Ka Nonanona, Volume III, Number 22, 19 March 1844 — Page 120

120 KA NONANONA. 1844.)

e kokua i ka hale pule ma Hana, haawi mai o Hawaii i ekolu dala maoli. Aole haawi mai me ka minamina i ke dala, no ka mea, ua makemake ia i kela hana. Haawi mua mai ia i elua dala. I aku au ia ia, ua nui paha ia. I mai kela, aole, i hookahi dala hou ka'u. A imi i dala hou, a haawi mai. Ua imi nui ia i na mea e mahuahua ai ka waiwai kokua. Ua makaukau ia ma keia hana.
                4. He kanaka lokomaikai o Hawaii.
                'Ua uwe no ia me ka poe i uwe ana.' Aloha aku i ka poe pilikia i ka mai a me ka eha, a kokua aku. Aloha nui ia i kana mau keiki elua, o Napela ma. I ko laua noho hoomaloka, kaumaha loa kona naau; a pule nui i ke Akua e hoohuli ia laua ma ka pono io, i kokua laua ma ka aoao o ke Akua, i ola hoi na uhane o laua. Nui kona aloha a me kona lokomaikai i na kumu. Ua malama ia i kela olelo o Paulo, "E mahalo nui aku ia lakou me ke aloha, no ka lakou hana." Ua kokua mai no ia ia lakou i na mea e pono ai ke kino; a ua kokua mai no hoi ia lakou i ka lakou hana ana i ka ke Akua hana. Ua hana lokomaikai ia i na kanaka a pau; nolaila, ua aloha nui ia, a ua nui ka poe i uwe ia ia i kona make ana. Aka, i kona make ana, ia ia ka pomaikai, ia kakou ka poino. Ua pomaikai io ka poe i noho makaukau e like me Hawaii.
Na'u na KALAKA.

KA HOI O KE LII I MAUI.

                I ka la 3 o Maraki nei, hiki mai alii o Kauikeaouli a me na hoapili ona, i Honolulu nei; no ka mai o Leleiohoku o ko lakou holo mai. He mai loa ko Leleiohoku mamua aku nei, a ua maha i keia manawa, I ka la 13 iho nei hoi aku ke Lii i Maui. Ua maikai kona ano i keia wa, i ka nana'ku.

KAHUKULA HOU.

                Ua hooliloia o Keikenui i Kahukula no Oahu nei, a ua pau ka hana a J. Ii malaila.

HALE PAU I KE AHI.

                I ka po 14 o Feb. iho nei, pau i ke ahi ka hale o Haalilio ma Aigupita, ma Honolulu nei. Aole akaka mea e wela ai.

MOKU WELA I KE AHI.

                I ka la 6 o Maraki, a po iho, wela kekahi moku kalepa iloko o ke awa o Honolulu nei; o Chenamus ka inoa o ia moku; no Amerika mai ia. Wela no iloko, aole hoi akaka ka mea e aa ai ke ahi; imi ke kapena i mea e pio ai ke ahi, aohe loaa; a mahope houhou puka malalo a komo nui ka wai, a palemo ka moku iloko o ke kai, o ka pio no ia o ke ahi, a pakele ka moku. Aole ino loa ka moku, o ka waiwai maloko ka mea poino. Malaila ka poho nui. Ua pau i kuai kukala ia kekahi waiwai ino, o kela moku i keia mau la.

Ka malama 7. IULAI, 1844. O kona mau la 31
La. h. m.
Mahina hapalua hope, 7 10 50 K.
Mahina hou, 15 2 23 A.
Mahina hapaha mua, 22 9 13 A.
Mahina poepoe, 29 2 33 K.

Na la o ka malama. Na la o ka hebedoma. Ka hora i puka mai ai ka la. Ka hora i napoo ai ka la. Ka hio ana o ka la. Ka hoohalike i ka hora.
Houluulu.
h. m. h. m. Akau. m. s.
1 Monede, 5 22 6 38 23˚ 06' + 3 30
8 " 6 37 22˚ 23' 4 43
15 " 6 35 21˚ 30' 5 37
22 " 6 32 20˚ 14' 6 07
29 " 6 29 18˚ 42' 6 08

Na LIMAIKAIKA e hoopuka'ku.