Ka Nonanona, Volume III, Number 13, 14 November 1843 — Page 58

58 KA NONANONA. (NOVEMABA,

PALAPALA NA KEKAHI KUMU KULA I PAA I KA HAO MA KAILUA HAWAII.

KAILUA; Okatoba 23: 1843.
                Aloha oe; Ua paa wau i ka hao. Ua hoohewa na luna ia'u, o Keaweamahi a o Naheana. Aole i hookolokolo ke Alii. Ae wale no ke alii e paa i ka hao. Paa wau i ke kaula, na lima ma ke kua. Paa na wawae. Maule wau me ka eha nui; po, paa i ka hao. Ke paa nei au i ke kahihi wale; aole ma ka hewa io.
                Aloha oe me ko kaua mau hoahanau. Ke noho nei au me ka pule aku i ke Akua, ma ka hale paa hao. I aku la au ia lakou me ke alii, e hoopii wau ia Kamehameha III. Ukiuki loa lakou ia'u, kuu paa no ia i ke kaula. Aloha oe, SETEPANO.

Kailua, hale paa hao
                E nana kakou i keia palapala. Aia ma ka hale paa hao kekahi kanaka.
                Heaha kona hihia?—Heaha la?
                Aole i loaa e aihue ana.
                Aole i loaa e moe kolohe ana.
                Aole i loaa e haihai ana i kekahi kanawai o Hawaii nei!
                Eia wale no kana, kapa ka makai ua hele o Setepano i ka po, ua hele paha, aole paha. Auhea ke kanawai papa i ka hele i ka po, ke kolohe ole?
                Eia kekahi, aole i loaa i ka makai ma kahi e, maloko o kona hale no.
                Aole anei kela he hopu hewa?
                Oia wale no ke kumu o ka hihia o Setepano a makou i lohe ai. Hookolokolo o Naheana, a olelo Setepano, "e hoopii wau ia Kamehameha III." He hua hewa paha kela. Kuhi makou ua pono; pela ka mea manao, ua hoohewa wale ia me ka hihia ole. I mai ke kanawai penei; "Aka ina hai aku ke kanaka hewa i kona manao, e hoopii i na lunakanawai kiekie, ua pono no ia hoopii ana, Aole e paa kela kanaka, e hoopii no."
                Oia ka Setepano; manao oia ua hoopili me ai o Naheana mamuli o Keaweamahi ka lunakanawai i paonioni me Setepano mamua. Olelo Setepano, e hoopii ia Kamehameha III, e like me ke kanawai, (aoao 13.) Eia kekahi ninau. Ina e hiki ole i ko Hawaii poe e hoopii aku imua o na'lii kiekie a me na lunakanawai kiekie, alaila pehea la e pono ai ka mea a ka lunakanawai e hookaumaha no ka huhu wale?
                Eia kekahi ninau? Mahea na lunakanawai kiekie, a ke kanawai i kuhikuhi nei? Owai ko lakou inoa?
Na Mahalo i ke kanawai.
                Eia kekahi mau lunakanawai Kiekie i maopopo, o Kamehameha III, laua o Kekauluohi ke Kuhina, a ina i manao o Setepano e hoopii, pono no, ia laua no e hoopii aku ai. E palapala pololei mai i ke Kuhina, a nana e hoakaka i na luna kiekie e ae.
                Make hewa loa ka huhu o Naheana ma ia Setepano, no kona manao hoopii. Heaha la ka hewa o ka hoopii? Ua ku pono loa ia ke Kumu Kanawai (aoao 12, 13.) He mea ia e pono ai ka mea pilikia, a me ka hoohewa wale ia e na lunakanawai liilii.
                Pono no e hookolokolo hou i kela pilikia, a ina i ku ka hewa i kela mau lunakanawai, a maopopo ua hoohewa wale laua ia Setepano, alaila, o laua ke paa i ka hao a e hoopauia ko laua noho luna ana. Ina pela makau na lunakanawai a me na lunaauhau a pau i ka hoohewa wale i ka mea hewa ole. Ina nae, ua pono ka laua hana, ua pono no.

NA MANUWA.

                Ua holo aku i keia mau la, na manuwa Amerika elua; O ka Cyane, Cap. Striblin g, ua holo i Paniolo i ka la 6; a o ka Erie. Com. Dallas, ua holo i Bolabola i ka la 8.

Na LIMAIKAIKA e hoopuka'ku.