Ka Nonanona, Volume III, Number 15, 12 December 1843 — Page 17
1843.) KA NONANONA. 17
nei no hoi ka lakou hana ana mahope o lakou."
"He mea manao nui ia imua o Iehova, ka make ana o kona poe haipule." Ua pau ko lakou luhi, a me ka lakou hana ana ma ka honua. Ua hele aku lakou mai na mea i hana pinepineia ma keia ola ana. Ua hoomahaia lakou i ko lakou kaumaha. Ua hiamoe lakou iloko o Iesu. Ua komo lakou iloko o ko lakou hooilina mau loa. Ua noho mau lakou pu me ka Haku ma kahi hemolele, a kahi oluolu e mahuahua mau loa ana. A i ko lakou hoomaha ana, "ke hahai nei ka lakou hana ana mahope o lakou." Ua make lakou, ke olelo nei no nae, ua lawe ia'ku lakou i kahi okoa e noho ai, a e launa pu me na hoanoho ano hemolele loa; aka, ma kekahi mau mea, he oiaio no, ke noho nei lakou mawaena konu o na kanaka. Pela ma ka lakou palapala; a ma ko lakou hele pololei, a me ka hemolele ana; a ma ko lakou hooikaika pinepine ana i na hoalauna o lakou e huli mai ma ka pono; a ma na hana e ae a lakou i hana'i, i mea e pono ai, a e ola'i na kanaka. Pela kekahi poe kahiko i olelo ia ma ka ke Akua olelo, o Aberahama ma, o Mose ma, o Isaia ma, a o Paulo ma. Pela no hoi kekahi poe ma Beritania a me Amerika, o Buniana ma, o Baketera ma, a me Witefiela ma; o Davida ma, o Elioka ma, a me Beraineda ma. Aole e pau ke ola ana o keia poe, a me na mea like e ae he lehulehu loa, aole e pau ka hua o ka lakou hana ana e pono ai kanaka, a pau ka lakou palapala, a me ka palapala kahi i kakau ia ka lakou hana ana i ka puhiia i ke ahi e aa ana i na mea a pau o ka honua. A pela ka noho ana o kekahi poe ilihune. Aole paha o lakou akamai i ka palapala. Aole ikeia lakou ma kahi akea. Ano, ua nalo lakou iloko o ka luakupapau. Aole pohaku maikai i kukuluia ma ko lakou wahi i moe ai. Aka, o ko lakou kamailio ana ma ka pono mamua, o ka lakou pule ikaika i ko lakou noho ana, o ka nui o ka lakou hana ana me ko lakou hele hemolele ana, oia na mea i olelo ai iloko o ka pepeiao o ka poe ola ana. Nolaila he pono paha ke hoakaka aku i ke ano maikai o ka poe haipule io, i ko lakou make ana i mea e pono ai ka poe e ola ana, a i mea e nani ai ke Akua nana lakou i hoopuka mai loko mai o ka pouli, a i hookomo iloko o ka malamalama kupaianaha. Pela ka hana a ka poe kahiko i oleloia ma ka ke Akua olelo. A pela no hoi ka hana a ka poe naauao mai ka wa kahiko loa mai.
Ua kupu iho iloko o'u keia mau manao i ko'u lohe ana i ka malama o Sepatemaba, i ka hiamoe ana iloko o ka make o ko'u hoahanau aloha, a me ko'u hoailona ma ka euanelio, o Batimea Lalama Puaaiki. He mea oluolu loa ia'u ka holo ana i Wailuku e uwe pu me ka poe uwe ana i ka wa i kanuia'i oia, a e hoike aku, ma kona lua kupapau, i ke ano maikai o ko'u hoahanau. Aka, aole au hele malaila. I ko'u hele ana i Kula e hana i ka ka Haku hana, aole loaa mai ia'u ka palapala a Kalaka i hoouna mai i Makawao nei e hoakaka ana i ka make ana o Batimea, a e noi ana ia'u, no ka'u ike pinepine ia ia, a no ko'u noho liuliu pu me ia, e hele ilaila, a e hai aku i ka olelo a ke Akua ma kona hale kupapau. No ia mea, aole au lohe pono i kona hele ana a nalo kona kino kupapau i ka lua. Hookahi mea i koe ia'u, o ka hoakaka, ma ka pepa, i na mea a'u i ke ai, a i lohe ai hoi no keia hoahanau aloha, no ua mea la i kapaia, o ke kahuna pule makapo o Hawai nei. Na GELINA.
HE MELE NO KA HOI HOU MAI O KA EA O KA AINA.
E mele me ka hoomaikai,
Hauoli pu kakou a pau,
Ka ea o Hawaii nei,
Ua lilo a ua hoi mai.
Mai pio ko Hawaii nei,
Mai noho kauwa hoi na lii,
I keia wa, ua hoi hou mai,
Ka ea o ka aina nei.
Aloha ko kakou moi,
Aloha hoi na lii a pau,
E ola me ka pomaikai,
Ke aupuni me ka nani mau.
Aloha ke lii kaua hoi,
E kau ka lei ma kona poo,
Ka haole holo kiki mai,
E hoopakele ia kakou.
E ke Akua nani e,
He kamahao kau hana nei,
Ia oe no ka hoomaikai,
No keia hae i kau mai nei.