Ka Nonanona, Volume IV, Number 14, 29 October 1844 — Page 84
84 KA NONANONA. (OKATOBA,
alii ia Keoti e luu ae oe i ka aila, "ina hookahi haneri barela hookahi ou barela." Luu iho la ia, hookahi tausani me na haneri eha. Kapili lakou i ka moku, i ke kolu o ka mahina ke kapili ana. I ka hapalua o ka lima o ka malama paa ka moku. Ninau ae la ke alii i na kanaka, "owai ko kakou mea e noho i ka ailana (mokupuni) nei?
I mai la kekahi poe, "o makou ke noho," 11 o lakou i noho aku. He 26 i holo mai, mai ka aina ailana a hiki i Kauai, 18 la Poakahi lakou ilaila, i ka la 11 paha o Ok.
Na IAEA.
Na mea ino ma Honolulu nei.
1. O NA ILIO. Lanakila loa keia holoholona ma keia kulanakauhale. Ina hoohaunaele kekahi kanaka, a he haole paha, hopu koke na makai, a lawe i ka papu. Hoopai pono na lunakanawai. Aka, ea, o ka ilio, hoohaunaele loa ia, i ka po a me ke ao; aihue no ka ilio, aoa no, nahu no, hakaka no; hoopoho wale i ka ai a na kamalii; hoopelapela i ka hale, aole nae i hopuia! Aole hoi i hoopaiia. Lanakila loa ka ilio. Pehea keia? Pono anei? Kainoa, ua emi na ilio i ke kanawai e kau nei, aole ka! minamina na kanaka i ka ilio, aole minamina i ka hapawalu!
Aole anei pono e hoopii hou i keia pilikia imua o ka ahaolelo?
2. O KA HELE WALE. Hele wale na keiki ma ke alanui; aole wahi lole, aole aahu; he wahi malo wale no.
O na wahine kekahi; hele ma ke alanui, me kahi mumuku wale no; he olohelohe loa. Aole no ka nele keia; no ka mea, ua ikea i kekahi manawa me ka aahu pono no. No ka hilahila ole no. Ina nele ka wahine, e aho no e noho ma ka hale; e hooikaika a loaa kahi aahu pono, alaila hele ma ke alanui. He mea hilahila loa ka hele wale o na wahine. O na kane kekahi, hele wale me kahi kihei a me kahi malo wale no; aole nalowale ko lakou olohelohe ana. Kainoa, e hana e like me Adamu laua me kanawahine. No ko laua hewa, imi koke laua i mea e nalo ai ko laua hilahila.
3. O KA HOOHOLO IKAIKA I NA LIO. E hana i kela kanaka e kau ana maluna o ka lio, me na kepa nunui, e hio ana imua a e holo ana me ka ikaika loa. He mea ino maoli. Eia ka ino, o ka make o ke kanaka, ke haule; o ka poino o ka poe hele wawae ma ke alanui a me ka make o ka lio. He mea maikai ka lio, he mea aloha, a he mea hoi e waiwai ai ke kanaka; a nolaila, o ka mea hana ino i kona lio, ua hewa ia i ke Akua. "Manao ke kanaka pono i ke ola o kona holoholona," wahi a Solomona.
I ka la Sabati kekahi holo ino ana, me ka walaau, a me ka hoohaunaele ana.
MANUWA AMERIKA.
I ka la 28 o Okatoba nei ku mai ma Honolulu nei ka manuwa Amerika, o Warren kona inoa. Mai Mesiko mai keia munuwa; a ua lawe mai i kekahi ope palapala mai na aina e mai.
Eia na mea a makou i lohe maopopo ai. Ua hoi ae o Mi. Rikeke laua o Haalilio i Amerika, a ua hiki laua i Bosetona i ka la 18 o Mei iho nei, a manao laua e holo koke mai i Hawaii nei iloko o Augake o ma o Guatimala la, kela aina e waiho ana iwaena o Amerika Akau a me Amerika Hema, ko laua hoi ana mai. Aole paha liuliu a hiki mai laua maanei.
Eia kekahi; i ka la 19 o Mei, ua holo mai kekahi moku, o Inez kona inoa, mai Bosetona mai, i keia pae aina, a iloko o Iune holo mai kekahi mai Nu Ioka mai, o Mariposa kona inoa. O ka hiki mai koe o laua.
Eia kekahi; aole kaua ma Mesiko; aole koi i huiia o Telasa, kela aina e pili pu ana me Mesiko, me Amerika huipuia.
KA MAKE.
Ua make iho nei, i ka la 25 o Okatoba nei, o Isaia Kaaoaohema, kekahi alii o Hawaii nei. He 56 kona mau makahiki.
Noho no ia iloko o ka naaupo, a me ka hoomana kii o ka wa kahiko, a hiki mai ka olelo a ke Akua, huli no ia i ka aoao Keristiano, imi no i ka palapala kamailio pinepine me kana kumu, me Binamu, a maopopo, ua bapetisoia oia iloko o ka inoa o ke Akua kahikolu, i ka la 20 o Sep. 1829. He 15 makahiki kona noho hoahanau ana, a make aku la. O ka lolo kona mai i make ai, he make emo ole no.