Ka Nonanona, Volume III, Number 11, 17 October 1843 — Page 54
54 KA NONANONA. (OKATOBA,
ma kona hale a me kona pa. Pomaikai Kohala i kana hana, aka, he poino i keia lehulehu e pili wale ana ia ia.
Augake 3, haalele maua ia Iole a iho i kai i Puakea e holo i Kona; holo maua maluna o na lio iloko o ka ua a me ka makani ikaika, aole nae poino; paa ko maua mau kino i na mamalu a me na koloka. A hiki maua i Puakea, malie iho la, a ike maua i kekahi haole pupule malaila, ua paa i ke kaula; o Neke kona inoa. Nana no e halihali i kekahi haole Beritania i make iloko o ka luapipi ma Maunakea mamua aku nei, halihali ia ia i Hilo. Haohao kekahi poe i keia pupule; manao lakou nana paha i pepehi i ua haole Beritania nei.
Holo makou mai Puakea aku a 23 hora pae iuka ma Kailua. He maikai no ka holo ana; hookahi wahi pilikia, oia hoi ma Kawaihae. Loaa ia makou ka mumuku malaila; me he powa la kona haule ana mauka mai, maluna o makou: he makani ino loa keia, mai puhi loa ia makou i kai loa i ka moana, a mai make ka waa i ka nui o na ale. I ka po, i ka hora 10 loaa ia makou keia pilikia, a i ka hora 12 o ka po pau ka ino. Eia ka pono ke holo ka waa malaila, o ka hoopili loa i ka aina; mai holo kaawale i kai. I ko'u lohe ana nui na waa i make i keia makani ino.
KAILUA.
Augake 4, hiki aku maua i Kailua; ano e ka helehelena o Kailua ia manawa; ua uliuli mai iuka a kai, no ka ua pinepine, a ua maikai ke nana'ku. Akahi no ka ua pinepine ma kela aina maloo. No ke aha la? No ka lua pele hou paha ma Maunaloa. Pela ka manao o Kauka Aneru, a ua oleloia he haole akamai ia i ka noonoo.
Ia mau la mai loa o Kuakini; ua wiwi loa kona kino, a ua nawaliwali loa. He mai hehee kona, aka, ua maha iho nei. I kona manao e make ana no, aole ola, a nolaila nui kona noonoo ia ia iho a me ka haipule i ke Akua.
I ka la 9 o Aug. ku ka Hooikaika malaila me ke Kuhina a me kekahi luna koa Beritania. Nana makou i keia moku e holo mai ana, a manao iho la makou, heaha ka hana a keia moku maanei? Ku ka moku, holo iuka ka waapa, o ke kani mai no ia o na pu. Heaha keia pu? Holo au i kai e ninau a ike iho la au i ka hae kahiko o Hawaii nei e kau ana iluna, a lohe koke makou ua hoihoiia mai ke aupuni. Mea e ka hauoli o makou! Me he mea la ua hala ka po a ua hiki mai ke ao. Nolaila noho no makou a i ka la noa, he halawai olioli a me ka hoomaikai i ke Akua, ko makou malaila. Maikai na olelo a'u i lohe ai ma ia halawai. Penei ka olelo a kekahi hoahanau noiau.
"Auhea oukou, e na makamaka, ua pomaikai kakou i ka hoihoiia mai o ke aupuni; mai paa kakou malalo o na haole a mai lilo kakou i poe kauwa hooluhi no lakou. Aka hoi, ua hoopakeleia kakou e ke Akua. A e hoonani aku kakou ia ia i ko kakou mea e pakele ai.
"Eia nae keia mea noonoo; pehea la e paa ai ke aupuni ma neia hope aku? He mea nui loa keia: no ka mea, e lilo hou auanei paha ke malama ole kakou. Pehea la e paa ai? Penei paha, o ka haalele o kakou i na mea ino a e hahai kakou i na hana maikai. E haalele i ka palaualelo a e hahai i kela hana keia hana e pono ai; e haalele i ka noho naaupo