Ka Nonanona, Volume IV, Number 14, 29 October 1844 — Page 81

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." SOLOMONA.
Buke 4. HONOLULU, OAHU, Okatoba 29, 1844. Pepa 14.

NO KA HANAI I NA KAHUNAPULE. Helu 9.

Makawao, Maui Hikina, Sepatemaba 19, 1844.
                E na hoahanau ekalesia mai Haw aii a Kauai. I ko'u manao ana, ua akaka lea ia'u, o ka hanai kahunapule, oia ka malama i ka oukou poe Kumu, he mea ia e pono io ai oukou, no ka mea, malaila, e hiki ia oukou ke kokua mamuli o ka hoolaha i ka euanelio a Iesu Kristo ma na aina a pau.
                He hana nui loa keia. E noonoo kakou i ke ano o na lahuikanaka. O ka nui o lakou, aia e noho ana iloko o ka pouli, iloko o ka malu o ka make. Eono hapawalu o na kanaka o ka honua, he poe Pegana, a he poe Mahometa. Owai ka poe Pegana? He poe ike ole ia Iehova, i ke Akua oiaio. Aole lakou ike i kana Keiki ia Iesu Kristo, a me kona make ana i Kalahala no ka hewa o ko ke ao nei. Aole o lakou Baibala, aole Sabati, aole kumu. No ia mea, ua lilo loa lakou i ka hewa. He poe hoomana kii; he poe kolohe maoli, paakiki ka naau, aloha ole; hana ino kekahi i kekahi; he poe ona, aihue, hoohiki ino, pepehi kanaka, moe kolohe, puni kaua, hana ia mea ino aku, ia mea ino aku. E holo kiki ana lakou ilalo i ka lua ahi, e like me ka Davida olelo, "E hoolei ia ilalo i ka po ka poe hewa, a me na lahuikanaka a pau i hoopoina i ke Akua." Auwe, auwe, ka make pinepine ana o ia poe! Me ke kani ana o ka wati; pela ka poho pinepine ana o lakou! Heaha ka mea e pau ai keia make ana o kanaka? Hookahi mea e pau ai, o ka euanelio a ka Haku. Ina hoolaha ia keia ma na aina a pau, a lohe na kanaka a pau, alaila, ua pau keia hemahema, Alaila, hiki mai ke aupuni o j ke Akua, huli mai kanaka, a pakele i ka make! Aole anei he hana nui loa ia, a he hana maikai loa? Aole anei oukou makemake e hapai keia hana? E kokua mamuli o ke kukulu ana i ke aupuni o ka Haku ma ka honua? I pakele na kanaka a pau i ka make weliweli e hiki mai ana, a loaa koke ia Iesu ka uku no kona eha ma ke kea?
                A pehea e hiki ia oukou ke kokua ma keia hana nui? Ua ike au i ka oukou hana ana i ka mahina hou. Ua haawi kekahi i ka hapawalu, a he hapaha paha kekahi; a ua hana kekahi poe me ko lakou mau lima. Aka, he wahi hana uuku keia. Aole nui na dala i lilo aku ma laila. Pehea e hiki ia oukou ke hana a mahuahua loa ka pomaikai o na lahuikanaka o ka honua? I ko'u manao e hiki no ia oukou ke haawi i na tausani dala i kela makahiki, i keia makahiki, a malaila, e mahuahua ko oukou pomaikai, a me ka waiwai no hoi.
                Pehea e hiki ai? Oia ka mea a'u e hooakaka. E heluhelu oukou me ka noonoo.
                I keia manawa, ua hoiliili na luna misionari ma ko makou aoao, ma Amerika, 250,000, dala i kela makahiki, i keia makahiki, i mea e hoolahaia'i ka olelo a ka Haku a puni ka honua. Ehia dala o ia puu dala i hoounaia mai i keia pae aina e malama i ko nei poe misionari?