Ka Nonanona, Volume IV, Number 13, 15 October 1844 — Page 77

1844.) KA NONANONA. 77

                Penei ka olelo a Davida, ke alii o ka Iseraela. Hal. 101. 5, 6.
                "O ka mea ahiahi malu i kona hoalauna,
                Oia ka'u e hooki aku;
                O ka mea maka hookiekie, a naau hookano hoi,
                Aole au e hoomanawanui ia ia.
                Aia no ko'u mau maka ma ka poe oiaio o ka aina,
                I noho mai ai lakou me au,
                O ka mea hele ma ka aoao o ka pono,
                Nana no e hookauwa mai ia'u."
Aloha oe, MAKUAKANE.

LAAU KANU.

                Ua pau i ka oleloia kekahi mau laau maikai, ma kela mau pepa 10, a me ka 11; o ka fiku, ka alani, ka wi, ka ulu, a me ka niu, oia na laau kanu i hoakakaia.
                Eia hoi kekahi mau laau pono ke kanu ma keia pae aina.
                O KE KOFE. He laau waiwai loa keia ke kanuia a malamaia hoi ma Hawaii nei. Ua kanu nui no kekahi mau haole i keia laau; aia ma Waioli, elua haole nana e kanu i ke kofe; a he lehulehu na kausani i kanuia e laua, a ua maikai ka ulu ana. Kokoke paha ike i ka hua a nui. Aia ma Hilo kekahi haole kanu kofe, a ua maikai kona mala i kuu lohe ana. Aia ma Kaawaloa kekahi, ma Oahu nei kekahi. E ike auanei paha kakou i ka waiwai a keia poe haole, i ke kofe. No ka mea, akahi no a kanu, he opiopio na laau, aole hiki ka manawa hua nui. Mahope ia, alaila maopopo ka pono a me ka hewa o ka kofe.
                Ua kanu no hoi kekahi mau alii, a me kekahi mau kanaka maoli, i ke kofe, he uuku nae; aole nui loa e like me ia mau haole. Aia ma Kaneohe ka mala kofe o Piikoi ma; he maikai no; o ka uuku ka hewa. E pono no e kanu nui, a nui loa; e kanu kela mahiai keia mahiai i wahi mala kofe nana; e hooikaika i ka malama, a e ike auanei i ka hua o kona luhi.
                Eia na wahi ku pono i ke kofe; o kahi ua, a pulupalu oluolu ka lepo, e like me Waioli, Hilo, a me Kuapehu: aole pono loa na wahi makani ikaika no ke kofe; ina he aina makani, e like me Haiku, a me Kaneohe, e kanu i ke kofe ma na wahi lulu, na wahi poopoo, iloko o na ululaau a me na awaawa.
                He laau ku pono loa ke kofe i ka poe ilihune; aole nui ka waiwai lilo. O ka imi i wahi ku pono, e waele i ka nahelehele, a e kanu iho i na anoano kofe, a ulu iki, eha iniha paha ke kiekie, e uhuki a e kanu hou ae ma kahi akea. Alaila malama pono a hiki i ka manawa hua; ekolu makahiki paha, alaila ike i kahi hua. Oia wale no ka hana; aole kaumaha loa e like me ke ko.
                Eia kekahi; ua waiwai loa kekahi mau aina o ka honua nei i ke kofe, o Berekila ma Amerikahema, a o na mokupuni o Inia Hikina a me Inia Komohana, waiwai ia mau aina i ke kofe. Ma kekahi mokupuni o Inia Komohana, o Poko Riko kona inoa, ua ohiia a ua kuaiia'ku 28,000,000, pauna kofe i ka makahiki hookahi! Nui, ea! Ina he hapawalu ke kumu kuai no ka pauna hookahi, ehia dala i loaa no kela kofe? Eia no $3,500, 000. Aole anei waiwai kela mokupuni i ke kofe? He aina uuku kela; aole like kona nui me keia pae aina, aole hoi he nui na kanaka malaila.
                Nolaila, e na mahiai a pau, e na mea aina a pau, ma Hawaii nei, e ala, e eu, a e kanu i mala kofe.