Ka Nonanona, Volume IV, Number 7, 23 July 1844 — Page 38

38 KA NONANONA. (IULAI,

wai hapaumi a iloko o ka hale ahu waiwai, i ai maloko o ko'u hale; a e hoao mai oukou ia'u ma ia mea, wahi a Iehova o na lehulehu, i wehe ai paha au i ua puka wai o ka lani, a e ninini iho i ka pomaikai maluna o oukou, a pau aku la, aohe koe." I ka malama ana a ka poe mamo a Iseraela i ka Iehova kauoha ma na hapaumi a me na mohai, ua oluolu ke Akua, ua hoopomaikai mai oia i ko lakou noho ana. A i ko lakou malama ole, ua hookaumahaia ko lakou noho ana, ua hoopopilikiaia lakou. Nolaila, ua akaka lea ko ke Akua makemake ma keia wahi. A pehea ma ke Kauoha Hou? E nana malaila, 1 Korineto 9: 7—15. "Owai ka mea i hele i ke kaua me ka uku ole ia mai? Owai ka mea kanu i ka mahi waina a ai ole i kona hua? Owai hoi ka i hanai i na holoholona, a ai ole i ka waiu o na holoholona? He olelo kanaka anei keia mea a'u e olelo nei? Aole anei i olelo mai ke kanawai i keia mau mea? No ka mea, ua palapala ia mai, ma ke kanawai o Mose, Mai hana a paa i ka waha o ka pipi nana e hehi i ka palaoa. Ke malama nei anei ke Akua i na bipi? Ke olelo mai la paha oia ia mea no kakou wale no. Ua palapala ia no kakou no, i lana ai ka manao o ka mea mahi ai i kona mahi ai ana. A o ka mea hoiliili me ka manaolana e loaa ia ia ka mea i lana ai kona manao. Ina makou i lulu aku ai i ko ka Uhane maluna a oukou, he mea nui anei ke hoiliili makou i ko oukou mea ma ke kino? Aole anei oukou i ike i ka poe hanu ma na mea laa, ua ai lakou i na mea laa? A me ka poe lawelawe ma ke kuahu, ua ai lakou ma ko ke kuahu? Pela no hoi i kauoha mai ai ka Haku i ka poe hai aku i ka olelo maikai, e ola no lakou ma ka olelo maikai." E na hoahanau, e noonoo oukou i keia mau mea, a e hai mai, aole anei he pono oukou e malama, ma na mea o ke kino, i ka oukou poe kumu? Na'u na GELINA.

NA MAKAHIKI O KAUIKEAOULI.

Lahaina. Iulai 2, 1844.
                E M. KEKAULUOHI. Ua ike au i kau palapala ninau no na makahiki o Kauikeaouli, a me ka malama, a me na la. Auhea oe? ma Keouhou makou me Kuakini i kona wa i hanau ai. Mai kukuipahu mai makou, o Kamahoe hope ka malama, o Ikuwa ko oukou malama i hoi ae ai me Kamehameha, a mahope o Ikuwa, i ka la o olepau, i ike o Kamehameha me Kapihe ma Holualoa, no ka malo loihi; a ma ka malama o Welehu makahiki kakou ma Kailua, a hiki mai o Makalii ka malama, ua like me Detemaba i keia helu, oia ko Kauikeaouli malama i hanau ai, o Detemaba ma ka la 19, ma ka kakou helu, o Laaukulua ka la, hanau Kauikeaouli, Detemabu 19, 1813. Penei e akaka ai; e 5 makahiki ona, make o Kamehameha, 1 makahiki i haaleleia, oia ke kaua ana me Kekuaokalani, 1 makahiki i paleia no ka hoihoi ana; o Mei ka malama makahiki, huipu keia mau makahiki ona, oia e 7, eha o Liholiho, huipu he 7 + 4 = 11; he 20 ko Kauikeaouli huipu 11 + 20 = 31 oia kona mau makahiki. Hoolawe 1844 — 31 = 1813 oia ka makahiki o ka Haku i hanau ai oia.
                Ina i manao kekahi ua hanau o Kauikeaouli ma ka makahiki 1812, oia paha ka pono loa.
                Aloha oe e ko'u haku.
DAVIDA MALO.