Ka Nonanona, Volume III, Number 18, 23 January 1844 — Page 83
1844.) KA NONANONA. 83
na Sanata, mahope aku e hookauwa au i ke Lii nui o ka lani." Ua akaaka na'lii ia ia, aole i ike ia, ua hoomaau lakou ia ia; aole ikeia, i ua hana lakou i kekahi mea e keakea ai kona imi ana i ka pono o ke Akua. Ia manawa, ua loaa ia Batimea ka minamina i ka make ana o kanaka o Hawaii nei: no ia mea, ua hoomoakaka ia i ka hana ma na mea e ola'i ko lakou uhane, a hooikaika oia malaila a hiki i kona make ana. Mahope, holo pu oia me Keopuolani i Lahaina, a malaila oia e hana pu ana me Kaua, he kumu ao no Tahiki mai, ma na mea e pono ai na kanaka, i ka wa i hiki mai Mr. Rikeke ma, Mei 31, 1823. O kona ano ia manawa, a me ka manao o na misionari ma Lahaina no kona noho haipule ana, ua ike lea ia ma ka lakou palapala.
Eia kekahi, "Ianuari 1823. Na ke kanaka makapo haipule. Aole paha kekahi kanaka ma keia pae aina i hoike mau mai ia makou i kona ike maopopo ana i ka oiaio iloko o Iesu, e like me Puaaiki: he kanaka makapo ilihune, ka mea i olelo pinepine ia iloko o ka palapala o na hoahanau ma Honolulu. Aohe mea e ae i hoike i ke ano kamalii maikai, a me ke akahai, a me ka haahaa o ka naau; ke ano haipule, ka maemae, a me ka pono io no. Ua mau oia ma ka hale o ke Akua, a malaila, aia no ia ma na wawae o ke kahuna. I kona hookokoke ana i ko makou wahi e noho ai i ka manawa e pule ana makou, i ka pule ohana,—a ua hookokoke pinepine mai no ia ia,—o ka leo mua o ko makou himeni ana, a pule ana paha i komo iloko o kona pepeiao, oia ka mea e ano hou ai kona helehelena a pau loa. Ua hiki koke ke ano haipule loa maluna o kona mau maka ike ole, a wikiwiki oia i ke kulou ilalo me he mea hoomana la. He oiaio; no ke ano e o kona maka helehelena i kekahi manawa, ma ka hoomana i ke Akua ma kahi akea, a me makou kekahi, i kona himeni pu ana me makou i ka himeni ma ka olelo Hawaii, i mea e nani ai ke Akua oiaio, a me ka Haku,—he ano maluhia, a me ka oluolu, ua kahe wale ko makou waimaka ma ko makou papalina. I ko makou manao ana i kona ano naaupo, a me ka haumia mamua, a me ka manao ana, ano e kaumaha ana oia i ka mohair o ka naau haahaa, a e loaa ana ia ia ka hua mua, momona o ka hauoli, ka mea e lilo ana, i kela ao mahope, i mea kiekie loa. He kanaka ilihune ia, a hoowahawaha ia ma kona kino; he poupou ma ke kino, a ma kona helehelena, no kona makapo, aole maikai i ka nana aku. Aka i ko makou manao, aia maluna ona, "he kii a me ka palapala" o Kristo. Ina pela, he mea ia e maopopo ai ka oiaio o ka Paulo olelo, "Ua wae mai ke Akua i ka poe naaupo o keia ao, i hoohilahila ia i ka poe akamai. Ua wae mai ke Akua i ka poe nawaliwali o keia ao, i hoohilahila ia i ka poe ikaika. A me ke kuaaina hoi, ua wae mai ke Akua malaila, a me ka mea hoowahawahaia, a me ka poe i ike ole ia, i anaia'ku oia i ka poe i ikeia. I ole e hookiekie kekahi kanaka imua i ke alo o ke Akua."
I ka malama o Novemaba 1824, menei ka palapala ana o Mr. Tueta, i kona hoakaka ana i kekahi halawai ana ma Lahaina o kekahi poe e pule i ke Akua. "Ua olelo aku makou ia Puaaiki e pule. Aole makou lohe ia ia e pule ana mamua, aka, no ka hohonu o kona manao, a me ka