Ka Nonanona, Volume IV, Number 7, 23 July 1844 — Page 37

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." SOLOMONA.
Buke 4. HONOLULU, OAHU, Iulai 23, 1844. Pepa 7.

NA KA HANAI I NA KAHUNAPULE. Helu 2.
Makawao, Maui Hikina, Maraki 15, 1844.

                E na hoahanau ekalesia mai Hawaii a Kauai. Eia kekahi mea e maopopo ai ka pono o ko oukou malama ana, ma na mea o ke kino, i ka oukou poe kumu. O ka Iehova kauoha kahiko na ka poe mamo a Iseraela, a me kona makemake i hoikeia mai ma ke Kauoha Hou.
                Ua lohe pinepine oukou, o ka Levi oihana. He poe kahuna lakou no Iehova; o ka lakou hana, aia no ma ka luakini, ma na mohai a me na alana. Nawai lakou i malama? I ka wa i mahele ia ka aina o Kanaana, a ua haawiia mai na ka poe ohana he umi kumamakahi, ua hooleia ka Levi ohana, no ka mea, wahi a ke Akua, "O Iehova ko lakou hooilina." A pehea kona malama ana ia lakou? Menei: Ua haawiia na lakou ka hapaumi o ka waiwai a pau o ka poe mamo a Iehova. E huli oukou i ka olelo a ke Akua i maopopo ia mea. Oihanakahuna 27: 30. "A o ka hapa umi a pau o ko ka aina, o ka hua o ka aina, a o ka hua o ka laau, no Iehova ia, he hoano no Iehova." Nahelu 18: 26 "Olelo mai la o Iehova ia Mose, i mai la; Penei e olelo aku ai i na Levi, e i aku ia lakou. Aia lawe oukou i ka hapa umi, mai na mamo a Iseraela aku, i ka mea a'u i haawi aku ai na oukou mai o lakou mai, i hooilina no oukou, alaila, e kaumaha aku ai oukou i ka mohaikaikai noloko mai o ia mea, na Iehova, i hookahi hapaumi o ua hapaumi la." 2 Oihanalii 31: 6. "A o na mamo a Iseraela, a me ka Iuda, ka poe noho ma na kulanakauhale o Iuda, lawe mai lakou i ka hapaumi o na bipi, a me na hipa, a me ka hupaumi o na mea laa i hoolaaia ia Iehova ko lakou Akua, a waiho akoakoa lakou ia mau mea, he puu okoa no, a he puu okoa." Nehemia 37: 38. "A i lawe makou i kau wahi hana mua ia o ka makou berena moa ole, a me na makana a makou, a me ka hua o kela laau o keia laau, ka waina a me ka aila, i na kahuna ma na keena o ka hale o ko kakou Akua; a me ka hapa umi o ka makou mahinaai i na Levi, a na lakou no na Levi ka hapa umi ma na kulanakauhale a pau o ko makou mahi ana. A o ke kahuna, ka mamo a Aarona, oia pu kekahi me na Levi i ka lawe ana o na Levi i ka hapa umi, a e halihali mai na Levi i ka hapa umi o ka hapa umi ma ka hale o ko kakou Akua ma na keena iloko o ka hale waihona waiwai." Nehemia 13: 12. "Alaila, lawe mai la ka Iuda a pau i ka hapaumi o ia ai me ka waiwai hou a me ka aila ma na keena e waiho ai ua mea la." Solomona 3: 9. "E hoonani ia Iehova ma kou waiwai, a me na hua mua o na mea a pau i loaa'i ia oe." Malaki 3: 8; 11. "E pono anei i ke kanaka ke hao i ka ke Akua." Aka, ua hao oukou i ka'u: A ke ninau mai nei oukou, Ma ke aha ka makou i hao ai i kau? I na hapaumi o ka waiwai a me na mohai. Ua hoahewaia oukou i ka poino, no ka mea, ua hao oukou i ka'u, o keia lahuikanaka a pau. E lawe mai i na wai-