Ka Nonanona, Volume IV, Number 12, 1 October 1844 — Page 72

72 KA NONA NONA. (OKATOBA,

no ia o ka ino he nui wale. Make hewa kou paipai ana i na kanaka e malama i ke kanawai, ke malama ole oe. Manao koke na kanaka he mea liilii ke kanawai, a he mea liilii hoi kau olelo, a o ka haunaele no ia, a me ka hoowahawaha ia oe, ke Kiaaina. Aka, ea, ina ike na kanaka o Hawaii, ua malama loa oe i ke Kumukanawai a me na kanawai a pau i paiia a i kukalaia, a ua like loa hoi kau hana ana a pau me ke kanawai, oia kou mea e mahaloia'i, a oia hoi kekahi mea e paa'i ke kanawai.
                Ma na aina naauao, o ke kanawai a me ke kumukanawai, na mea koikoi loa iloko o ke aupuni, a ua noho like na lii a me na kanaka malalo pono iho o ke kanawai. O ke alii hana ku e, o kona hewa no ia, o ka pono like no ia. Pela ma Hawaii nei e pono ai. Nolaila e nana pono oe i keia olelo ma Kanawailua 17: 18, 19.
                No ke alii wale no keia mau hua; a e pono e paanaau oe i kela mau mea, "e malama i na huaolelo a pau o keia kanawai, a me keia mau kauoha, e hana aku ia mau mea.
                Aole pau na manao, piha e kahi pepa.
Aloha oe, MAKUAKANE.

KULA KAIKAMAHINE MA WAILUKU.

                Ua lohe iho nei makou, he hana maikai iloko o ia kula i keia wa; ina na ka Uhane o ke Akua ia hana, pomaikai maoli. He helehelena noonoo ko na haumana; nui ko lakou pule, a me ka imi i ka Olelo Hemolele, a me ke kuka pu ma na mea o ka Uhane. E pono no e hoomanao kakou i kela kula iloko o ka kakou pule, i mau a maopopo loa kela hana maikai. No ka mea, o ka mea nui hookahi no ia, o ka huli no o na Kaikamahine malaila i ke Akua. Aneane poho loa ka luhi o na kumu a me ka waiwai i lilo no kela kula, ke loaa ole ka pono o ke Akua, a me ka hoohanau hou ia e ka Uhane.
                Ua akaka loa keia. No ka mea, ua puka iwaho kekahi poe Kaikamahine o ia kula, a o ka poe makau i ke Akua, ua maikai ka lakou hana ana; he mau kumu hoonaauao lakou no ka poe naaupo. A o ka poe mihi ole, makau ole, ua piha loa i ka lealea a me ka lapuwale, a e alakai ana i na kanaka i ka pouli.
                Pela no na keiki o Lahainaluna. O ka poe manaoio, a ua huli io ke Akua, me ka haalele i ka hewa, maikai ka lakou hana ana. Pomaikai ka lahuikanaka ia lakou; he mau laau hua ono lakou e ku liilii ana ma kela wahi keia wala; he mau kukui lakou e hoomalamalama ana i na kanaka. Aka, o ka poe i puka mai ke Kulanui mai me ka naau kahiko, me ka naau lealea, haaheo, puni dala, puni hanohano, ua like lakou me ka mai lele iwaena o na kanaka. Hoolaha lakou i ka pouli a me ka ino ma o ma nei, a ua poho loa ka waiwai i lilo ia lakou a me ka luhi o na kumu nana i ao.
                Pehea la e pono ai? Nohea mai ka naau hou, a me ka pono io? No ke Akua mai no. Nolaila, e pule ikaika a e pule pinepine kakou ia ia no na kula ma Lahainaluna a me Wailuku, a me ke kula ma Hilo kekahi. E pule hoi no na kula kamalii a pau.

MANUWA AMERIKA.

                I ka la 25 o Sep. nei, ku mai ka manuwa Amerika, o ka Savana kona inoa, ma Honolulu nei; o Limaikaika ka inoa o ke Kapena. He manuwa nui keia, he 62 pu maluna iho; he moku hou wale no ia; akahi no a holo ma ka moana. Aia no mawaho, aole komo iloko o ke awa aole liuliu a holo hou aku.
                Mai Hilo mai keia moku manuwa i holo mai nei; liuliu kona ku ana malaila; aka, ua maikai no, i ko makou lohe; aole haunaele malaila. Pela no ma Honolulu nei, ua maluhia.

                PONO LOA. I kela mau la aku nei ua hooukuia kekahi Kapena moku okohala ma Lahaina, no ke kuai rama; he $50 ka uku, a ua haawi koke ia no, aole hoopii.