Ka Nonanona, Volume III, Number 18, 23 January 1844 — Page 81

KA NONANONA.

"E ka mea hiamoe, e hele oe i ka nonanona, e nana i kona aoao a e hoonaauao iho." Solomona.

Buke 3. HONOLULU, OAHU, IANUARI 23, 1844. Pepa 18.

NO WAIMEA HAWAII. HELU 2.

                2 Na kula. Ma ka nana'ku i na kula ma Waimea, he mau mea hoohauoli kekahi a he mau mea

hookaumaha kekahi. Eia na mea hoohauoli. Ua laka no kekahi poe kamalii, a ke hele la lakou i ke kula. Ekolu no kula, ekolu no kumu, hookahi hanele haumana. Elua no hale kula maikai; maikai no ko waho, aka, oloko aole i maikai loa. Hookahi hale i pau i ka nahaha, ino loa ke kula maloko, he makani, he kulu, he anu, he opili na haumana.
            Ua akamai no na kumu, aole nae i akamai loa. Ua akamai iki no hoi kekahi poe haumana. Ua loaa ka heluhelu, ke kakaulima, ka helunaau, ka helu kakau, ka palapala aina. Aole nae i makaukau loa ma keia mau mea. Nui no ka hemahema i koe. A o kekahi poe, ua ikaika ia i ka hoopaanaau i ka ke Akua olelo. Ma ka hoike mamua aku nei, 300 pauku i hoikeia mai.
            A o ka nui o keia poe haumana ua komo lakou i ka "Puali Inu Wai." Ua hoohiki lakou e haalele i na mea ona, i ka rama, i ka waina, i ke gini, i ka awa, a me ka baka. A o ka nui ke kupaa la no, aka, ua hoi kekahi poe i ka puhi baka, he kakaikahi nae. Aloha ino ia poe.
                Oia na mea hoohauoli:
            Eia hoi na mea hookaumaha:
                Ua emi loa na haumana i keia manawa. Mamua 250 keiki iloko o ke kula ma Waimea. I keia manawa hookahi wale no haneli. Ua pau kekahi poe i ka make, ua pau kekahi i ka hele, o kekahi poe hoi, ua pau i ka maleia. Ua hele aku kekahi poe he nui no mamuli o na holoholona, he kahu bipi, he kahu kao, he kahu lio. Aia kekahi poe me na haole. A o kekahi poe hoi ua hele i ke kula parani. Hookahi no kula Ka tolika ma Waimea, ua 20 haumana a keu aku paha. A o kekahi poe keiki, aia no lakou ma ka hale, e noho wale ana no, aole hele i ke kula.

                A o ka poe e hele ana i ke kula, aole akaka pono ko lakou makemakei ka naauao. Aia kii aku na lunakula, alaila hele mai lakou; a kii ole aku na luna, pau ka nui i ka noho. Aole pela ma na aina naauao. Hele na keiki i ke kula no ko lakou makemake no. A hele keia poe i ke kula, lilo kekahi i ke kolohe, i ka paani, i ka walaau, aole Akaka ka ikaika o kekahi poe i ka imi i ka naauao.
            Aia no ka manao ma na mea e, aole ma ka palapala. Nolaila, aole loaa ke akamai. Mau no ka naaupo. E like me ko lakou makemake ole i ka naauao, pela hoi lakou i ka pono, aole makemake, aole imi, lilo loa lakou i na mea o keia ao. Aohe makau i ke Akua, aohe mihi, aohe pule, e poho okoa ana no lakou, ilalo i ka make mau. Auwe ko lakou uhane!
            Eia kekahi mea hookaumaha; o na keiki i hele mai i ke kula mamua, a loaa ka naauao, a hemo aku mawaho o ke kula, ke noho wale la lakou, a ke hoi hou aku la i ka naaupo. Ua waiho wale aku lakou i ka palapala, e like me ka poe