Ka Nonanona, Volume III, Number 11, 17 October 1843 — Page 56

56 KA NONANONA. (OKATOBA,

manao lakou e make koke ana no ma ka moana. Ia manawa ike lakou i kekahi moku nui e holo ana, o ka Hopewell, ka inoa o keia moku; a o Engles ka inoa o kona Kapena. Ma Oahu nei keia moku, a holo aku i Kina e kalepa i ka makahiki 1842. Ee iho la lakou a pau maluna o keia moku a malama lokomaikai ke Kapena ia lakou a hiki aku ma Makao.
          Hookipa aloha na misionari malaila ia lakou, a oluolu ko lakou noho ana. Aka, ua kokoke pau lakou i ka make: ehiku i make, a elua i koe o Kahui a me kahi kaikamahine. Aloha ino lakou? Aole loaa ia'u na inoa o ka poe i make.
          Olelo mai na misionari malaila, ua maikai ka noho ana o Kahui; he noho haipule, a me ka haahaa a me ke akahai. Loaa ia ia malaila kekahi Kauoha hou no nei aku, a nui kona heluhelu i ua buke nei. Nolaila aloha lakou ia ia me ka mahalo i ka hana a ke Akua iloko ona. Manao lakou he hoahanau oiaio ia.
          Nui ka makemake o Kahui, a me ke kaikamahine e hoi mai i ko laua w ahi; aole nae i hiki ma ke Kialua i ku mai nei i keia mau la, no ka pilikia. Aole hoi akaka ka manawa e hoi mai ai; he mai ko Kahui, he kunu, a ua wiwi loa kona kino.
          He pepa berita ko Kahui me ka inoa o Alekanedero, ke kahu ekalesia ma Waioli mamua.

Make.

            Make iho nei i ka la 11, o keia malama, o Sara Leslie, ke kaikamahine a ke Kahuna pule, i noho iki ma Oahu nei mamua aku nei, a ua hoi aku i Oregona. Aloha ino ka makuakane! ua make kana wahine, a mahope mai, make kana mau kaikamahine elua iloko o ka muliwai, a o keia kaikamahine hoi, ua hele loa aku. Aloha ino hoi ke kaikaina! eia no ia me makou, he nui kona uwe me ka eha o kona naau, a me ka mehameha. Kokoke paha hoi hou mai ka makuakane.
          I ko makou ike ana, ua makaukau o Sara e halawai me ka Haku. I kona la i make ai, lana loa kona manao ia ia; he nui kona kamailio; o kona makemake no ia o ke kamailio me makou, makaala loa ia, aole nanea iki. Eia ke ano o kana olelo, o kona mihi i kona hewa a me kona aloha ia Iesu; i mai ia, "he hoahanau no au, aka, he ino ko'u noho ana; aole pono iki; ua ike au i kuu hewa he ino loa. Aka, nui kuu aloha ia Iesu. O ko'u mea nani loa ia. Aole o'u makemake e ola ma keia ao; makemake au e hele aku a noho pu me ka Haku, i ike maka au ia ia." Paipai oia ia makou e kamailio ai me ia no Iesu; aole mea e. A oki ka makou olelo, paipai hou mai kela, mai hooki i ka olelo no ka Haku. Pela wale no a pau kona leo a lele aku ka Uhane. Pomaikai io ka poe make iloko o ka Haku; o ko lakou make, o ko lakou ola no ia, aole make hou aku.

HE MEA HOAKAKA I NA MISIONARI AMERIKA.

            Ua paa ka buke MOOLELO HAWAII ma ka olelo Beritania, a ua makaukau e kuaiia aku. Eia ma Honolulu nei kekahi, aia ma Lahainaluna kekahi. O na misionari makemake i keia buke e pono ke kii koke mai, o pau e i ka lilo. Kokoke paha pau.

PULE HOOMAU.

            He halawai loa ma Kaneohe i keia mau la iho nei; aia ilaila o Bihopa laua me L. Kamika e kokua ana ia Pareka. I kuu lohe ana, ua maikai ka hana; nui ka poe hele mai, aole nae pilikia loa ka hale pule. Lana ka manao o na hoahanau; ikaika maoli ka pule a kekahi poe, a ua mahuahua ka makemake i ke Akua. E hoonaniia ke Akua no kona lokomaikai.

KA BIHOPA KATOLIKA.

            Ua noho iki keia Bihopa ma Oahu nei mamua a hoi aku i Farani; loaa ia ia malaila ka moku e hoi mai ai maanei, a ua holo mai, aole kala; loihi loa ka nalowale ana, aole ikea, aole hoi i lohea, nolaila ua manaoia, ua poho loa paha ka moku iloko o ka moana.

LUNA HOU.

            Ua hiki mai i Honolulu nei kekahi luna hou a he luna nui no Amerikahuipuia; o George Brown kona inoa. I ka la 16 o Okatopa nei kona puka ana mai.

Na LIMAIKAIKA e hoopuka'ku.