Ka Nonanona, Volume III, Number 20, 20 February 1844 — Page 104

104 KA NONANONA. (FEBERUARI,

OLELO NANE.

            Ua haule kekahi Alopeke iloko o ka punawai, paa iho la kona mau maiuu ma na pohaku, a puka aku kona poo maluna o ka wai, ma kahi maloo. A liuliu iki, hele mai kahi Ilio hae ma ia wahi, a hana aku la ia ia.
          Nonoi ikaika mai la ka Alopeke i ka Ilio hae e kokua ia ia iloko o kona pilikia. Olelo aloha mai la kela, i mai la, "Aloha ino oe, pehea la oe i poho ai ma ia wahi ino." Olelo aku la ka Alopeke, i aku la, "Alia oe, ina he aloha io kou ia'u, mai ku wale oe ilaila me ka olelo aloha wale mai o ka waha, aka, e kokua koke mai ia'u. No ka mea, he mea ole ka olelo aloha i ka mea e make ana i ka wai.
          Nui wale na mea olelo aloha i ka poe pilikia, kakaikahi hoi ka poe kokua io mai. Aka, ma ke kokua ana e hoike ai lakou i ko lakou aloha.

KANAKA HAULE I KA PALI.

            Hele aku la kahi kanaka o Kalalau i Kauai, o Kalakinau kona inoa, mai Kalalau aku a i kahi e ma ka pali, a o ka nalowale aku la no ia. Ma na la mua paha o Ianuari i hala aku nei kona nalowale ana. Imi aku la kana wahine a me na kanaka o Kalalau ia ia, aole hoi i loaa. Ua manaoia ua haule oia ma kahi kokoke i ke kai, a lilo aku la kona kino iloko o ka moana.
          He leo no ia, ia kakou a pau e noho makaukau, no ka mea, aole o kakou ike i ka la e hele mai ai ke keiki a ke kanaka, a lawe ia kakou iloko o kela ao. "Pomaikai ka mea make iloko o ka Haku."

KANAKA KAAWE.

            Ma ka la 3 o Feb. nei, make kekahi kanaka ma Wainiha i Kauai, o Kaonohiikiokala kona inoa. Penei kona make ana. He mai kona he aki o ka Opu. Ua loihi no ia mai, a ua eha loa. Nolaila paha i ulu ai kona manao e pepehi ia ia iho. He manao lapuwale loa no hoi, na Satani, ka enemi nui i hookomo ia manao iloko ona.
          Aia iloko o ka hale he kane, he wahine, a me kahi keiki. E moe ana oia ma kona wahi keena. Hikii oia i kaula maluna, a hookomo i kona puu a lilo aku la kona hanu.
          Ua poina loa paha ia ia kela Kanawai o Iehova e papa ana i ka pepehi kanaka.

ALEMANAKA.

Ka malama 4. MEI, 1844. O kona mau la 31.
La. h. m.
Mahina poepoe, 2 3 16 A.
Mahina hapalua hope, 9 8 23 K.
Mahina hou, 17 8 53 K.
Mahina hapalua hou, 25 7 3 0 K.
Mahinapoepoe, 31 10 17 A.

Na la o ka malama. Na la o ka hebedoma. Ka hora i puka mai ai ka la. Ka hora i napoo ai ka la. Ka hio ana o ka la. Ka hoohalike i ka hora.
Houluulu.
h. m. h. m. Akau. m. s.
6 Mone de, 5 33 6 27 16˚ 39' + 3 35
13 " 5 31 6 29 18˚ 29' 3 54
20 " 5 28 6 32 20˚ 03' - 3 46
27 " 5 25 6 35 21˚ 22' 3 08

Na LIMAIKAIKA e hoopuka'ku.