Ka Nonanona, Volume IV, Number 13, 15 October 1844 — Page 79

1844.) KA NONANONA. 79

                I. MALO, i Lunakanawai mai Kaawaloa a Keahualono.
                G. D. HUEU, i Lunakanawai mai Keahualono a Kaakolea.
                HAAHEO, i Lunakanawai mai Kaumakea a Honokea.
                PUULOA. i Lunakanawai mai Kaula a Mawae.
                KANAINA, i Lunakanawai mai Mawae a Okiokiaho.
                D. KELIIWAHALAU, i Lunakanawai mai Okiokiaho a Keahewai.
                B. PITMAN, JR. i Lunakanawai no na haole ma Hilo.

KA LUNAAUHAU HANA KEKEE MA WAIALUA.

Honolulu, Okatoba 1, 1844.
                E ka Nonanona e; Aloha oe; he wahi opeope e hoike aku ma na wahi a pau o keia mau mokupuni, eia mai ka opeope; I ka ka la 17 o Augake, hiki makou ma Waialua mai ke kaapuni hoike ana. Ia la no i ka hora 4 paha o ke ahiahi, ninau aku la ke Kahukula ia Kuokoa, ke uku ia nei anei na kumu? hoole mai la o Kuokoa. I hou aku la ke Kahukula ia ia, "aole nae paha he waiwai a ka Lunaauhau o na la paahao." "He waiwai no, he mau laau hale a he mau loi ai ekolu." Ninau hou ke Kahukula, no hea ka laau? Hai o Kuokoa no ka poalua no. Alaila palapala aku la ke Kahukula i ka Lunaauhau, penei.
                "Aloha oe e Keliihuluhulu; e haawi mai oe i na loi ai, ekolu a me ka laau hale na'u, i mea e hookaa aku ai i ka aie o ke aupuni i na kumu kula." Hali aku la ka mea hali palapala a hiki i ka Lunaauhau, nana iho la ka luna, a pau, olelo mai la oia i ka mea hali palapala, "o na olelo a pau o keia palapala, aole loa wau e ae iki aku i kekahi mea." Hoi mai la ka mea nana i hali, a hai mai la i na olelo a pau maluna; hoouna hou ke Kahu i ka Lunaauhau, e hele mai e kamailio pu, no ke kumu o ka paa ana o ka waiwai. Hoole mai la ka Lunaauhau, i mai la; "ina no'u ka manao hele aku wau."
                Alaila, hoi rnai la ka mea nana i kii, a hai mai la i na olelo i oleloia maluna; hele koke aku la ke Kahukula i kahi o ka Lunaauhau; owau kekahi i hele a me kekahi poe e ae he nui wale. Hiki aku la ke Kahu i kahi o ka Lunaauhau; a aloha aku aloha mai; ninau aku la ke Kahu, "ua ike oe i kuu wahi palapala?" ae mai la kela; i hou aku la keia "a pehea ka laau a me ka ai?" Olelo mai la ka Luna, "aole he ai he opiopio; aole he laau, ua lilo i ke alii." Ninau hou aku la ke Kahu i ke alii hea? I mai kela "i ke alii no hoi paha." "Owai ia alii inoa ole?" Hai mai la, o ke Kiaaina, ua olelo mai oia e ana wau i ka laau a hiki mai ka moku, hooili aku. Ninau hou aku la ke Kahu, ma ke aha la kona lawe ana i ka laau? Ma konu uku anei ma ke aha la? I mai la ka luna, "no ka lohe ana na ke alii." Olelo hou aku la ke Kahukula: "e nana oe ma ke kanawai aoao, 171 penei: "Aole alii, aole kuhina, aole luna e ae e hiki ke lawe wale i ka waiwai o ke aupuni nona iho; ua laa ia waiwai no ke aupuni wale no, a e haawi ia aku ia waiwai i na luna malama waiwai no ke aupuni;" a ma ka aoao 186 lanani iwakalua; "Ua hewa no kahi aua ana o na Lunaauhau. Ina i kii aku ke Kahukula i ka waiwai e like me ka olelo o ke kanawai kula, a aua ka lunaauhau, alaila nana no e uku i kona waiwai ponoi; no ka mea, ua paa wale oia i ka waiwai o ke aupuni, e hooko ia keia kanawai maluna ona." Pau ka