Ka Nonanona, Volume IV, Number 7, 23 July 1844 — Page 42

42 KA NONANONA. (IULAI,

mai lakou, "No ko makou aloha i ke'lii, nolaila hele aku makou i ke kaua."
                Aloha lakou! aloha ko laila poe pilikia i ko lakou poino nui; ua hana pono ole loa ka Ademarala Farani; nui ka make malaila, a me ka pilikia io no.
                Aka, ua lohe iho nei makou ua hoole ke alii nui o Farani i ka hana ana a ua Ademarala la, a ua hoihoiia ka aina ia Pomare.
                Olioli loa paha lakou, ke lohe ia mea; ua ola lakou mai ka make mai; e olioli pu kakou i ka lokomaikai o ke Akua ia lakou a me makou nei hoi; a e pule mau ia ia e malama i keia mau aupuni nawaliwali.

NO KA MARE.

Kohala, Maraki 15, 1844.
                Aloha oe e ka Nonanona. Eia kekahi manao a kaua i olelo ai mamua aku nei.
                Eia hoi kahi pilikia i koe ia makou, E nana hou oe i ke kanawai mare, i ka apana. "No ka noho pu ana a me ka hemo ana o ke kane me kana wahine." Penei ua kanawai nei.
                I. Ina e moe kolohe kekahi mea i mareia, alaila e hiki no i kona hoa ke hookaawaleia mai ka mea hewa aku, e ke Kiaaina.
                II. Pela no hoi ina e huhu nui kekahi kane i kana wahine paha, a o kekahi wahine i kana kane paha, a e imi oia i mea e make ai kona hoa, e hiki no ia laua ke hookaawaleia, e ke Kiaaina, ina pela ka manao o ka mea hihia ole.
                III. Aka, ina i aneane like ke ano o ke kane a me ka wahine, ma ka hewa, alaila pono no i ke Kiaaina ke hoole; aole laua e hemo. A ina komo ke kane me kana wahine iloko o kekahi mau pilikia liilii iho, aole nae laua e hemo.
                IV. Ina e manao ke Kiaaina e hemo kekahi mau mea i mareia, alaila ia ia no e haawi i ka mea i hoohemoia, i palapala, i hoomaopopo na kanaka a pau i ko laua hemo ana.
                Pela ia'u ke ano o ua kanawai nei. He ano pololei no hoi ia, he mea e pono ai na kanaka o keia aupuni o Hawaii nei. E like no hoi ia me na kanawai ma na aina naauao; a e mau no ka pilikia ma ka noho pu ana o na kane me ka lakou wahine maanei ke ole o keia kanawai.
                Aka, ole nae e ku pono ka hana a na luna malalo o ke Kiaaina i ua kanawai nei. O kuu mea e kaumaha'i no ia, a nolaila hoi keia manao kukakuka me oe. Haawi pinepine mai na luna i mau pepa hookaawale i ke kane a me kana wahine, oia hoi, i mau palapala e mare hou, i na mea i papa loa ia e ke kanawai, aole o lakou e hookaawaleia, aole no hoi e mare hou aku.
                Menei; aia no kahi wahine e noho kokoke ana ia makou. Lawe mai la kela, i keia malama i hala iho nei, i palapala mare. Hele pu mai la kahi kane hou nana. I aku au i ke kane "auhea kau wahine kahiko? I mai la kela, "ua make," a he oiaio noia. Pela hou aku au i ka wahine, "auhea kau kane mua?" I mai kela "ua make." Ninau hou wau, "ua make io anei?" I mai kela, "ua make io no." Alaila i aku au, "a pau na hebedoma e kakaliia'i, e mareia olua." Aka, lohe kekahi hoahanau e mare ana laua, hele koke mai la kela me ka i ana mai, "ua lohe makou he manao kou e mare hou i ua wahine nei." I aku au, "heaha la ka hewa?" I mai kela, "aia