Ka Nonanona, Volume IV, Number 12, 1 October 1844 — Page 70

70 KA NONANONA. (OKATOBA,

ke malamaia oia e na malihini, aole hanaiia e kona poe hoahanau. He hana no kana, no ka mea he kauwa oia na Iesu Kristo, a he makau kona i ke Akua, a he makemake no hoi kona e hooluolu aku i na Luna misionari, na mea i hoouna mai ia ia i keia aina e hai mai i ka euanelio o Iesu Kristo. Aka, mai kakaha kakou i ko kakou ike ana, ua nawaliwali iki kona mau lima i ka hana. Aole mea kupanaha ia. No ka mea, ua nui paha na hoahanau ekalesia ma kona wahi, he mau haneri paha, he mau tausani paha, aole nae lakou kokua i ka lakou kumu. Hoole paha lakou i ka lakou aie nana no kona hai ana i ka euanelio. A he poe palaualelo, molowa i ka hana. He poe puni waiwai kekahi poe. Aua lakou i ka waiwai; aole manao e kuai Baibala, aole manao e kokua mamuli o ka ke Akua hana. A ike ka lakou kumu i keia, aole anei e lilo kona naau i naau kaumaha, aole anei e lilo kona mau lima, he mau lima nawaliwali? Oiaio no. Aka hoi, i ko ke kahuna pule ike ana, ua oluolu na hoahanau a pau i ka hanai ia ia; ae koke lakou i ka lakou aie nana; hana me ko lakou ikaika i na hana mana a pau; malama pono i ka lakou waiwai, aole haawi aku na ka poe palaualelo, aole hoomaunauna iki aku ia mea; aole puni waiwai, aole aua iki i ka haawi ana i ka lakou waiwai i mea e kukuluia'i ke aupuni o ka Haku ma ka honua nei, haawi oluolu no, a hana oluolu no hoi alaila hauoli ke kahuna, a kaena pinepine oia no lakou. No ia mea, ua ikaika kona noonoo ana ma na mea e pono ai kona poe hoahanau a me kanaka a pau. I ke ao, me ka po, i na la Sabati, a me na la noa, ua ikaika kona mau lima i ka hana i ke ao aku i ka poe naaupo, i ka hooluolu aku i ka poe haipule oiaio, a i ka hooweliweli aku i ka poe kolohe. Ua hanai oia i ka Iesu poe hipa i ka ai momona, maikai. No ia mea, mahuahua ke aloha o na hoahanau ekalesia i ko lakou kahu, i ka lakou kumu, i ko lakou ike ana i kona ikaika, a me kona oluolu ma ka imi ana i na mea e pono io ai lakou, a me ka lakou poe keiki. Aole anei pela, e na hoahanau? E hoao oukou i keia hana, i loaa mai ia oukou ka uku a'u i hoakaka aku. E hanai, a e malama, ma na mea o ke kino, i ka oukou kumu i nui ko oukou aloha ia ia, a i mahuahua hoi.
                Na'u na ko oukou hoahanau,
GELINA.

HE MAU WAHI MANAO NO KE KIAAINA HOU O HAWAII. HELU 3.

                E LELEIOHOKU E; Aloha oe; e like me ka olelo ma kela pepa 11, "aole pau wawe kuu ao ana a me kuu paipai ana ia oe," pela io no, aole i pau na manao e hoike aku ia oe. Me ke aloha no nae, a me ka makemake nui e pono kou noho alii ana, a e pomaikai hoi kou kino a me kou uhane, ke palapala nei au.
                Eia no keia manao e hoike aku ia oe, e kuu hoaaloha, e imi nui oe i na mea e paulele ai na kanaka hoopono ia oe. He mea nui loa keia, no ka mea, ina i noho na kanaka o Hawaii me ka manao ino ia oe, ke Kiaaina; me ka haohao hewa paha, me ka makemake e pau koke kou noho alii ana maluna o lakou; o ka poino no ia; aole pono kou noho pu ana me lakou; aole holo pono kau hana; imi na kanaka i mea e pau ai ko lakou pilikia, a holo kekahi poe i ka aina e, a noho molowa wale iho no kekahi poe me ka opuinoino. Pono