Ka Nonanona, Volume IV, Number 7, 23 July 1844 — Page 41

1844.) KA NONANONA. 41

KA NONANONA.
Honolulu, Iulai 23, 1844.

                MANUWA BERITANIA. Ku mai ma Honolulu nei ka manuwa nui,o Talia (Thalia) kona inoa, i ka la 11 o Iulai nei; o Charles Hope kona kapena; mai Bolabola mai keia manuwa, a ua hoi hou aku ilaila i ka la 21, me Mila, ke Kanikela nui Beritania. Ke noho nei na koa Bolabola me ka makaukau e kaua hou; aole nawaliwali iki; kokoke nae pau paha kela hana, ke hoihoiia ka aina ia Pomare.

                NA MISIONA RI HOU. Eia kekahi, i ka la 15 o Iulai nei, ku mai ke Kialua, o Globe kona inoa, mai Bosetona mai, me na misionari hou ehiku; ekolu wahine, eha kane; elua kane wahine ole, a hookahi wahine kane ole, oia hoi, ke kaikamahine a Mi. Wini ma. I holo mai nei lakou e hoolaha i ka pono o ke Akua, a hoola hoi i na uhane o na kanaka ma Hawaii nei. Aole ma ka waiwai o keia ao ko lakou manao; ma ka pono no o ko Hawaii nei. Nani ke aloha mau loa o ke Akua i ko keia pae aina. Mai noho kakou a pale aku i kona aloha, a hoomaunauna wale i kona lokomaikai, aka, e hoolohe i kana olelo, me ka pale aku i na hewa a pau: a e kokua i na kumu ana i haawi mai ai.

                MEA PAIPALAPALA NO KE AUPUNI. Ua kuaiia e na luna waiwai, he mea paipalapala no ke aupuni, a me ka pepa hoolaha ike kekahi, ma ka olelo Beritania. A ua lilo mai hoi o J. J. Jarves i luna hooponopono no ka hale paipalapala o ke aupuni. Nana ua pepa la mamua.

                HOOMAINOINO. Mamua iho nei, ua hoomainoinoia kekahi poe kanaka ma Honolulu nei, no ke kakau uhi, no ke kui niho, a me na hana naaupo e ae, ua alakaiia lakou io ia nei, ma kela wahi, keia wahi e ka luna. me ka hoike aku imua o na kanaka i ko lakou hewa. Pono paha keia, ea, i hilahila ka poe naaupo, a makau hoi ka poe kolohe.

                KA AHAAINA MAKAHIKI A KE ALII. I ka la 31 o Iulai nei, keia ahaaina; oia ka la i hoihoiia'i ke aupuni i kela makahiki 1843. Aole nae pau i ka la hookahi; pela ka lohe. Ua paa ka hale pili hou o ke alii ma Beritania, mauka o Honolulu nei; o ka hale pule kahiko ia, ua wawahiia a ua kukulu hou ia malaila: o ka hale ahaaina ia. Elua paha lau kanaka, aole piha loa.
                I ka la mua o ka ahaaina, e halawai ana ka "Puali Inuwai," kanaka makua ma ka luakini ma Kawaiahao, a i ka la elua o ka ahaaina halawai ka "Puali Inuwai," kamalii, a hele iwaena o Honolulu nei, me na hae a me na hoailona, a me na lii e hele pu ana.
                Eia kekahi; mai manao kekahi, he mau la kanawai ole ia mau la ahaaina, e like me na la 10 mamua i ka wa i hoihoiia'i ke aupuni: a hoohaunaele, a uhauha, a inu rama, a me na hana ino e ae. Ina pela, poino loa ke aupuni, a e kau mai hoi ka huhu o ke Akua maluna o ka poe hana pela a e hoopaiia ko lakou hewa e na lunakanawai. E ahaaina no me ka noonoo, me ka hauoli, a me ka hoomaikai aku i ka mea nana i malama ke aupuni: mai hoonaaupo kekahi.

KE KAUA WAHINE MA BOLABOLA.

                Ua lohe iho nei makou i kekahi hana ana a na wahine ma Bolabola. Eia ua hana la.
                I kekahi kaua o na kanaka maoli a me ko Farani poe koa malaila, hele pu aku la he mau wahine eha, e kokua i na kane a lakou ma ke kaua; a hele me ka pu, a me ka pauda, a me ka poka a ua hana ikaika lakou, a nui na haole i make ia lakou. Makau ole, ea!
                I ka ninau ana o kekahi ia lakou, no ko lakou hele ana i ka kaua, i