Ka Nonanona, Volume IV, Number 5, 23 June 1844 — Page 31

1844.) KA NONANONA. 31

lahuikanaka ma keia noho ana a me kela noho ana.
                Nolaila, iiua iini keia poe hui i mea e paa ai ka olelo a ke Akua ma Hawaii nei, penei ka lakou hana ana, ua halawai lakou ma ka malama o Aperila e imi i na mea e pono ai.
                A ma ka halawai ana, kohoia kekahi alii no ia ahaolelo, a koho hou ia i kakauolelo no ia hana, a kohoia i malama waiwai, a koho hou ia i mau luna nana e ohi mai ke dala na ka poe hui hoolaha palapala Hemolele mai.
                Ua hoomaka ia ka hana ma ka makahiki 1843 a ma keia makahiki 1844, ke imi hou nei, ua poe hui nei, elua no hana, he hoouna misionari kekahi hana, ua haawi lakou i ke dala o ia hana i na luna ohi dala.
                A ma ka la 14 o Mei nei, hoakoakoa iho nei na poe hui nei ma ka luakini me ka lakou kumu, i imi pu, e noonoo pu, e kukakuka pu i na mea e loaa mai ai ka waiwai o ua poe hui nei, i mea e kokua aku ai i mau ka olelo a ke Akua ma Hawaii nei.
                A ma keia kuka ana, ua hoopuka mai kela mea keia mea i na manao imi: penei kekahi manao i hoikeia ma keia ahahui.
                I ka imi ana o ka waiwai, e malama i ka manawa, mai hoomaunauna, no ka mea, o ka manawa, he dala maoli no ia.
                Nolaila, aole e pono ke hele ma ka pa kuai me kahi kumu uuku e kuai hapawalu me kekahi, a po ka la no ia mea liilii, aole e pono ke kali ana no na mea liilii o lilo ka manawa i mea poho, aka, ina he kumu nui, e lima paha dala a he umi paha e loaa mai, ua pono ke kali ana ma ia mea.
                Aole e pono ke kiai ma ka pa kuai a po ka la no na kumu kuai liilii o make hewa ka manawa, aka, e haawi aku ka pono na kekahi mea e e kuai, a loaa mai ka waiwai, e haawi aku nana kekahi o ia waiwai i loaa mai, a hele no oe e imi i hana hou nau ma ka hana e nui aku ka loaa mai, i make hewa ole ai kou manawa.
                Aole e pono nui ke kalai ipu, no ka mea, nui loa ka manawa e pau hookahi no ipu e loaa mai, aka e hana i wili, oia ka mea e loaa nui mai ai na ipu i ka manawa hookahi. Aole e pono ke kua wahie a amo mai, o poho ka manawa, no ka mea, hookahi no pauku wahie hookahi la, e hana kaa ka pono a na ka bipi e kauo mai, pela e poho ole ai ka manawa.
                Aole pono nui ka hele ana i ka mai o ka makamaka ma kahi loihi, no ka mea, pau wale kou manawa, ina he hana kau i hele ai ma kahi loihi ua pono loa ia.
                Aole e pono ka ai a maona loa, o lilo ka hopena i mea hiamoe, a poho ka manawa, e pono paha e ana ka ai ma ke bola, i ikeia ka maona ma ka pau ana o ke bola; ina paha ma ka umeke wale no e ai ai, o ka haha i ka opu ka mea e ike ai ke kanaka i kona maona iho.
                O ke kanaka i manao e hana i loaa ia ia na mea o keia ao, noonoo nui oia i na mea e nui ai ka loaa mai ma ka manawa pokole, aka, i nui ka manawa pau uuku ka mea loaa mai ma ia hana, e haalele ia hana o pau hewa ka manawa.
                Aole e pono ke lilo i ka lealea a me ka ona o pau wale ka manawa, aole e pono kekahi, ke hele ma ka hale o kekahi e noho loihi ai me ka hoopau manawa.