Ka Nonanona, Volume III, Number 19, 6 February 1844 — Page 94

94 KA NONANONA. (FE BERUARI,

            E. Aole paha ia he pono. (E kanalua ana,) Ina aole pono, e hai mai oe ia'u. Aka, nui ko'u makemake e noho pu me oe iloko o ka pahipa o Kristo. (Menei, ua holoi ia i kona mau maka paa.)
          N. I kou manao owai ka poe makaukau e hookomoia iloko o ka ekalesia?
          E. O ka poe i mihi i ko lakou hewa, a i loaa mai ia lakou ka naau hou.
          N. Heaha ka naau hou?
          E. O ka mea ia i aloha aku i ke Akua, a i aloha aku i ka olelo a ke Akua: aole makemake i ka hewa, a me na aoao ino.
          N. Ke manao nei anei oe, ua loaa ia oe ka naau hou?
          E. Pela ko'u manao i kekahi manawa: a i kekahi manawa, manao au, aole i loaa. Aole au ike. Ua ike no ke Akua. Ua lana iki ko'u manao ma ka loaa.
          N. Heaha ka mea i lana ai kou manao ma ka loaa ana ka naau hou?
          E. Eia ke kumu o ko'u manao lana ma ka loaa ia'u ka naau hou. O ka naau iloko o'u i keia wa e noho nui, aole like ia me ko'u naau mamua. O ka naau iloko o'u i keia wa e noho nei, he naau ino ia, he naau hoomaloka, a e pili ana no ia i ka hewa. Aka, aole ia e like me ko'u naau mamua. Oiaio, i ko'u manao, ua loaa mai ia'u ka naau hou."
          I aku la Mr. Rikete, "Ke haawi aku nei au ia oukou i keia mau niele, a me kona mau ekemu ana mai ia'u, i mea e maopopo ai kona naauao. Ua pololei like kona mau ekemu e ae.
          He mau mea hou keia mau niele, aole ona lohe mamua, no ia mea, ua akaka lea ia, no kona noonoo wale ana no kona mau ekemu ana, aole paa naau kekahi palapala Ui. Ua huli no nae oia i kekahi palapala Ui no Tahiti mai, aka, aole malaila ua mau mea la a'u i niele aku ai ia ia. I ko'u niele ana i keia kanaka makapo, e noho ana ma ka aina pouli, ua manao pinepine au i na kanaka he lehulehu e noho ana ma Amerika, e noho ana ma ka malamalama nui, aka, he hapa wale no ko lakou ike, he nui loa kona."
          I ka malama o Iulai 1825, palapala hou aku Mr. Rikeke i ka luna misionari ma Amerika e hoakaka ana i ko lakou hoolilo ana i ko lakou luakini hou ma Lahaina i wahi laa no Iehova, a me ke komo ana o Puaaiki iloko o ka ekalesia. Menei kana. "A pau ko makou hoolaa ana i ka luakini no Iehova, alaila, hana makou i ka hana okoa. Oia ka mea au i lohe me ka hauoli, aole nae i hiki ia'u ke hoakaka lea aku. Ua palapala aku au ia oe mamua, i ka hoakaka ana ia Puaaiki, laua me Kanawahine i ka Sabati mua o Aperila. Ua manao makou e hookomo ia laua iloko o ka ekalesia i ka Sabati mua o Iulai nei. Aka, no ka paa ole o ka luakini, ua hoopau makou ia hana, i hookahi hebedoma, i mahuahua na kanaka i hele mai i ka pule e ike ia hana hou. A pau na kanaka i ke akoakoaia, ua hai aku au ia laua i ka nui o ka laua hana ana, a me ke ano o ka hoohiki a laua i hoohiki ai, a kuhikuhi au imua o ke anaina kanaka i keia mea hou, alaila, heluhelu au i wahi palapala o na mea i manaoioia'i, ka mea i kakau ia e kekahi luna misionari i make. A ae mai laua i ua palapala maikai nei, alaila, bapetiso aku la au ia Puaaiki ma ka inoa hou, o Batimea Lalana.*
          Maikai ka malie o ka hale i ka wa i hanaia'i ia mau mea. A pau ia, alaila, heluhelu au i ka berita o ko makou ekalesia. Ua ae mai laua i ua berita nei a kakau laua i ko laua inoa malalo iho olaila.+ Pela no laua i kakau ma ko laua lima "no Iehova maua, a kapa laua ia laua iho ma ka inoa o Iseraela." I ka malama o Iulai. M. I. I825, ua hooiliili makou i ka makou hana mua iloko o keia kihapai o ka Haku."
          Pela ka manao o na hoahanau, na mi sionari o Lahaina ia Puaaiki, mai ka manawa o ko laua ike mua ana ia ia, a komo ia iloko o ka ekalesia. E ike auanei ka poe heluhelu i keia palapala, aole kuhi hewa laua i ko laua manao ia ia, no ka mea, e like me ka hua mua o ka aina, he mea momona loa ia, pela ka hua mua o ko Hawaii poe "no ke Akua a no ke Keikihipa." A ua oi nui aku ka maikai o ia kanaka mamua o ka manao lana o kana mau kumu.

          *Ua haawi na Lii ia Puaaiki i keia inoa hou o Lalana, no ka make ana o Rihoriho ma Ladana i Enelani.
          +Aole kakau maoli o Puaaiki, no kona makapo. Ua kau pahu ia i kona kaha.