Ka Nonanona, Volume III, Number 9, 19 September 1843 — Page 47

1843.) KA NONANONA. 47

kahaha iho la au, a i iho la au iloko o'u; "He mea kupanaha keia; ua haawi lokomaikai mai ke Akua i ke keiki i keia makuwahine, aole nae e hiki ia ia ke ala i ka po e hooluolu ia ia!" I ka wa e noho pu ana ka'u keiki hiwahiwa me au, aole loa wau i minamina i kuu hiamoe a me kuu luhi, no ke aloha nui i ka'u punahele.
            Ua lawe ia mai ia'u kekahi keiki hou, hookahi mahina wale no kona noho ana ma keia ao, aia hoi, ua paapu kona kino i ka puupuu. A ninau aku la au i kona makua, "he mai puupuu paha i kau keiki?" Hoole mai la kela. "Aole, he nahu uuku keia; ua nui na uku ma kona kapa moe." Alaila, ehaeha loa kuu naau, no ka pilikia o ua keiki la. Ua molowa kona makua, aole hoomaemae pono i kona wahi moe, a nolaila ua moe kela me ka onioni i o ia nei, aole nae i loaa ka oluolu.
          Aole pono ke waiho i na keiki liilii iloko o ka makani a me ka ua a me ka la, me ka uhi ole ia. Ina e halihali aku oukou ia lakou ma kahi e, e uhi pono i ke poo, a me ke kino a pau no hoi. A. W. KAMIKA.

HE KAMAKAMAILIO MA KA HOIKE KULA A IOANE MA WAIOLI, KUAI.

            Piho. Heaha la kau maanei, e Kalu, e hele ana oe ihea?
          Kalu. Iuka aku nei no.
          P. Ua kani mai nei ka pu kula a kakou, aole oe i lohe?
          K. Ua lohe no au.
          P. E hele kaua i ke kula.
          K. Aole paha e hiki.
          P. I ke aha hoi?
          K. Ua pau ka'u hele ana i ke kula.
          P. Heaha ke kumu e pau ai?
          K. Ka! he hana luhi no ia. Aole manawa e hoomaha ai. Kakahiaka, hele i ke kula; ahiahi hele i ke kula; kula, kula, kula, he kula wale no.
          P. Heaha la hoi; he hana pono no ia.
          K. Aia no ia oe i kou manao, aka, e hele ana au iuka.
          P. Alia! e olelo iki hou kaua ma keia mau mea. Heaha ka pono e loaa ia oe ma ka haalele ana i ke kula?
          K. Eia; ina noho au, ua hiki ia'u ke hele ma kahi i manao ai me ka paa ole. Ua hiki ke hele iuka, a i kai, i ke kii manu, a i ka lawaia, a me ka auau makai.
          P. Heaha la nei? Ua hiki no ia'u ia mau hana ma na ho ra hoomaha, a ma ka la hoomalolo no hoi.
          K. Eia hoi kekahi: ua manao au, ua nui kuu ike. Ua ike au i ka heluhelu palapala, a me ke kakau lima.
          P. Ka! he hapa loa no kou ike. Mai manao oe ua naauao oe, aole loa!
          K. Mai hoino mai oe ia'u.
          P. Aole paha he hoino he oiaio no. He hapa loa no kou wahi ike.
          K. Ua oi aku kuu ike mamua o ka ike o ko'u makuakane.
          P. Ua oi aku no paha, no ka mea, aole he Kula i kona wa kamalii: he manawa pouli no ia. Aka, ua hala ia wa. He aupuni hou keia a kakou e noho nei. Ua hiki mai nei ka malamalama.
          K. Heaha la ia malamalama?
          P. Ka olelo a ke Akua, a me na kula kahi i laha aku ai ka naauao.
          K. He maikai no hoi kela aupuni, he oluolu; ua paa hana kela kanaka keia kanaka e like me kona manao iho.
          P. Kahaha! e! Ke makemake nei oe i ka ino o kela aupuni kahiko, nolaila oe e haalele nei i ke kula.
          K. Mai hoino hou mai oe ia'u!
          P. Aole paha he hoino. Ke wehewehe nei au i ka pono o ka naauao.
          Eia kekahi mea e maopopo ai ka pono o ka naauao. Ke koho nei na'lii i ka poe naauao i mau Luna, i mau kanaka kokua ma ka hoomalu ana i ka aina. Aole loa e noho kekahi i Lunaauhau, a i Kiaaina paha, ke ole ia i naauao.
          Eia hoi kekahi. Ua hanaia e na'lii i mau kanawai e hoolaha aku ai i ka naauao, a e hoomalu ai i na kula. E pili auanei