Ka Nonanona, Volume III, Number 22, 19 March 1844 — Page 116

116 KA NONANONA. (MARAKI,

aku au, a i hookauwa aku au ia Iesu i ka Haku. Nui loa kana hana e pono io ai kuu uhane; aole ona paupauaho i kuu hoole ana, a i kuu hoopaakiki ana i ko'u naau. A mahope iho, i ko'u hoolohe iki ana i kona leo, ikaika loa kona makemake e hoomalamalama i ko'u naau pouli. I mai la ia ia'u, "e hele oe i ke kumu kahiki, ia Mi. Rikeke, a nana e ao mai ia oe." I aku la au, "aole loa au e hele i ka haole, no ka mea, he kanaka haaheo ia, aole ia e kamailio mai ia'u. I mai la Batimea, "aole ona manao haaheo, e hookipa no ia ia oe, e hele, e hele io na la!" Ua ae aku au i kona manao. Ua hele no au io na la, ua hookipa ia no hoi, a mai ia manawa mai, ua paa ko'u manao ma ka pono." Pela o Ii. Nui paha na mea e ae i hoohuliia ma ka pono o ka Haku ma ka hana o keia hoahanau aloha. E ike paha kakou i ka la o ka Haku.
                Ua noho oia i Lahaina e mahuahua ana kona alohaia mai a me kona ike ana'ku i ka Haku, a hiki i ka makahiki, 1839, alaila, ua holo pu me Kekauonohi ma i Hilo ma Hawaii. Malaila, ua komo Batimea iloko o ke kula palahalaha. Ma Lahaina, he nui no kana hana, aka, malaila, he mau hoahanau no, ia manawa o Davida Malo ma, a o Kaua, ka hoahanau no Bolabola mai; no ia mea, aole nui ka pouli e like me ia ma Hilo. Aia no na'lii o Hoapili ma e kokua ana mamuli o ka pono ma Lahaina; aole alii haipule ma Hilo. No ia mea, ua nui ka hemahema ma ia wahi. Ua naaupo loa na kanaka. Ua hihiu no hoi. A hiki o Batimea ilaila, ua nui kana hana e pono ai kolaila poe ilihune, a me ka naaupo. No ka nui o ka hemahema o ia aina, ua koiia o Batimea e noho mau malaila, aole e hoi i Maui. Ae aku oia i ka makemake o kolaila misionari, a me kolaila poe hoahanau ekalesia, a ua komo oia me kona ikaika a pau iloko o ka hana e pono ai na kanaka o Hawaii. I ka makahiki o ka Haku, 1830, ua holo au i Hilo, a ua noho au malaila, hookahi makahiki a me ka hapalua. Ia manawa, ua mahuahua ko'u ike ana ia Batimea. Ua launa pu au me ia i kela la, i keia la. Ua kamailio pinepine maua ma na mea e pono ai ke aupuni o ka Haku. Ua ku paa oia ma ko'u aoao, a ua kokua mai ia'u ma na mea a pau iloko o ka popilikia, a iloko o ka popilikia ole. Ua makaukau oia no na hana maikai a pau. Ua imi pu oia me au i na mea e pau ai ka naaupo o ko Hilo poe, a me na mea e ola'i ko lakou poe uhane. Ua hooikaika pinepine oia i na kanaka e ao i ka heluhelu i hiki ia lakou ke huli i ka palapala hemolele e like me ka Iesu kauoha. Aole nae ia i hooikaika wale aku. Ua huli oia i ka palapala me kona makapo no. I Lahaina, aole ona manao e ao iki i ka palapala no kona makapo, aka, i kona noho ana ma Hilo, ua emi kona pilikia ma na maka ona, no ka uliuli paha o na kula, a no na ao maluna e hoomaalili pinepine i ka wela a ka la, a no ka ua nui malaila. No keia mea, ua kupuia iloko ona ka makemake e ao i ka palapala. O Kalaka wahine ka i ao mua aku ia ia. Mahope, ua noho ma Hilo o Aneru ma. Ua hoakoakoa o Aneru wahine i kekahi poe kamalii e ao aku ia lakou i ka palapala. Aloha o Batimea, hele aku la ia ia Aneru wahine e noi aku ia ia e ae mai i kona makemake e komo iloko o kona kula.