Ka Nonanona, Volume III, Number 22, 19 March 1844 — Page 119

(MA RAKI, KA NONANONA. 119

aka, he mama a ikaika hoi kona kino. Ua hanau ia i ke kaua a Pikao mamua o ka make ana o Lono. Kanahiku a keu kona mau makahiki. Ma Kaanapali, ma Maui nei, kona hanau ana. Loihi loa kona noho ana ma ka poeleele. A hiki mai Mika Rikeke ma Lahaina, aole liuliu a huli o Hawaii i ka pono. Ua noho no ia ma Kaanapali ia manawa, a hele pinepine ia ma Lahaina i ka pule. A loaa ia ia ka palapala, hooikaika no ia i ke ao i ka heluhelu, a loaa pono ia ia i kona wa elemakule. I ka makahiki 1830, hele mai ia ma Wailuku nei, me Kaauwai ma, e noho maanei. I ka malama o Oketoba, 1833, komo oia i ka ekalesia Ia Mika Gerina ka ekalesia o Wailuku ia manawa.
                A hala kekahi mau makahiki, na hooliloia oia i luna ekalesia. A ma keia hana, kona hooikaika ana a make ke kino. O ka pono, oia kona aina ana e manao nui ai. Lilo loa kona kino a me kona naau malaila. Aole hoopalaleha ia i ka hana maikai no ka elemakule. Mai Waihee a hala loa i Kahikinui, ua ike pono na kanaka ia ia, a lohe pinepine lakou i kona leo pule a me kona leo hooikaika; a ua aloha nui ia e na kanaka, no ka mea, ua nui kona aloha i ko lakou uhane.
                Eia kekahi mau mea e maopopo ai kona noho makaukau ana.
                1. Ua nui kona makemake i ka olelo a ke Akua.
                He kanaka elemakule no o Hawaii, aka, ua heluhelu pinepine ia i ka palapala, a paa naau ia ia ka ai o ka la a me na olelo e ae. Huli nui no ia i ka olelo i moakaka ke ano, no ka makemake o ka naau i ka olelo a ke Akua. Hele mau no ia i ka pule, a i ka lohe ana i ka olelo, haka pono no kona maka i ke kahuna. Ma kona helehelena, ua maopopo ka manao oloko a me ka makemake o ka naau i ka olelo ana i lohe ai. He maka oluolu kona iloko o ka hale pule. Malaila halawai ia me ka Haku, ka mea ana i aloha ai; a malaila hoi i loaa ka ike a moakaka ka pono a me ke ola ma Iesu la.
                2. Ua ikaika kana imi ana i na mea e pono ai ka ekalesia.
                Ua lawelawe pono ia i ka ka puuku ekalesia oihana. Ua makaala ia i ole e kupu mai na mea ino iloko o ka ekalesia. Kii koke aku ia i ka poe auwana e hoihoi mai ma ka pono. I ka noho pono ana o ka poe ekalesia, olioli no kona naau. Ina ulu mai ka hewa, kaumaha no ia; a ua akamai ia i ka paipai aku a me ke ao aku i ka poe hele hewa. Aole huhu mai ka poe auwana, no ke mea, hana aku ia me ke aloha.
                Ua noonoo nui ia i na mea e mahuahua ai ka pono, a kukakuka pinepine ia me na luna a me na kumu i mea e pono ai na uhane o na kanaka.
                3. Ua ikaika ia i ke kokua i ke aupuni o ka Haku.
                Aole nui kona waiwai, aka, ua nui kona kokua; no ka mea, ua makemake ia ma keia hana. Aole imi nui ia e hoahu i ka waiwai ma ka honua; ma ka lani ka waiwai ana i makemake nui ai. O ka waiwai i lilo i ke Akua, oia ka waiwai lilo pono i kono manao. Nolaila, i ka hana ana i ka hale pule ma Wailuku nei, ua kokua nui ia ma ka hana aina, a ma ka waiwai kekahi. Ua akamai ia i ka paipai i na kanaka e kokua ma ka mahina hou, a ma kela hana keia hana e pono ai ke aupuni o ke Akua. A i ka ohi ana i na dala