Ka Nonanona, Volume III, Number 14, 28 November 1843 — Page 67

1843.) KA NONANONA. 67

            A pehea oukou, e na hoahanau? Ua akaka anei ia oukou keia ano o ka naau kahiko, i hoikeia anei? Ina ua akaka ole ia oukou ka helehelena o ka noho ana mamuli o ka naau makapo, oia hoi, mamuli o ka naau kahiko, pehea oukou? Heaha ko oukou ano! He poe kanaka oiaio anei oukou no ke Akua? Aole, aole loa oukou he poe Kristiano io, ke akaka ole ia oukou ke ano o ko ke kanaka aoao; aia no oukou iloko o ka pouli o ka naau hewa, a hiki i keia manawa. E ala koke mai oukou, a nana iho iloko o ko oukou naau, o paa loa oukou auanei iloko o ka naaupo, a iloko o ka poeleele o ka naau kahiko, a make oukou iloko olaila. A. TATINA.

HE MANAO HOAKAKA.

            E ka Nonanona e, aloha oe, ke hooili aku nei au ia oe i ka'u wahi ukana, nau e hali aku i na pepeiao o ka poe Kahukula, a me na Kumu ao no hoi. Penei, aole e ae wale mai kekahi o na kumu ao me ka loaa ole mai o ka palapala a kekahi o na Kahukula mai; aole loa e ae aku kekahi o na Luna Waiwai i ko ke aupuni waiwai i uku no kona ae ana mai ma kekahi o na moku o ke aupuni, no ia kumu ao no e uku i ke Kapena moku i kona waiwai ponoi, he dala maoli, aka, ina i loaa mai he palapala na ke Kahukula mai o ia wahi i ka poe Luna Waiwai o ke Aupuni, alaila, o kona uku no ma ke ao kula ana a ka mea e uku ai i ka moku no kona holo ana mai a me ka hoi ana aku.
          Eia ke kumu o keia manao o na Luna Waiwai o ke Aupuni: no ka ae mai o na kumu, a ike ole na Kahukula i ka mea e uku ai i ka moku, a hiki ole i na Kahukula ke hooemi iho. A pela no hoi na Luna Waiwai o ke aupuni, no ka ike ole i ka inoa o ke Kahukula na keia kumu, a me ke ano maikai o ke kumu ao. E hana naauao na Kahukula o kela Mokupuni keia Mokupuni, mai hana hawawa kakou.
          Ua kauoha ia mai nei au e na Luna Waiwai o ke Aupuni e hai aku ia oukou, o ka la mua o Dekemaba o keia makahiki no, oia ka wa e hookoia ai keia mau olelo. Ia'u nae na palapala a na Kahukula e hoopii mai ai no na kumu ao i ee mai ma na moku o ke aupuni, a na'u hoi e hai aku i kekahi o na Luna Waiwai o ke Aupuni.
G. P. JUDD, & CO,
Honelulu, No vemaba 2, 1843.
G. L. KAPEAU; Kakauolelo e hoolaha aku.

HALE WELA I KE AHI.

Koloa, Novemaba 7; 1843.
            Aloha olua e Limaikaika ma:
          Ke hai aku nei maua i ko makou pilikia, a me ka poino nui. Ua wela i ke ahi ko makou hale, i puhi kolohe ia e ke kanaka o Kanehoa. O kona hoomau hala ia'u ke kumu o kona puhi ana ia makou i ke ahi, no kuu ohi ana i na hapawalu ekolu no ka noho ana i na la paahao; oia ke kumu o ko keia kanaka pepehi ana ia makou i ke ahi. I ka po a aumoe o ka la eono o keia hebedoma ka loaa ana o keia poino ia makou. Penei ka hana ana, ma kahi o Kanehoa ka noho ana o keia kanaka lokoino, a aumoe, iho mai la a Maulili, noho e ka i ke ahi a a, komo mai la i ko makou pa, a ma ke kua o ko maua hale kokoke ma ko'u poo kahi i puhi mai ai; i luna maua o ka moe me ke keiki kane a maua, ua pau loa makou i ka hiamoe. A lohe au mai ka hiamoe nui i ka halulu ana o ke ahi, hikilele au me ke kahea me ka leo nui, "pau kakou i ke ahi e!" O ka hikilele ae la no ia o ko loko, a pau i ka puka i waho."
          O Punia a me ke keiki kane a maua ke poino aku i ke ahi. Penei ko laua pakele ana, o ka nui o ka aahu kapa akahi, o ke kahea ana me ka leo nui, "o maua ka ke make ana i ke ahi e!"
          A lohe au, komo hou aku la au iloko a wela kuu poo, o ka lauoho wale no nae a me kuu kua, aole nae wela loa. A ku au ma kekahi aoao ma waho o ka puka, aole e hiki ke komo iloko, ua puni oloko i ka lapalapa o ke ahi, a o Punia me ke keiki ua noho ilalo me ka manao aole e pakele.