Ka Nonanona, Volume III, Number 13, 14 November 1843 — Page 63

1843.) KA NONANONA. 63

                5. Aole i olelo na kanawai e pono ke kukuluia na halepule ma ka hana aupuni, aole hoi kanawai no ia mau hale, a me na kahua hale pule; na na kanaka wale no e kokua i keia hana, aka, mai kukuluia ka halepule mai keia hope aku ma ka aina o kekahi, ke ae ole mai kekahi alii nui ka mea nana ponoi ka aina
                Hoopaaia ma Lahaina i keia la 28 Okatoba 1843.
KAMEHAMEHA III.
KEKAULUOHI.

Wailuku, Maui, Okatoba 12, 1843.
HE KANIKAU ALOHA NO BATIMEA, KO MAKOU HOAHANAU I MAKA AKU LA.

Aloha nui oe e Batimea,
Ke koa nui ikaika o Iesu,
I hele aku la e ku imua o Iehova,
Ka Makua mau loa,
Ke Alii nona na wahi a pau loa,
Ike oe i kona poe koa,
A me kona umi tausani hiki ole ke helu aku;
Lohe oe i ka leo o ka Violaumi,
A me ka Zila e hone ana,
Na mea nani kau e ike la,
Ike oe i na kio wai e kulani hakoi;
A me na wai o Mauoni,
Haule ke kino i ka honua nei,
Pii ka uhane i ka lani,
A noho pu me Aberahama ma,
Ma kona aina maikai loa.
Ike oe ia Ielusarema hou,
A me Siona o napanapa,
I ke kulanakauhale au i iini ai.
Pau kuu ai pu ana me kau wahine,
I na hulilau o keia ao,
Ai oe ma ka papaaina,
A ke kamokoa nui ikaika loa:
Inu oe i ka wai o Kalewali,
Ai oe i ka ai o Pieke mauna,
Pau kou hoohuli ana i ka poe hookuli,
Ke lele hoolakalai nei oia,
Ma ka imo o ka lani;
E hea mai ana ia kakou,
'E hele mai oukou,"
"E hele mai oukou,
Maloko o ke ao polohiwa."
E ko Hawaii, e ala, a hahai aku ia ia,
Oia ke kaimana maikai loa,
Mai hoohewahewa i ke ala,
Ke ike la oia ia Paredaiso mau,
A me kona Alii Iehova ka Moi,
A me kona mau pitimana he lehulehu,
A me kona pa he kula maemae,
Pau kou lohe ana i na hoa o keia ao,
Aia oe ma kahi hiluhilu loa,
Kahi make ole i na miliona dala ewalu haneri,
A me na miliona lei gula he kanaiwamiliona.
He hilu oe mai keia kulanakauhale aku,
Nani kou hele ana i ke ala hele loa,
Hele paa ole i na kaula he nui ke paa aku;
Pela ka hele ana o ka mea kama,
Ike aku la oe i na kini lehu e paana i ke aloha,
E haana me na kimepola kani olioli,
E kapuo ana i ke Alii ia Iehova,
Aahu oe i ke kapa i kopipiia i ka mula a me ka aloe.
O ke ala kumu kuai nui kau e honi la,
Ua ai oe i ka maunu a Iehova,
Lou oe i kana makau,
Lilo oe i ka lani,
Uwe ko ka honua ia oe.
E Batimea ka mea aloha i lawe ia,
Pau kou lonolono wa ana i keia ao,
O ka ulono lako wale mai kau e imi la;
Imi oe i ka mea laha ole,
Loaa Iehova ia oe, na ka manao i imi,
A me kou mau hanauna he lehulehu.
Pau ka pouli o ka po,
Hele oe i ke ao kalae,
Paweo ka maka ia Apoluono,
Oluolu kanaka ia Gaberiela ma,
Pela ka hele ana o ke koa ikaika,
E ka mea aloha, e Batimea,
O kou hoa aloha no o Gelina,
Hele oe me ka mama,
Noho ia me ke kaumaha,
Lana kona manao,
I kou hele pomaikai,
Pau ka luhi ia oe,
Pau ka eha-maha loa,
Pau ia Iesu.
Na'u na K. H. KALEOHANO.