Ka Nonanona, Volume III, Number 11, 17 October 1843 — Page 55

1843.) KA NONANONA. 55

a e imi nui i ka naauao; e haalele i na hana ino a pau a e hahai i na hana maikai. Alaila mahalo ko na aina e ia kakou, a makau hoi ia kakou, a o ka maluhia no ia. Aole paha e hiki i na haole ke kaili ae i ko kakou aina, ke malama mai ke Akua ia kakou."
          Pono keia olelo, a pela no hoi na olelo a pau ma kela halawai. Hoomaikai aku ke Kuhina a me Kuakini i ke Akua no kona lokomaikai.
          Maikai ka noho ana o na hoahanau ma Kailua i ko'u ike aku; piha loa ka luakini i ka la Sabati; ikaika ke kumu a me na luna i ka ka Haku hana.
          Nana wau i ka halawai o ka poe Katolika malaila; aole nui loa ka poe hele ilaila, he wahi anaina uuku wale no i ko'u ike ana. He nui mamua i kuu lohe, a i keia wa, ua emi.
          Ua maopopo ka ke Akua hana ma Kailua; nui ka poe haipule, a ua maluhia ka noho ana.


Halaula, Kohala; Hawaii; Iul. 12, 1843.

NO KA POPOKI A ME KA ILIO.

            Elua o'u manao. O ka mua; ua hewa no ka ilio; aka, o ka popoki, ua pono ia i ko'u manao. E hai aku au ia oe i kahi pono iki i loaa ia'u, o ka popoki. Ike au he mea e pau ai kekahi pilikia o ke aupuni, aia o ka poalua. Ina e kahu na luna me na kanaka i ka ai a manao e lawe ma Kona, ke ku ke lii malaila; lawe na kanaka i Mahukona, o ko makou kahakai ia e lawe ai a waiho. Liuliu loa ke kali ana, aole puka mai o ka moku e alo ai, hele a puka ka moku, pau paha i ka iole. Pela paha ke kapa auhau a ka luna Poalua. Ina e ola ka popoki, oia ka mea e pau ai ka pilikia; ke ola na popoki maikai a pau o Hawaii nei a pau loa.
          Eia keia; penei paha e make ai ka popoki; ina paha e ike ia ka ai ana a ka popoki i ka moa paha, i ka palahu paha, pono io no ke make. Aka hoi, aole pela ka nui o na popoki, aole pono ke uku, aole no hoi e make. Pono ke ola, aka, o ka ilio ea, ua ino loa no ia, nui na mea i moku i ka ilio au i ike ai a i lohe ai, a o ka popoki, aole au i ike i kona alualu mai e nahu. Aka o na ilio, ua maopopo loa i ko'u maka ka ka ilio hana ino, o na ilio ma Waimea a na Baniolo ko'u ike ana.
          Eia keia. Awaawa anei keia? pono ole anei?
          E ka Nonanona, pono anei ia oe ke hoopuka, aole anei?
          Eia keia, e na haumana o Lahainaluna, aloha oukou: na punahele a ko Amerika poe kanaka, kahi a ka la i hiki mai ai mamua, kahi maikai e paa ai ka pouli o ko kakou naaupo, e ko Hawaii nei.
          Mahalo kuu naau ia oukou e noho la, e huli la i ka piko pono o ka ike, o ka oukou hana, aole e loaa i ka poe huli i ka Pope, e hele ana lakou i ka pouli ihi loa, i ke ahi. Ua pau aku la.
Na KAILIHALAPIA.

O LAKIO KAHUI MA.

            Owai ia, o Lakio Kahui? He hoahanau elemakule no Waioli, Kauai. Aia no ia ma Makao i keia manawa. Pehea ia e hiki aku ai ilaila? Penei; holo aku ia me kana kaikamahine a me na kanaka e ae ehiku ma ka waa pa ma Kauai; aole akaka ia'u ko lakou mea e holo ai, a puhiia lakou e ka makani a lilo loa i ka moana ma ke komohana; nalowale loa ka aina a aea wale lakou a 300 mile mai ia nei aku. Pilikia maoli lakou i ka ai ole a me ka wai ole, a