Ka Nonanona, Volume IV, Number 10, 3 September 1844 — Page 58
58 KA NONANONA. (SEPATEMABA
NO KA NONANONA.
Hon. Aug. 1844.
E OWALAWAHIE; Aloha oe. Ua haawi mai o Limaikaika ia'u i kau palapala ninau no ke kumukuai o kela mea o keia mea ma Honolulu nei. Ua imi no wau me ka ninau i kela poe keia poe kuai, a eia ka mea loaa mai.
Ke oa hale, 3 anana, 3 hapawalu a he hapalua.
Ka pou hale, 2 anana, hapaha, a 3 hapawalu.
Ka aho hale, 40 iloko o ka pua, hapaha.
Ke kaula ahuawa, 1 poai, hapaha,
Ke kaula ahala, hapaha,
Ka pulu hapu, 1 pauna, hapaumi,
Ka moena, hapawalu, hapaha, hapalua, aia i ka maikai,
Ka paila wahie, 10$ a 12$
Barela uhi, 2$
Barela uala kahiki, 3$
Ba rela uala maoli, 1$
Ka puaa, 1 pauna, 3 keneta;
Ka puaa anana, mai 6$ a 10$
Ka puaa muku, mai 4$ a 6$
Ka puaa iwilei mai 2$ a 4$
Ka mamaki kapa, 1 ope, 1,25
Eia kou mau mea e loaa mai ai, a e hoakaka ia oe i ke kuai ana. Ina waiho oe i keia mau mea me kekahi poe kuai, a e kuai liilii aku, loaa mai paha i kala maoli a pau loa; a ina kuai paha me kekahi haole kuai, loaa mai ka hapalua ma ke kala, hapalua ma ka lole. Ka wahie, a me ka uala a me ka mamaki, he mau mea pono loa ke kuai i keia manawa. No ka mea, kokoke nui mai na moku, oia ke mea e kuai nui ia. K.
HE MANAO NO NA MAKUA.
Honolulu 29, Augate, 1844.
Aloha oe e ka elele mama o keia pae aina; he wahi manao ko'u a nau e haawi aku me ke aloha nui.
He wahi manao ko'u e paipai ana i na makua mea keiki; e hooikaika loa oukou i ka oukou mau keiki ma ka naauao, i loaa ai ka pomaikai i ko kakou aupuni; no ka mea, ua holo no ko kakou aupuni iloko o na mea naauao; a ua helu puia me na aina naauao ma ka honua nei.
Eia ke kumu o ko'u manao paipai; o ka lilo ana o keia aupuni na na haole e hooponopono, na waiwai a me na mea a pau e pili ana i keia aupuni ilihune, a me ka ilikole; nolaila, e hooikaika nui no na kamalii i ka naauao a me ka makau aku i ke Akua nui o ka lani; a mahuahua mai ka naauao ma keia aupuni, pomaikai ko kakou alii Kamehameha III, a me na'lii a pau malalo iho ona; he mea keia e kaulana nui ai ka inoa o ka Moi Kamehameha III, ke'lii. Aole ia wale no, o ka hanohano o keia aupuni kekahi, a me ka malu maikai o ka aina.
O ke akamai, a me ka maalea o ka poe naauao mai na aina e mai; oia ka mea i pilikia pinepine ai keia pae aina.
Eia hou keia; he nui no ka waiwai o ka naauao a me ke akamai, o keia mau mea ka mea i waiwai ai a ikaika ai no hoi o Beritania Nui, a me Amerika, a me Farani, a me na aupuni naauao ma ka honua nei; no ka naauao i ike ia ai na mile mai ka honua aku, a i ka la, a me na mea e ae no he nui loa, aole e hiki ia'u ke wehewehe nui loa; no ka mea; ua piha ko kakou mau pepeiao i ka lohe, a ua manoanoa na maka i ka ike maoli ana, o ke akamai a me ka naauao, oia ka mea e mahuahua ai ka malu maikai o ka noho ana malalo o H. H. M. Kamehameha III.
O na makua i hooikaika nui i ka