Ka Nonanona, Volume III, Number 13, 14 November 1843 — Page 62

62 KA NONANONA. (NOVEMABA,

paa loa mai i ka noho pu me ka oluolu loa iwaena o ke aupuni o ko Hawaii Pae Aina, a me ko ko'u aina, i ke aloha i hoomakaia mamua, a e hooulu i ke aloha pu ana a me ka lokomaikai ma na mea a pau i hiki ia'u ke hana.
                Alaila, olelo aku la ka Moi, penei!
                "Ua olioli nui au i kuu lohe ana na ke Kuhina mai i kou hiki ana mai maanei a ua oluolu au i ka ae aku ia oe ka Luna nui o Amerika Huipuia. Ua mahalo nuiia kela aupuni e a'u, a o ko laila mau kanaka, ua imi nui lakou e naauao ai kou mau kanaka, a e hoohuli ai hoi ma ka aoao Kristiano.
                Ke aloha aku nei au ia oe no na hua oluolu au i olelo mai nei, a ke manao nei au, aole loa e mokuahana iwaena o ko'u Aupuni a me ke Aupuni o kou aina. E hai aku oe i kou Aupuni, ua paa loa ko'u manao paa, e lilo i na kanaka o Amerika na pono a pau o na aina i hoopunahele loa ia."
                Ke hoakaka aku nei hoi makou ma ke akea, ua koho ke alii ia G. P. Judd a ua hoolilo ia ia ma ka oihana kakauolelo no ke aupuni no ko na aina e. O na hana aupuni o ka na aina e a pau loa i manaoia e hana me ke aupuni o ka Moi o Hawaii nei, e hana ia no ia e ia a ma ona la.

OLELO KUKALA.

                I na Kiaaina hoolohe, a me na Lunakanawai a me na kanaka a pau o ko Hawaii nei Pae Aina.
                E lohe pono oukou ea! No ka mea, ua wawa wale ia iloko o ko maua mau pepeiao, ka hihia pinepine a me na mokuahana pono ole iwaena o ka poe Pope a me ka poe kue i ka Pope ma na wahi kuaaina o kela Pae Mokupuni, he mau hihia mole loa ke ninaninau aku, a me ka pono ole i ka hooponopono aku a oluolu pu na aoao a elua: a no ka mea, ua puka mai ka nui o keia mau hihia noloko mai o na kula a me na kahua hale pule; nolaila, ke

Hoolaha aku nei maua.

                1. Ua minamina maua i ka lohe ana i keia mau hihia, a ke kauoha maoli aku nei maua i na mea a pau loa e waiho i ka hoopaapaa, a e noho malie, a me ka malu.
                2. O ka oihana pule kue i ka Pope oia ka aoao pule o ke aupuni o ko Hawaii nei pae aina, aka hoi, o ko ke aupuni manao ua like pu me ka olelo a ke kumukanawai a me na kanawai, e ae aku i na aoao pule Kristiano a pau loa ke hana ia, a e hoomalu like i na mea a pau ma ka lakou pule ana, ke malama lakou i na kanawai a me ka hoolohe pono mai hoi, a o kela hana a o keia hana o kekahi aoao, ua koho iki ma ke ano hoomaau a me ka hooke aku, oia ka maua e hoole nei. Mai keakeaia kekahi o ko makou mau kanaka pono no ko lakou aoao pule.
                3. Aia hoi mai na Luna, alaila hana hou i na kanawai, pela ko maua manao; aka, i keia wa e malama oukou i na kanawai kula, a me na kanawai mare, a me na kanawai hoi a pau loa o ka aina a puni.
                4. No ka powehiwehi o ke kanawai ma ke koho ana i na kahua hale kula e kukuluia e ke Aupuni, nolaila e pono ke ae like na konohiki, a me na Lunakula i keia wa no na kahua hale, aka, i holo ole ko lakou ae like, alaila na ke Kahukula e hooholo.