Ka Nonanona, Volume IV, Number 7, 23 July 1844 — Page 39

1844.) KA NONANONA. 39

KA HANA MAIKAI MA WAILUKU.

Wailuku, Iulai 5, 1844.
                ALOHA OE E LIMAIKAIKA. Eia ka manao ae like o ka ekalesia ma Wailuku nei. Na ka ekalesia keia manao, na kekahi ekalesia i kakau, aole na'u. He wahi hana naauao no ke hookoia keia manao. Ua mahaloia keia manao e ka poe naauao. He hana ia e pono ai na ekalesia ma Hawaii nei. Mamua, ua like ka ekalesia maanei me ke keiki uuku; ua moe wale no, a ua hiiia ma ka lima o ka makua; a i keia manawa, ua hoao i ka ku iluna a hele. Ina moe wale no ke keiki, aole hoao i ka hele, ua mau ka nawaliwali a me ka hemahema o ke kino, pela no ka ekalesia. O ka hoao i ka hele, oia ka mea e ikaika ai. Nolaila, ua pono keia hoao ana o ka ekalesia ma Wailuku nei. Kokoke lilo paha ia i kanaka makua.
                E paipai oe i na ekalesia a pau o Hawaii nei, e paipai lakou i keia hana e like me ka ekalesia ma Wailuku nei, i ku okoa lakou, hookanaka, i naauao; i like ka lakou hana ana me na ekalesia ma na aina naauao.
                Eia na pauku i kauoha mai i keia hana. E heluhelu na ekalesia a pau a noonoo i ke ano. 1 Kor. 8; 4,14. Eal. 6: 6; 1 Tim. 5: 17, 18.
Na'u na KALAKA.

Wailuku, Maui, Aperila 8, 1844.
                He olelo i ae like ia e na ekalesia huipu ia mai Wailuku a Kahikinui.
                1. Eia ka olelo, e hoole ia ko Kalaka mau pono a pau a na luna misionari o Amerika i kokua mai ia ia, a na ka ekalesia huipu ia ma Wailuku e kokua ia ia ma kona mau hemahema a pau, ma kela mea keia mea e pono ai kona noho ana.
                2. O kona uku a Amerika i haawiia mai ia ia, e hoounaia aku ia uku i na wahi i lohe ole i ka inoa o ka Haku.
                3. E kohoia na luna malama waiwai ma na apana, na lakou e malama i na mea i haawiia mai e ka ekalesia huipu ia. E kohoia na luna paipai.
                4. O na manawa hookupu, eha o ka makahiki.
                5. E hookaawaleia ka uku o ka mahina hou, aole hui pu me ka uku kokua, a me ka hoolaha Baibala, a me ka uku hooluhi ke ku ka hana malaila.
                6. Pono e kakau kela mea keia mea ae mai i kona inoa iloko o keia palapala ae like ia e keia ekalesia huipuia. Na kela luna keia luna apana e kakau i na inoa o lakou.
                7. Penei ka haawi ana a kela mea keia mea i ae mai, e haawi no ma ke ana o kana loaa; ina hookahi dala, oia; ina he hapalua, oia no, a me ka hapaha, hapawalu, hapaumi, oia no, e like loa no me ka loaa a ke kanaka kiekie, oia, a emi iho oia no, a emi loa, oia no.
                8. O ka hooko io no ka mea e pono ai, no ka mea, he mea nui loa keia, aka, he mea no nae e pono ai ke aupuni a me kakou."
                Ke ae aku nei au i kela manao o Kalaka, maluna iho. He oiaio maoli no, o ka hana keia e ikaika ai, e nani ai, a e kanaka makua ai, na ekalesia ma Hawaii nei. Ina i hooko na hoahanau ma Wailuku mamuli o keia olelo ae like, e hanai a e hoolako hoi i ka lakou kumu, ma na mea o ke kino; alaila, pomaikai lakou, a pomaikai hoi na ekalesia a pau o Hawaii nei ia lakou Hauoli loa no hoi na ekalesia o Amerika, ke lohe lakou ua holo keia hana maanei, maha ko lakou naau, a manao hoi lakou he oiaio ka hana a ke Akua ma Hawaii nei.