke keiki hou. Na ke Akua no i hoomakaukau keia ai. Aole pono ke hanai i na keiki liilii me ka ai oolea a me ka momona, he uala paha, he poi paha, he ia papa, aole loa. O ka waiu kana ai maopopo.
          Eia hoi keia mea a'u i ike ai iwaena o na makua o Hawaii nei. I ka wa i ukuhi ia'i ke keiki, a hoomaka ia e ai i ka ai maoli, nau e ka makuwahine i ka ai iloko o kona waha, alaila hookomo ia iloko o ka waha o ke keiki! E! he mea pono ole keia, he mea hoopailua; mai hana hou oukou pela!
          E makaala nui, a e hana lokomaikai aku i ka oukou mau keiki liilii, i ke ao a me ka po. E hoolilo i ko oukou manao nui ia lakou. Ina auwe lakou; e imi koke oukou i ke kumu o ka auwe ana: ua pololi paha, ua makemake paha e hooluolu ia iloko o ka poli o ka makuwahine. E nana oukou i na manu o ka lewa, a me na moa o ko oukou mau pa. Ua malama pono lakou i ka lakou mau keiki, ua imi nui i ka ai, a ua hoopumehana, a hoomoe pinepine ia lakou malalo o ko lakou mau eheu. E hana oukou pela.
          Mamua aku nei ua lohe au i kekahi keiki liilii e auwe ana i ka po; a, no kuu lohe pinepine ana ia mea, ninau aku la au, "heaha ka pilikia o kela keiki?" I mai ka makuwahine o ua keiki la penei. "Auwe no ia i ke aha? I ka pololi paha, i ka pulu paha, i ka mai paha." I hou aku la au, "A pehea oe, aole oe e hooluolu pono i kau keiki?" Olelo mai la ua makuwahine la, "no ka minamina i ka hiamoe?" Alaila