Ka Nonanona, Volume III, Number 17, 9 January 1844 — Page 79

1844) KA NONANONA. 79

hiki ilaila ua loaa ia ia he mai nui. Ua mahuahua kona eha ma ka maka, a he mai e ae kekahi; no ia mea, aole hiki ia ia ke hele imua o na lii e hula e like me mamua; aole hiki ia ia ke puka iwaho; ua noho ia ma kahi mehameha, ma kahi pouli, aneane ia i make i ka malama ole ia. Hookahi mea wale no--o ke Akua ana i ike ole ai--i manao mai ia ia me ka minamina i kona make ana, a me ka manao paa e hoopakele ia ia i ka upena a Satana. Ia manawa, ua lohe o Honolii, aia o Puaaiki, ke kanaka hula o na lii, e moe ana ma kona wahi e moe ai, a kokoke ia i ka make. O Honolii nei, he kanaka Hawaii ia i holo i Amerika, a aoia oia ma ke kula nui malaila. Oia kekahi o ko Hawaii poe i aoia ma Amerika, i ku paa ma ka pono. Ua lana ko'u manao nona. Malama ua hookipa o Honolii ia Batimea ma ka lani! A ike o Honolii ia Puaaiki e moe ana me ka mai nui, aneane popilikia loa, hu ae la kona aloha, a kuhikuhi ia ia Iesu i ke kahuna lapaau i ka mea hiki ke hookaakaa mai la i kona mau maka, a e hoola mai i kona mai a pau loa. A lohe ae la Puaaiki i ua mea hou la, ala koke ia iluna, olelo ae la ia me ka leo ikaika, "Heaha kau i hai mai ia'u?" Hoakaka hou o Honolii, o Iesu Kristo, oia ke kahuna lapaau oiaio, nana e lapaau mai i ka uhane o ka poe i hele io na la. Ae koke o Puaaiki e hele a lohe hou nona. A maha iki kona mai, a hiki ia ia ke kolo mawaho o ka hale, ua hele pu ia me Honolii i ka luakini o Iehova, malaila lohe mua ia "i ka mea maikai e olioli nui ai e lilo ana no na kanaka a pau." Heaha la ka manao o ua makapo nei, i kona lohe mua ana i keia mau mea kupaianaha, ano e; i kona lohe ana i ka mea i hele mai "e imi a e hoola i ka mea i nalo?" "i ka mea i hali i ko kakou hewa ma kona kino iho ma ka laau, i haalele kakou i ka hewa, a i noho ma ka pono?" Owai ka mea ike?

KANIKAU NO TAHIKI.

1 Ko Tahiki Pae Aaina
Ua haule kou hae,
E ka pae aina Borabora,
Aloha ino, ua lilo.

2 Kamahiole kalali,
Ka pahi kaua ua oi,
Ko Farani Emarala,
Me kona lima ikaika.

3 Kaili no ua lilo
Ko ka wahine pae aina:
Huki ia ko Farani Hae,
O ko ke Aupuni lanakila.

4 Pomare no ke Lii,
Ua lilo kona aina;
Haule kona hae ilalo,
Noho wale, a kuewa no.

5 Aloha ka pae aina Tahiki,
Lilo kona noho alii:
Ko Borabora Kupuna aloha,
Kuakahi, o kona kualua.

6 Ko Borabora lahuikanaka,
Helelei no, a nalowale:
Akahi no ke aloha
O keia poe kanaka.

7 Owai la ka limaikaika?
E kukulu i ko Borabora,
E ka Pae aina ua make,
E ka Lanakila Mana.
G. L. KAPEAU.

HE KANIKAU ALOHA NO KAPELA KEKAHI HAUMANA O KE KULANUI I MAKE AKU LA.

E Kapela e, ko makou hoa aloha,
Ka mea i hele aku la e ku imua o Iehova,
Ke kani hauoli nei makou nou.
Ke lele nei na ao a me na po,
Ke ike la oe i ka mea hiluhilu,
Ka mea a kakou i lohe ai.