Ka Nonanona, Volume IV, Number 10, 3 September 1844 — Page 57
1844.) KA NONANONA. 57
Luka 12: 15. "E manao, a e malama ia oukou iho i ka puni waiwai, no ka mea, aole no ka nui o ka ke kanaka waiwai kona ola ana." Hoakaka pinepine o Paulo i ka hewa o ka puni waiwai, I Timoteo 6: 9; 10. "O ka poe makemake e waiwai nui ua haule lakou i ka hoowalewaleia, i keia kuko lapuwale, a i kela kuko lapuwale e pono ole ai i ka mea e paholo ai na kanaka i ka poino, a me ka make. No ka mea, o ka puni dala, o ka mole ia o ka hewa a pau, ua kuko nui ia e kekahi poe, a ua haalele lakou i ka manaoio, a ua houhou lakou ia lakou iho i na ehaeha he nui." Kolosa 3: 5. "E uumi hoi i ko oukou mau lala ma ka honua, i ka moe kolohe, i ka maemae ole, i ke kuko wale, i ka makemake ino, a me ka makee waiwai, o ka hoomanakii no ia." Epeso 5: 5. "No ka mea, ua ike oukou i keia, aole ka mea moe kolohe, aole hoi ka mea haumia, aole hoi ka mea puni waiwai, oia hoi ka mea hoomanakii, aole loa o lakou noho ana i ke aupuni o Kristo a o Ke Akua."
E na hoahanau, e noonoo oukou i ke ano a me ka ino o ka puni dala. I ko'u manao, no Satana ponoi keia hewa. Aole paha hawa e make pinepine ai na kanaka, e like me keia. Elua mea e make pinepine ai na kanaka malaila.
1. Aole i kapaia ia he hewa. Makau kekahi poe i ka ona i ka rama, a me ka aihue, a me ka moe kolohe; aka, owai ka mea i makau i ka puni waiwai? He mea mahalo ia e ka nui o kanaka. Ua kapaia ka poe puni dala he poe maalea, akamai hoi, a he poe ikaika i ka hana a me ka noonoo.
2. Eia kekahi hewa o ka puni waiwai he mea mahuahua mau loa ia. He mea ulu; he mea aai. O kekahi mau hewa ua emi lakou i ka wa elemakule, a i ka nawaliwali o ke kino. Aole pela ka puni waiwai. Mahuahua loa ia a make ke kino.
A pehea na hoahanau ekalesia ma keia pae aina? Aole anei he poe puni waiwai kekahi poe? Oiaio no ia. He lehulehu ka poe e lilo ana i keia hewa nui. I ko'u manao, o ka noho ana o na hoahanau o Hawaii nei me ka malama ole i ka lakou mau kumu, me ke kuai ole i ko lakou mau buke, a me ke kokua ole ma ka hoolaha i ka ke Akua olelo, he mea ia e hauoli ai oukou iloko o keia upena a Satana. Oia ka mea e nawaliwali ai ke aupuni o ka Haku ma keia pae aina. I ko'u ike, a i ko'u lohe ana, aole mahuahua ko ka poe hoahanau makemake i ka ke Akua olelo. Ua emi paha ma kau wahi. E hiki no ia oukou ke kuai i ka lole, a me ka lio, a me ia mea aku ia mea aku. Kakaikahi ka poe hiki ke kuai i ka olelo a ke Akua, a me ka palapala e ae. I ko'u ike ana, a i ko'u lohe ana, aole e mahuahua ana ka hana o ka nui o na hoahanau me ke kokua ana i ka oukou poe kumu ma na mea o ke kino. Aole haawi pinepine oukou i na mea e pono ai ko lakou noho ana. No ke aha? Mahuahua ka oukou waiwai. No ke aha a haawi pinepine ole oukou i na mea e pono ai ka oukou poe kumu? Aole anei no ka manao nui i ka lole, a me na lio, a me ke dala maoli, a me ka waiwai e ae? Aole anei no ka puni dala, ea? A e mahuahua loa keia hewa, ke haalele koke ole oukou.
E na hoahanau, e haliu mai oukou ia'u, me ka hoolohe, no ka mea, ua nui ko'u makemake i pakele oukou i ka pahele a Satana. E malama i ka ke Akua kauoha, Eia 1. Ioane 2: 15. "Mai makemake aku i ke ao nei, aole nae i na mea o keia ao. Ina e makemake aku ana kekahi i ke ao nei, aole iloko ona ka makemake i ka makua." E makau loa i ka olelo a Iesu. Mareko 10: 24, 25. "He mea pilikia loa ke komo aku ka mea paulele i ka waiwai, iloko o ke aupuni o ke Akua. E hiki i ke kamelo ke komo aku iloko o ka puka kuikele, mamua o ke komo ana aku o ke kanaka waiwai iloko o ke aupuni o ke Akua." Nolaila e imi ikaika ka mea e ole ai e lilo oukou he poe puni waiwai. E huli koke i ka ke Akua hana. E hana mau mamuli o kona makemake. E malama i ka oukou poe kumu, e hoolaha baibala. E kokua mamuli o na hana maikai a pau loa, alaila, e pakele paha oukou i ka hewa o na hewa, i ka mole o na hewa a pau o ka puni dala.
Owau no ko oukou hoahanau.
J. S. GELINA.
E pono, e uku koke mai, ka poe lawe i ka Nonanona; ua hala ka manawa i hoakakaia no ka uku, a i keia wa, ua panee a i na hapa umi ekolu.