Ka Nonanona, Volume IV, Number 13, 15 October 1844 — Page 76

76 KA NONANONA. (OKATOBA,

uala paha, inu rama paha, moe kolohe paha, hoopai hewa i ka mea hewa ole paha, a malama oe i kela luna iloko o kau hana, o ka ili no ia o ka ino maluna ou; no kou kokua ana mahope o keia luna pono ole. Aole no e oluolu ka manao o na kanaka ia oe, ke ike lakou, ua hoonoho oe i na luna hewa maluna o lakou; kaumaha loa ka poe pono, a eha maoli ko lakou naau, no ka hana kekee a kou poe luna.
                No ka mea, ea, o na luna malalo ou, oia kou mau maka ike, a me kou mau pepeiao, a me kou mau lima lawelawe, a me kou mau wawae hele. Aia no oe ma kahi hookahi; aia no lakou, ua kau liilii ma na wahi a pau a puni ka moku. Ma o lakou la, ike oe i ke ano o ka noho ana o na kanaka; ma o lakou la lohe oe i kela pilikia, i keia pilikia; ma o lakou la, ua holo kau olelo ma kela kihi a i keia kihi o ka aina. A nolaila, e like me ke ano o kou poe luna, pela no ke ano o kou noho alii ana. Ina he poe luna maemae, malama pono, hana pololei, e like loa me ke kanawai, alaila pono kau mau oihana; mahalo na kanaka, a hoihoi ko lakou naau; a ina hoi hewa na luna, hookiekie, a hana ino imua o na kanaka, auhea la ka mea e pono ai?
                Eia kekahi; aole pono e hoopunahele ma ka wae ana i na luna. He makamaka kekahi, he hoaaloha kekahi, he aikane kekahi, a he hoahanau ma ke kino kekahi, a pau lakou i ka pili i ke Kiaaina i loaa ka oihana luna ia lakou.
                Aka, ea, e nana pono oe i ko lakou makaukau a me ke ku pono i kau hana; a malaila wale no, mai manao i ko lakou pili wale ana ia oe. Malia paha he naaupo, a he kolohe, a he huhu hiki wawe kekahi iloko o lakou.
                Ua lohe hoi au, ua hewa maoli ka hana ana a kekahi poe luna ma Hawaii, i keia manawa.
                Eia ka hewa o kekahi a'u i lohe ai, ua inu i na mea ona. Aia ma Kailua kona wahi i noho ai. Ua lohe anei oe i kona inoa?
                Eia ka hewa o kekahi luna a'u i lohe ai ma Hilo, he launa me na lawehala, me ka poe paa i ka hao; a o kekahi lunaauhau, ua huna i ka waiwai o ke aupuni. A o kekahi, ua ike ole i ka palapala, a o kekahi Konohiki ma Waipio, ua hoohaunaele loa i na kula malaila, a ua hooluhi wale i na wahine. Pela ka lohe wale iloko o na palapala a na kanaka ma Hawaii. He nui wale na hewa o na luna a'u i lohe ai, aole pau ma keia pepa.
                No keia mau mea i hoakakaia, noonoo iho la au i kela olelo a Ietero, ka makuahonoaikane o Mose, aia ma Pukaana 18: 21, 22, penei ia olelo, "E hoomakaukau oe i poe maiau o na kanaka, he poe makau i ke Akua, he poe kanaka oiaio, a huhu i ka waiwai alunu, a e hoonoho ia lakou maluna o kanaka, i luna lakou no na tausani, i luna no hoi no na haneri, a i luna no na kanalima, a i luna no na umi. Na lakou no e hooponopono i kanaka i na wa a pau; a o na mea nui a pau, na lakou e lawe mai ia oe, a o na mea liilii, na lakou ia e hooponopono; pela oe e mama ai, a na lakou e amo pu me oe."
                Ina i nana pono ke Kiaaina o Hawaii i keia olelo hemolele, a e koho i na luna, e like me ka manao o Ietero, alaila holo maikai paha kana hana, a mahalo na kanaka ia ia.