Ka Nonanona, Volume IV, Number 13, 15 October 1844 — Page 80

80 KA NONANONA. (OKATOBA,

olelo ma ke kanawai, ninau hou ke Kahukula, pehea kou manao i keia mau olelo a'u? Olelo ka luna, "e aua no au e like me ka olelo a ke Kiaaina." Olelo hou ke Kahu, hoopai au ia oe i kou waiwai ponoi; aia i kou manao. Ninau hou ke Kahu heaha kou waiwai? Hai mai kela, he hale wale no a he kanaka; olelo ke kahu, nou no ke kanaka; aole he paahao, he lawe no au ia ke haawi mai oe; o kau mau mea a pau e haawi mai ai, e lawe no au. Hoopaa iho la ke kahu i ka hale, a mahope ka hoopii. Aole nae i pau loa na olelo ma keia palpala, ua waiho ia kekahi.  Na KEAKA.

                Ua lohe au i ke Kahukula, ua kokua ke Kiaaina mamuli ona, a ua hoohewaia ka hana a kela lunaauhau. Mahope pau ka aua ana o ua lunaauhau nei, a haawi pono mai oia i ka waiwai o ke aupuni, ia Keikenui, ke Kahukula: a nolaila, ua hoihoiia kona hale a me kona waiwai ponoi no ke ahonui i o ke Kahukula. Ua hookolokoloia ma Honolulu nei.
                He kupanaha maoli keia hana a keia lunaauhau; aole nae oia wale. Ua nui ka poe a'u i lohe ai, ua hana me ia. No ke aha la hoi? Me he mea la e hoole ana i ka naauao, a me na kanawai kula, a me ka makemake o na lii. No ke Kulanui Keliihuluhulu; kainoa, ua ike oia i ka pono o ke kula, a me ka ike, a me ka noiau; eia ka! ua keakea i kela mau mea nui, e hanohano ai ke aupuni o Hawaii nei. Hookahi kumu nui o ka pilikia o na kula, o ka naaupo. Kakaikahi ka poe manao nui i ka naauao, no ka ike ole no, a me ka noonoo ole.

KOKUA.

                Ua ae like na hoahanau o ka ekalesia mua o Honolulu nei, e kokua i ka lakou kumu, ma na mea o ke kino. I ka malama o Iune hope iho nei, ka ae like ana. Eha kokua ana i ka makahiki hookahi, a ke hoomaopopo nei i keia hana maikai. I ka pule mua o Okatoba nei, ke kokua mua ana, a ua loaa mai na dala $130.
                Ku pono maoli keia hana. Make pono paha ka paipai ana o Gelina ma ka Nonanona: olioli na haipule o Amerika ke lohe lakou, ua hapai ko nei hoahanau i keia hana; maha lakou. Ma keia kokua ana, ua akaka ke aloha i ke kumu, a me ka Haku, a ina i hanai na ekalesia i ka lakou poe kumu ma ka manaoio a me ke alohaio, aole ole o ka pomaikai. E hooiaio mai a e hoomaikai ke Akua ia lakou ma na mea o ke kino a me ka uhane. E nana i keia olelo ma Malaki, 3: 10, "E lawe mai i na waiwai hapaumi a pau iloko o ka hale ahu waiwai,
                I ai maloko o ko'u hale,
                A e hoao mai oukou ia'u ma ia mea, wahi a Iehova o na lehulehu,
                I wehe ai paha au i na puka wai o ka lani,
                A e ninini iho i ka pomaikai maluna o oukou, a pau aku la, aohe koe."
                Heaha ke ano o keia olelo maluna iho?
                Aole anei akaka?
                Ua lohe iho nei au ia Kalaka, ua holo ka hana kokua ma Wailuku. Elua haneri dala ($200,) i haawiia e na hoahanau malaila e kokua i ka lakou kumu. Hookahi hoahanau laua me kana wahine i haawi i $15. Pono loa keia; pomaikai Wailuku. He 54 na hoahanau hou i hookomoia iloko o kela ekalesia, i kela Sabati aku nei.