Ka Nonanona, Volume III, Number 20, 20 February 1844 — Page 99

1844.) KA NONANONA. 99

na haole, a kupono me ka pono o ko'u noho ana. I kou noho ana mauka nei, ma kou mahalo ana mai ia'u, a me ko'u mau Luna, a me na kanaka a me ka hana oluolu ana mai me ka hanohano, oia ka mea e aloha'i na mea a pau ia oe, a ua minamina au i kuu lohe ana i kou hoi loa ana.
          E kaulana auanei ka inoa o Ademarela Thomas i ka mooolelo o ko makou Pae Aina, a e hoomanaoia e a'u, a me ko'u mau hope me ka mahalo, a me ke aloha kupono i ka mea lokomaikai.
          Eia wale no ka mea e oluolu iki ai ko makou kaumaha i kou hele ana, oia ka ike pono o makou i ka oluolu ana mai o Mr. Miller ke Kanikele nui, oia ka mea e noho pu ana me makou, nana no hoi e hooko i ke aloha ana au i hoala hou mai me ka olioli loa o ko makou mau naau.
(Inoa,) KAMEHAMEHA III.

KA OLELO HOOPAA.

            E IKE OUKOU e na mea a pau, Owau no o KAMEHAMEHA III., ke Lii o ko Hawaii Pae Aina ma keia palapala, ke ae aku nei, me ka oiaio, ke hoopaa nei hoi me ka hooholo i ka hooponopono ana o na hihia i puka mai mamua mawaena o ko'u Aupuni, a me ke Aupuni Beritania, e like me ka hooponopono ana ma Ladana iwaena o ko'u mau Luna, a me ke Aupuni o ka Moi, ke Lii Wahine Beritania, e like me ka olelo a ka Earl Aberdeen ma kana palapala ana mai i ko makou mau Luna i ka la 12 o Sepatemaba, 1843.
          Kakauia ma ko makou hale Ahaolelo i ka makahiki o ko kakou Haku, hookahi tausani ewalu haneri kanahakumamaha, ma Lahaina, ko Hawaii Pae Aina.
(Inoa,) KAMEHAMEHA III.
(Inoa,) KEKAULUOHI.
G. P. JUDD, Kakauolelo no ke Aupuni.

Ka palapala a G. P. Judd ia Gen. Mila, no ke Kuikahi hou.

Lahaina, Feb. 12, 1844.
            AUHEA OE. Ua noonoo pono ia ke Kuikahi i hoakakaia mai nei e ke alii wahine Hanohano o Beritania, a ua lawe mai nei hoi oe, me kou makaukau e hoopaa iho ma ka inoa o ke Aliiwahine Hanohano o Beritania a me Irelani, a ua kauohaia mai nei au e ka Moi, o Kamehameha III., me ka ae like ana o kona poe alii ma ka ahaolelo, e hoike aku ia oe i kekahi mau manao maopopo.
          Ua oluolu loa ke alii e kakau paa i kona inoa i keia Kuikahi, i hoikeia mai e ke Aupuni o ke Alii Wahine Hanohano, me ka manao a me ka makemake e hoonui i ka oluolu, e hooholo i ka pomaikai, a e hoopaa hoi i ke kuokoa ana o ke Aupuni Hawaii. Aka hoi, o ka pauku aono, ua keakea loa ia i ka manao o ke Alii, e hoopilikia i na mea ona iwaena o kona poe kanaka, ma ka papa loa ana paha i ka hoopaeia iuka nei na wai ona, a i ole ia, ma ka auhau ana ia lakou, i emi loa lakou, a e nalo hoi ka hana ino ana i ke ola, a me ka pono o kona poe kanaka; ua ku pono no nae keia pauku me ka makemake o ke Alii, a me na kanawai ona, no kela mea, keia mea kuai.
          No keia manao o ke Lii, ua kauoha aku oia i kona mau luna ma kahi o ke Lii Hanohano o ka poe Farani, e imi a loaa ka holoi ana i ka pauku aono o ke Kuikahi i hanaia i ka la 17 o Iulai, 1839, no ka lawe ana mai i ka waina a me ka barani maanei, me ka ukuia i dute elima hapahanere. Ua kaumaha loa ke Lii i ka ino e ulu ana mai loko mai o keia mea.
          Aole loa manao ke Lii e haehae i keia pauku o ke Kuikahi Farani; ua manao no nae oia, no ke ano pono o ka Moi Farani, e loaa auanei i na luna ka holoiia mai o keia pauku. A i ka hoopaa ana i keia Kuikahi i hoikeia mai e oe, makemake ke Alii e hoakaka'ku i kekahi pauku hou e komo iloko o ke Kuikahi, ke ae mai ke Aupuni Beritania.
          Ua maopopo ka manao o ka Moi o Hawaii nei, no ka hana pono mai o ke Aliwahine o Beritania ia ia, he Alii ku Okoa, e ae oluolu mai no ia i keia pauku hou e huiia iloko o ke Kuikahi, no ka mea, he mea ia e pono ai na kino a me na Uhane o kona poe kanaka, a ua manao nui ke Aliiwahine Hanohano i keia mau mea.
          Pomaikai au ke hoakaka mai oe ia'u i kou manao no keia mea; he mea oluolu paha ia oe, aole paha, e hoike aku i kou alii i keia pauku hou i hoakakaia; ina he pono, alaila, pau ke kanalua o ke Lii o