Ka Nonanona, Volume III, Number 17, 9 January 1844 — Page 80

80 KA NONANONA. (IANUARI,

Oia mau mea kau e ike la.
Ke noho nei makou iloko o na pilikia,
A me na poino a pau o keia ao.
Pau kou ike ana i na luhi a me na mai.
Pau hoi kou hele ana i o ia nei.
Pau hoi kau mau hana a pau,
A ke ku nei oe imua o ka Moi.
E hookani ana ho oe me ka olioli,
I olioli pu ai na puali o ka lani.
E Kapela e, he u a he aloha ia oe,
Ua kani hauoli makau a pau,
A ua kani hauoli na manu liilii.
Na mea no hoi a pau o ka waonahele,
Ka pua ala o keia kihapai.
Nani hoi kou hele ana me ka olioli.
E oli ana oe me na Serabima.
Hoano ko Ziona puu;
Kahi au e noho la me ka olioli,
Aole mea pani i kou hakahaka.
E Kapela e, ko makou hoahele.
Ke imi nei makou ia oe iloko o ka ululehua o Panaewa;
Aole oe i loaa ia makou.
Imi aku la makou ia oe ma ka M. Halekela
Aole no oe i loaa ia makou malaila.
Imi hou aku makou ma ka M. Tenerife;
Aole no hoi oe olaila.
Imi aku no makou ma Palesetina;
Aole hoi oe maloko o na ululaau.
E Kapela, ko makou hoa nei,
Aia ka oe ua pii iluna e noho ai,
Me ke Alii ikaika o na hoa.
E hookani oe me ka Lira,
A e oli hoi me ke Kimebala kani,
A e hula hoi oe ka Violaumi;
I olioli ai na koa o kou Alii,
I lanakila ai oe a i ka lanakila.
Auwe makou nei kou mau hoa,
E noho ana iloko o na pilikia.
E Kapela e, nani kou hele ana,
I ke ala ula a Kanlaoa.
A komo aku la oe i Ierusalema,
Ke kulanakauhale alii;
A maha mau me ka pomaikai,
Me na hoa o Iesu.

KA AWA.

                Aloha oe e ka Nonanona.
                He wahi ninau ko'u ia oe. Eia iloko o na mea ona. Ke olelo pinepine mai nei oe i ka haalele ana o na'lii a me kekahi poe he nui no, i na mea ona, a ua hauoli makou ilaila. No ka pono i hauoli ai makou, no ka malu. A pehea la ka awa? I kuu ike ana, aole ona ka rama, a me ka barani, a me na mea a pau loa, aohe ona e like me ka awa. O ka mea inu awa, ua ona ia a ao ka po, a po ke ao. He mea nui ia makou i keia manawa e kanu i ka awa, a e inu i ka awa, a ua olelo ia na ke Alii ma a me na'lii i haalele ai i na mea ona. Nolaila ea, mai kaena mai oe o ala mai kela uhane haukae, a hilahila iho la kaua. Na'u na WAIHUIHUI o Kauai.

                Auhea oe e Kawaihuihui;
                Heaha la keia mea au i ninau nei? Ke haohao nei kuu manao. Me he mea la, ua olelo kekahi alii o Kauai i na kanaka e kanu awa, a ua inu awa kekahi poe. He oiaio anei keia? Ina he oiaio, ea, e hai mai oe i ka inoa o kela alii, e paiia ma ka Nonanona, i hilahila ia, a i lohe na kanaka a pau o Hawaii nei i kona hewa.
                Malama paha, ua kanu i wahi awa, i laau mai. Pela kekahi poe; aka, ea, he mea hoopunipuni loa keia: aole no ka mai ka awa, no ka makemake i ka ona. Oia maali no. Ua lohe au i kekahi alii ua mahuna kona ili. Pono anei ia. Aole loa he pono.

Ka malama 2.         FEB. 1844.              O kona mau la 29.

                                                                La.           h.             m.
                Mahina poepoe,                   4              8              43 K.
                Mahina hapaha hope,         11            5              21 K.
                Mahina hou,                         18            8              46 K.
                Mahina hapaha mua,           26            9              58 K.

Na LIMAIKAIKA e hoopuka'ku.